बुटवल पुगेर पौडेलले भने, 'संविधानका निर्माता हौँ, प्रतिनिधिसभा पुनर्स्थापनाको आधार छैन'

बुटवल पुगेर पौडेलले भने, 'संविधानका निर्माता हौँ, प्रतिनिधिसभा पुनर्स्थापनाको आधार छैन'

A+ A A-

अर्थमन्त्री विष्णु पौडेलले प्रतिनिधिसभा पुनर्स्थापनाको कुनै संवैधानिक आधार नभएको बताएका छन् । उनले प्रतिनिधिसभा विघटनको मुद्दा सर्वोच्च अदालतको संवैधानिक इजालसमा पुगेको भन्दै इजलासले दिने निर्णय हार्दिकताका साथ ग्रहण गर्नेसमेत बताए ।

‘प्रतिनिधिसभा विघटनको मुद्दा हाम्रो निष्ठाको विषय हो । तर, हामी पनि कानुनका निर्माता हौँ, संविधानका निर्माता हौँ । हामीले बुझ्छाैँ । प्रतिनिधिसभा पुनर्स्थापनाको कुनै संवैधानिक आधार छैन । पुनर्स्थापना हुनै सक्दैन’, उनले भने । उनले संविधानको धारा ७६ को उपधारा ७ र धारा ८५ ले स्पष्ट ढंगले संसद् विघटनको परिकल्पना गरेको भन्दै प्रतिनिधिसभा पुनर्स्थापना नहुने बताए ।

बुटवलमा आज जिल्लास्तरीय अगुवा कार्यकर्ता भेलालाई सम्बोधन गर्दै नेकपाका महासचिवसमेत रहेका पौडेलले पुष्पकमल दाहाल 'प्रचण्ड'ले महत्त्वाकांक्षी नेतालाई साथमा लिएर महत्त्वाकांक्षीहरूका बीचमा समीकरण गरेर प्रधानमन्त्रीलाई पदच्यूत गर्ने निर्णय गरेको बताए । उनले अहिले उत्पन्न परिस्थिति कुनै सिद्धान्त, नीति वा विचारले सिर्जना गरेको नभई पदीय महत्त्वाकांक्षाले सिर्जना भएको समस्या रहेको बताए ।

उनले संविधान, लोकतन्त्र र राजनीतिक स्थिरताका लागि प्रतिनिधिसभा विघटन गरेर केपी शर्मा ओलीले ताजा जनादेशको बाटो रोजेको बताए । त्यस्तै, उनले ५० अर्बको आर्थिक दायित्व विभिन्न माध्यमबाट स्रोतको प्रवर्द्धन गरेर निःशुल्क खोप ल्याउने निर्णय गरे पनि पार्टीभित्रकै साथीबाट सरकारका काममा अवरोध गराउने काम भएको समेत बताए ।

ऊर्जामन्त्री टोपबहादुर रायमाझीले नेकपा छुट्टिने स्थितिमा आएपछि संकट पैदा भएको बताए । उनले भने, ‘भ्रमको खेती गर्नेहरूको हैसियत अहिले सडकमा छ, पछि गड्डामा खाडलमा जानुहुन्छ ।' नेता रायमाझीले एकताका प्रधानमन्त्री ओलीले नेतृत्व गर्ने र प्रचण्डले पार्टी हेर्ने गरी जिम्मेवारी बाँडफाँट भएको स्मरण गर्दै उनले अर्का अध्यक्ष प्रचण्डलाई पार्टीको जिम्मेवारी छाडेर प्रधानमन्त्री पदमा नजर डुलाएको आरोप लगाए ।

त्यस्तै, नेकपा नेता शंकर पोखरेलले प्रचण्डले पूर्वएमालेभित्र रहेको अन्तरविरोधमा खेलेर पार्टीको नेतृत्व कब्जा गर्न खोजेको आरोप लगाए । नेकपाका केन्द्रीय कमिटी सदस्यसमेत रहेका नेता पोखरेलले पूर्वएमालेको अन्तरविरोधमा खेलेर नै कार्यकारी अध्यक्षका रूपमा रहेका प्रचण्डले प्रथम अध्यक्ष केपी शर्मा ओलीमाथि अरोपपत्र प्रस्तुत गरेको दाबी गरे ।

भेलामा उपस्थित कार्यकर्ताहरूलार्ई सम्बोधन गर्दै उनले नेकपामा देखिएको संकटको एक मात्र कारण उक्त आरोपपत्र रहेको बताए । ‘अभियोगमा छलफल हुन सक्ने ठाउँ नै थिएन । निषेधको उद्देश्यले लगाइएको आरोप थियो’, उनले भने, ‘आरोपपत्र फिर्ता गरेको भए पार्टी एकता बचाउन सकिन्थ्यो ।’