ट्रम्पले निर्वाचन अधिकारीलाई धम्की दिएको कल रेकर्ड सार्वजनिक

A+ A A-

अमेरिकी राष्ट्रपति डोनल्ड ट्रम्पको एक फोन रेकर्डिङ सार्वजनिक भएको छ । राष्ट्रपति चुनावको मतगणना चलिरहेका बेला आफूलाई जिताउन केही भोटको व्यवस्था गर्न भन्दै ट्रम्पले जर्जिया प्रान्तका निर्वाचन अधिकारीसँग फोनमा कुरा गरेको रेकर्डिङ वासिङ्टन पोस्टले सार्वजनिक गरेको हो ।

फोनमा ट्रम्प रिपब्लिकन सेक्रेटरी अफ स्टेट ब्रेड रफेन्सपोगरसँग भनिरहेका छन्, ‘म बस् ११ हजार ७ सय ८० भोट खोज्न चाहन्छु ।’ रफेन्सपोगरचाहिँ ट्रम्पसँग भनिरहेका छन्, ‘जर्जियाको नतिजा सही हो ।’

डेमोक्रेटिक उम्मेदवार जाे बाइडेनले राष्ट्रपति चुनावमा जर्जिया प्रान्तमा जितेका थिए । उनले कुल ३ सय ६ इलेक्टोरल भोट जित्दा ट्रम्पले २ सय ३२ भोट पाएका थिए ।

फोन कल के छ ?

वासिङ्टन पोस्टले सार्वजनिक गरेको कल रेकर्डिङमा ट्रम्पले जर्जियाका सेक्रेटरी अफ स्टेटमाथि दबाब दिएका सुन्न सकिन्छ । उनले जर्जियामा आफूले चुनाव जितेको दाबी गरेका छन् । रफेन्सपोगरलाई भनेका थिए, "तपाईंले पुन: गणना गरेको भन्दा केही पनि गलत हुने छैन।

तर, रफेन्सपोगर जवाफ दिन्छन्, ‘राष्ट्रपति महोदय, तपाईं जुन डाटा देखिरहनुभएको छ, त्यो गलत हो र यो तपाईंसामुको चुनौती हो ।’

राष्ट्रपति ट्रम्पले रफेन्सपोगरलाई सम्भावित कानुनी नतिजाको लागि तयार रहन धम्कीसमेत दिएका छन् । भनेका छन्, ‘तपाईंलाई थाहा छ, उनीहरूले के गरे । यसबारेमा जानकारी नदिनु अपराध हो । तपाईंले यस्तो हुन दिन सक्नुहुन्न । यो तपाईं र तपाईंका अधिवक्ताका लागि ठूलै खतरा हो ।’

ह्वाइट हाउसले अहिलेसम्म कल रेकर्डिङबारे कुनै टिप्पणी गरेको छैन ।

प्रकाशित मिति: सोमबार, पुस २०, २०७७ ०६:४८