प्रदेश २ नेकपाः सत्यनारायण मण्डललाई दलकाे नेताबाट हटाउने तयारीमा प्रचण्ड-नेपाल समूह

प्रदेश २ नेकपाः सत्यनारायण मण्डललाई दलकाे नेताबाट हटाउने तयारीमा प्रचण्ड-नेपाल समूह

A+ A A-

नेकपा प्रचण्ड-माधव नेपाल समूहले प्रदेश २ का संसदीय दलका नेताबाट सत्यनारायण मण्डललाई हटाउने तयारी गरेकाे छ ।

स्थायी कमिटी सदस्यसमेत रहेका नेता मण्डल प्रधानमन्त्री केपी शर्मा ओली समूहमा लागेपछि प्रचण्ड–नेपाल समूहले उनलाई हटाउन लागेका हुन् । शुक्रवार जनकपुरस्थित पार्टी कार्यालयमा आयोजित पत्रकार सम्मेलनमा प्रदेशसभा सदस्य शत्रुध्न महतोले मण्डलमाथि दलका उपनेता रामकुमार यादवले अविश्वासको प्रस्ताव दर्ता गराइसकेको र आइतवार हुने दलको बैठकमा बहुमत सांसदको प्रस्ताव अनुसार हटाइने जानकारी दिए ।

महतोका अनुसार १७ जना सांसदको हस्ताक्षर सहित मण्डलमाथि अविश्वासको प्रस्ताव दर्ता भएको छ । प्रदेशसभामा पूर्वमाओवादीका ११ र एमालेका २१ जना गरी ३२ जना सांसद छन् । जसमध्ये १९ जना आफूहरुको पक्षमा रहेको महतोको दावी छ । पुर्व माओवादीमध्येबाट दिलिप साह र पूर्वएमालेबाट लगनलाल चौधरी र अनिता यादव खुल्न सकेकी छैनन् ।

पूर्वमाओवादीबाट चार जना प्रदेशसभा सदस्यहरु रामचन्द्र मण्डल, कुन्दनप्रसाद कुश्वाहा, मोहम्मद समीर र ज्वालाकुमारी साह ओली समूहमा लागिसकेका छन् भने प्रमिलाकुमारी यादव, फुलियादेवी सदा, भरतप्रसाद साह, रामकुमार यादव, जगतप्रसाद यादव र रुविकुमारी कर्ण प्रचण्ड–नेपाल समूहमा छन् ।

पूर्वएमालेबाट गोविन्द बहादुर न्यौपाने, डिल्ली उप्रेती, प्रमोद यादव, अशोक यादव, मदनसेन श्रीवास्तव, मन्जु यादव, शत्रुधन महतो, बेची लुंगेली, रविन्द्र बैठा, हसिमा खातुन, नागेन्द्र यादव, सुन्दर विश्वकर्मा, सिता गुरुङ गरी १३ जना आफूहरुको पक्षमा रहेको महतोले दाबी गरे ।

नेकपा नेताहरुका अनुसार मण्डललाई हटाएर पुर्व एमालेका महतोलाई नै संसदीय दलको नेता बनाउने तयारी छ । यसअघि तत्कालीन एमालेमा समेत दलका नेतामा उम्मेदवारी दिएका महतो मण्डलबाट पराजित भएका थिए । विगतमा सत्यनारायण मण्डलले भागबण्डामा लिप्त भई प्रदेशको प्रमुख प्रतिपक्षी दलको नेताको भूमिका निर्वाह गर्न नसकेको महतोको आरोप छ ।

बिहीबार सम्पन्न प्रचण्ड–नेपाल समूहको नेकपा प्रदेश कमिटीको बैठकले प्रधानमन्त्री ओलीको कदमविरुद्ध एक हजार एक सदस्यीय प्रदेशस्तरिय संघर्ष समिति गठन गरिएको नेकपा प्रदेश सह–ईन्चार्ज विश्वनाथ साहले बताए । उनकै संयोजकत्वमा गठित संघर्ष समितिले प्रदेशका आठवटै जिल्ला, स्थानीय तह र वडाहरुमा संघर्ष समिति गठन गरी पौष १८ देखि २४ गतेसम्म आन्दोलनका कार्यक्रम सञ्चालन गर्ने निर्णय गरेको छ ।

प्रकाशित मिति: शुक्रबार, पुस १७, २०७७ ११:५३