भिजिट भिसा भन्दै कामदार पठाउँदै, आजै उड्दैछन् तीन सय बढी नेपाली

A+ A A-

भिजिट भिसामा धमाधम युएई कामदार सप्लाइ गर्ने क्रम रोकिएको छैन । गत भदाैदेखि लगातार यसरी विदेशिनेकाे संख्या बढ्दाे छ ।

काेराेना महामारीका कारण बन्द भएको अन्तर्राष्ट्रिय हवाई सेवा सञ्चालनमा आएयता साढे १० हजार नेपाली भिजिट भिसामा यूएई पुगेका छन् । अध्यागमन विभागको तथ्यांकअनुसार गत १६ भदौदेखि अन्तर्राष्ट्रिय हवाई सेवा सञ्चालनमा आएपछि १० हजार ५ सय नेपाली भिजिट भिसामा यूएई गएका छन् ।

तर, तीमध्ये अधिकांश घुम्नका लागि नभएर काम गर्नका लागि त्यहाँ गएका विभिन्न अध्ययनले देखाएका छन् ।

आज सोमबार पनि तीन वटा अन्तर्राष्ट्रिय उडानमार्फत ३ सय ९ जना भिजिट भिसामा यूएई जाँदै छन् । साँझ ६ बजेको फ्लाइ दुवैमार्फत ६४ जना, ९ बजेको एयर अरबियामार्फत ९३ जना र राति २ बजे एयर अरबियामार्फत १ सय ५२ जना गरी ३ सय ९ जना नेपाली भिजिट भिसामा यूएई जान लागेका हुन् ।

विभागका एक कर्मचारीका अनुसार यूएई जान लागेका ३ सय ९ जनामध्ये २० जना महिला छन् । ‘आज सोमबारका लागि मात्र २० वटाभन्दा धेरै म्यानपावर कम्पनी, म्यानपावरका व्यक्तिगत एजेन्ट र केही कन्सल्टेन्सीले भिजिट भिसामा नेपाली पठाउँदैछन् । । सबैको टिकट भएको छ । सबैभन्दा धेरै राति २ बजेको एयर अरबियामार्फत जाँदैछन् ।’

भिजिट भिसा नाममा म्यानपावर कम्पनी, कन्सल्टेन्सी र व्यक्तिगत एजेन्टले चर्को रकम लिएर रोजगारीका लागि कामदार पठाएका हुन् । यसरी जाने कतिपय नेपालीलाई कहाँ र कसरी जाँदै छौँ भनेर थाहा पनि छैन ।

नेपालबाट यसरी भिजिट भिसामा उडेका महिलाहरूलाई यूएईसँगै खाडीका अन्य देशमा घरेलु कामदारका रूपमा पुर्‍याउने गरिएको छ । सरकारले खाडीका देश र मलेसियामा महिला घरेलु कामदार पठाउन प्रतिबन्ध लगाएपछि यी देशमा म्यानपावर कम्पनीहरूले भिजिट भिसामार्फत कामदार पठाउने गरेका छन् ।

म्यानपावर, कन्सल्टेन्सी, ट्राभल र एजेन्टबाट भिजिट भिसामा यूएई जानेकाे संख्या बढ्दाे छ । यूएईसँग खाडीका अन्य देशमा समेत ट्राभल एजेन्सी, कन्सल्टेन्सी, म्यानपावर कम्पनी र तिनका प्रतिनिधि एजेन्टले भिजिट भिसाका नाममा रोजगारीमा कामदार पठाइरहेको पाइएको वैदेशिक रोजगार विभागले जनाएको छ । भिजिट भिसामा कामदार पठाउँदै आएका म्यानपावर, कन्सल्टेन्सी र म्यानपावरका एजेन्टलाई पक्राउ गरेको विभागकाे भनाइ छ ।

अन्तर्राष्ट्रिय उडान गर्दै आएका एयरलाइन्स र अध्यागमनका कर्मचारीले भ्रमणको उद्देश्य नखुले पनि भिजिट भिसा भएकालाई बोर्डिङ पास र प्रस्थान अनुमति (डिपार्चर) दिँदै आएका छन् । भिजिट भिसामा जाने कामदारलाई सेटिङमा राति २ बजेको एयर अरेबियाको उडानमार्फत पठाउने गरिएकाे छ ।

भिजिट भिसाका लागि एजेन्टले प्रतिव्यक्ति २ लाख ५० हजारभन्दा बढी रकम असुल्ने गरेका छन् ।

प्रकाशित मिति: सोमबार, पुस १३, २०७७ १६:२५