फोन अफ गरेर सडकबाट उम्किएका साह र चौधरी बालुवाटार पुगेर मन्त्री

A+ A A-

सत्तारुढ नेपाल कम्युनिस्ट पार्टी (नेकपा) दुई टुक्रा भएको छ । प्रधानमन्त्री केपी ओली समूह सत्तामै छ भने प्रचण्ड–माधव नेपाल समूह आन्दोलनका लागि सडकमा छ । प्रचण्ड-नेपाल समूहका केही नेतालाई प्रधानमन्त्री ओलीले मन्त्री बनाएर आफ्नो कित्तामा तानेका छन् भने ओली समूहका नेता तान्न प्रचण्ड-नेपाल समूह प्रयासरत छ ।

प्रधानमन्त्री ओलीले गत शुक्रबार मन्त्रीमण्डल पुनर्गठन गर्दै पूर्वमाओवादीका टोपबहादुर रायमाझी, प्रभु साह, मणि थापा, गौरीशंकर चौधरी र दावा लामालाई मन्त्री बनाएका थिए । मन्त्री बनाएसँगै उनीहरूलाई तत्काल शपथग्रहणसमेत गराइयो ।

यसरी बने साह र चौधरी मन्त्री

शहरी विकासमन्त्री बनेका प्रभु साह बिहानदेखि प्रचण्ड समूहका विभिन्न कार्यक्रममा व्यस्त थिए । नेकपामा ओली र प्रचण्ड–नेपाल समूहमा विवाद सुरु हुँदा साह प्रचण्ड समूहमा खुलेर उभिए ।

प्रचण्डले नेपाललाई नेकपाको अध्यक्ष बनाएपछि साहले कार्यक्रममै असन्तुष्टि व्यक्त गरेका थिए । साहले दुई जना अध्यक्षको अभ्यास असफल भएको भन्दै एकल अध्यक्षमा जानुपर्ने माग गरेका थिए ।

प्रचण्डनिकट मानिएका साह मन्त्री बन्नुभन्दा करिब ३ घण्टाअघिसम्म अर्थात् गत शुक्रबार अपरान्ह प्रचण्डसँगै थिए । प्रचण्डसँग गफ गरिरहेका बेला साहकाे फोनले निरन्तर घण्टी हानिरहेकाे थियाे । छेउमै बसेका नेता जनार्दन शर्माले ठट्याैली पारामा भनिदिए, 'प्रभु कमरेडको फोन आइरहेको छ । मन्त्री बन्ने अफरसँगै उपहार हात पर्न लाग्यो कि कसाे !'

प्रचण्डनिकट एक नेताले शिलापत्रसँग भने, 'प्रभावकर कमरेडले यसाे भनेपछि उहाँ (प्रभु साह) अलि भिन्न देखिनुभयो ।'

शर्मा राेकिएनन्, 'कत्तै कित्ता परिवर्तन गर्नतिर त लाग्नुभएको होइन नि !'

ती नेताले भने, 'त्यसपछि मधेसका केही नेतासँग भेटघाट र राजनीतिक विषयमा छलफल गरेर आउँछु भनेर साहले प्रचण्डसँग बिदा मागेर बाहिरिनुभएको थियो । तर, उहाँ त बालुवाटार पुगेर मन्त्री पो बन्नुभएछ । सडक आन्दोलनबाट सिधै सत्तामा पुग्नुभयो ।’

ती नेताले थपे, ‘सञ्चारमाध्यममा प्रभु साह ओली समूहका मन्त्री बन्ने भनेर समाचार आएपछि अध्यक्ष प्रचण्डले नै फोन गर्दा उनको फोन अफ थियो । एकछिन त प्रचण्ड नै छक्क परे । साथीहरूलाई विवादले मन्त्री बन्ने मौका पो भएछ भनेर प्रचण्डले समेत ठटौलीसमेत गर्नुभयो ।’

