शेरधनले हटाएका अर्थमन्त्री आङ्बोकाे अन्तर्वार्ताः अल्पमतको मुख्यमन्त्रीले तुरुन्तै राजीनामा दिनुपर्छ

शेरधनले हटाएका अर्थमन्त्री आङ्बोकाे अन्तर्वार्ताः अल्पमतको मुख्यमन्त्रीले तुरुन्तै राजीनामा दिनुपर्छ

A+ A A-

मुख्यमन्त्री शेरधन राईले शनिबार आर्थिक मामिलामन्त्री ईन्द्र आङ्बोलाई पदमुक्त गरेपछि आइतबार नै मुख्यमन्त्रीविरुद्ध अविश्वासको प्रस्ताव दर्ता भएको छ । निकै अघिदेखि राजनीतिक किचलोमा फसेको प्रदेश १ सरकार नेकपा विभाजनपछि झन् समस्यामा छ । अविश्वासको प्रस्ताव दर्तासँगै मुख्यमन्त्री राई अल्पमतमा छन् । त्यो प्रस्ताव दर्ताको नेतृत्व पदमुक्त भएका आङ्बोले गरेका छन् । प्रस्तुत छ उनै आर्थिक मामिलामन्त्री आङ्बोसँग शिलापत्रकर्मी रमेश भारतीले गरेको कुराकानीको सम्पादित अंश:

तपाईंको नेतृत्वमा मुख्यमन्त्री शेरधन राईविरुद्ध अविश्वासको प्रस्ताव ल्याइयो । अबको मुभ के हो ?

हामी अहिले संसदीय दल र मुख्यमन्त्रीबाट शेरधन राईलाई हटाउन लागेका छौँ । राजनीतिक विचारका आधारमै हामी फरक भइसक्यौँ । त्यसले गर्दा उहाँ हाम्रो साथमा रहन सक्ने अवस्था छैन । तर, उहाँ विभिन्न षड्यन्त्र र छलछाममा लाग्नुभएको छ । आज अविश्वासको प्रस्ताव दर्ता गराउन लागिरहेका बेला बिहानै मन्त्रिपरिषद् बैठक बोलाएर अधिवेशन बोलाउनुभयो । अविश्वास प्रस्ताव छल्नका लागि यसो गरेको हो । पार्टी एकतापछि दलको विधानअनुसार हामीले निर्णय लिने हो । संसदीय दलको नेता नै मुख्यमन्त्री हुने विधानमा व्यवस्था छ । उहाँ दलमा चरम अल्पमतमा हुनुहुन्छ ।

प्रधानमन्त्री केपी शर्मा ओलीको कदम नेपालको राजनीतिमा सानो घटना होइन । जनमतको अपमान हो । त्यसलाई हामीले प्रष्टसँग भनेका छौँ, प्रतिगामी कदम हो । गैरसंवैधानिक कदम हो । तर, मुख्यमन्त्री राई प्रधानमन्त्रीको कदमको स्वागत गरिरहनुभएको छ । हाम्रो दृष्टिकोण फरक भएपछि हामी फरक त हुनैपर्ने थियो । यो कुराले आधारभूत रूपमै फरक भयौँ । उहाँले विचार फरक राख्ने मान्छेलाई टिक्नै दिनुहुन्न । हामी मन्त्रीलाई पनि त्यसै गर्नुहुन्थ्यो । त्यसैले उहाँविरुद्ध आउनुपर्ने त हाम्राे बाध्यता पनि हो ।

मुख्यमन्त्रीले बहुमत छ भनिरहनुभएको छ । कसरी हटाउनुहुन्छ ?

उहाँ संसदीय दलमा अल्पमतमा परिसक्नुभयो । कुन नैतिक धरातलमा टेकेर आफूलाई बहुमत भएको दाबी गरिरनुभएको छ, मैले बुझेको छैन । उहाँले बहुमत सावित गर्न सक्ने कुनै आधार पनि छैन । संख्या पनि छैन । संसदीय दलमा उहाँ अल्पमतमा परिसकेपछि उहाँलै नैतिक रूपमा राजीनामा दिनुपर्छ । राजनीतिक नैतिकता देखाएर संसदीय दलको नेता र मुख्यमन्त्री दुवै पदबाट तत्काल राजीनामा आउँछ भन्ने लागेको छ ।

सरकार बनाउन तपाईंहरूसँग पनि पूर्ण संख्या छैन । अब कस्तो समीकरण बनाउनुहुन्छ ?

हामी तत्काल अविश्वासको प्रस्ताव ल्याउने पक्षमा थिएनौँ । त्यसैले केही साथीहरू काम विशेषले काठमाडौंमा हुनुहुन्छ । केही साथीहरू कार्यक्षेत्रमा हुनुहुन्छ । त्यसैले अहिले संख्या ३७ मात्र भएको हो । हामी ४७ भन्दा बढी नै छौँ । जब हिजो मलाई आर्थिक मामिलामन्त्रीबाट पदमुक्त गर्नुभयो, त्यसपछि हामी अविश्वासको प्रस्ताव ल्याउन बाध्य भयौँ ।

याे पनि...

मसँग बहुमत छ, अविश्वासको प्रस्ताव सामना गर्न तयार छुः मुख्यमन्त्री राई (अन्तर्वार्ता)

समीकरण राजनीतिक आधारमा बन्ने हो । अहिलेको राजनीतिक घटनाक्रममा उहाँ मात्रै एक्लो हो । प्रदेश १ मा रहेका दलहरूमै पनि जसपा, कांग्रेस प्रधानमन्त्री केपी ओलीको कदमविरुद्ध आन्दोलनमा छन् । आधारभूत रूपमा उहाँसँग कोही पनि नजिक छैन । यो प्रदेशमा राजनीतिक रूपमा उहाँ एक्लो भइसक्नुभयो । त्यसैले हामी राजनीतिक आधारमा समीकरण बनाउँछौँ । अहिले नै त्यो प्रयासमा छैनौँ ।
अहिले हामी एकल रूपमा सरकार बनाउन सक्ने अवस्थामा पनि छौँ । तर, त्यसो पनि नगर्ने कि भन्ने छ । राजनीतिक विचार मिल्नेसँग साथै जोडिएर जान चाहिरहेका छौँ ।

खासमा तपाईंलाई पहिला नै हटाउने तयारी थियो रे । तपाईं बादलसँग निकट भएका कारण कतै ओली समूहमा आइहाल्ने हो कि भनेर मुख्यमन्त्रीको आशा थियो रे नि त ?

मुख्मन्त्री राई मलाई पहिला नै हटाउन चाहनुहुन्थ्यो । जब सरकार बन्यो, त्यसको छ महिनामा नै मैले सरकारबाट केही राम्रो काम गर्न थालेपछि उहाँ मलाई हटाउने खेलमा लाग्नुभएको थियो । तर, राजनीतिक कारणले उहाँले हटाउन सक्नुभएन । मुख्यमन्त्रीसँग मेरो कहिल्यै पनि कुरा मिलेको होइन । दल विभाजनसम्बन्धी अध्यादेश ल्याउँदा होस् वा संवैधानिक परिषद्सम्बन्धी अध्यादेश ल्याउँदा होस्, हरेक कदमको विरोध गरेको छु । र, प्रचण्ड–माधव समूहको पक्षधरता देखाइरहेको छु । मुख्यमन्त्री सुरुदेखि नै अल्पमतमा हो, काकतालीले मुख्यमन्त्री भएका मात्रै हुन् ।

प्रकाशित मिति: आइतबार, पुस १२, २०७७ १६:३०