लामो समयदेखि प्रचण्डलाई साथ दिँदै आएका साहले अरु केही नभई मन्त्रीको लोभमा ओली समूहमा लागेको र भोलि उनी प्रचण्डकै शरणमा आउने भनाइ छ । प्रचण्ड–नेपाल समूहबाट प्रदेश नम्बर २ को नेकपा इन्चार्ज बनाउने तयारीसँगै छलफलसमेत भइरहेका बेला साहले समूह परिवर्तन गरेको उनको भनाइ छ ।

श्रम, रोजगार तथा सामाजिक सुरक्षामन्त्री गौरीशंकर चौधरी पनि मन्त्री बनेका दिन प्रचण्ड–नेपाल समूहकै आन्दोलनमा थिए । आन्दोलनबाट एकाएक हराएका चौधरीले साेही साँझ श्रममन्त्रीको शपथ खाए । साहभन्दा पनि चौधरी मन्त्री बनेकाे विषयमा प्रचण्ड–नेपाल समूहमा ठूलो बहस नै भएको थियो ।

‘माइतीघर मण्डलाबाट हराएका चौधरी बालुवाटारमा पुगेर मन्त्री बने । प्रचण्ड–नेपाल समूहमा चौधरीलाई ओलीले कसरी बनाए भनेर बहस नै चलेकाे थियो’, उनले भने, ‘प्रचण्ड–नेपाल समूहमा रहेका चौधरीले पनि कार्की पार्टी प्यालेसमा चिया खाएर ओली समूहबाट मन्त्री बने ।’

साहले जस्तै चौधरीले पनि मन्त्री बन्नका लागि राजनीतिक धरातल भुलेको उनको भनाइ छ ।

साह र चौधरीको असर कति ?

प्रचण्ड–नेपाल समूहमा चौधरीभन्दा साहले समूह परिवर्तन गर्दा मधेसको राजनीतिमा असर पर्ने नेकपाका केही नेताहरू बताउँछन् । प्रदेश नम्बर २ मा माओवादीबाट निवार्चन जितेका साह त्यहाँका जनताले विश्वास गर्ने नेतामध्येमा पर्छन् । साह प्रदेश नम्बर २ मा माधव नेपालसँग राजनीतिक प्रतिस्पर्धा गर्न क्षमता राख्ने नेता हुन् ।

साहले पटक–पटक माओवादी कोटाबाट मन्त्री बन्ने आस गरेका थिए । तर, उनी मन्त्री बन्न असफल भएपछि पछिल्लो समय नेकपाको विवादमा मौन नै देखिए पनि अन्तिममा प्रचण्ड–नेपाल समूहको भेलामा गएका थिए ।

प्रचण्ड–नेपाल समूहमा आएर म तपाईंहरूकै हो भनेर सन्देश दिएका साहले मन्त्री बन्नकै लागि ओली समूह रोजेकाे आरोप उनीमाथि लागेको छ ।

नेकपा नेता पम्फा भुसालका अनुसार साहले आफ्नाे राजनीतिक धरातल नै बिर्सिएर ओली समूहको मन्त्री बनेका छन् ।

साह जुन समूहमा गए पनि उनको राजनीतिक पृष्ठभूमि भने प्रचण्डकै आसपासमा रहेर गरेका हुन् भनेर जोडिने भुसालले बताइन् । ‘साहले नेताभन्दा मन्त्री ठूलो ठान्नुभयो । त्यही भएर प्रचण्ड–नेपाल समूह छोड्नुभयो । उहाँलाई रौतहटका जनताले असल र कुशल नेता भनेर भोट दिएका थिए,’ उनले भनिन्, ‘राजनीति हो, भोलि फेरि उहाँ मूल घर फर्किनुहुन्छ । साहले प्रचण्ड–नेपाल समूहबाट सरकारको नेतृत्व गरेजस्तो भएको छ ।’

साहसँग भने रौतहटका जनता धेरै रुष्ट देखिएका छन् । ओली समूहबाट मन्त्री भएपछि साहको निवार्चन क्षेत्रमा विरोधसमेत भएको छ । यस्तै, चौधरीको पनि उनको निर्वाचन क्षेत्रमा विराेध गर्दै पुतला जलाइएकाे छ ।

प्रकाशित मिति: सोमबार, पुस १३, २०७७ ०८:२४