प्रदेश २ मा प्रचण्ड-नेपाल समूहकै बहुमत, कुन समूहमा को सांसद ?

A+ A A-

प्रधानमन्त्री केपी शर्मा ओलीले प्रतिनिधिसभा विघटन गरेको कदमलाई प्रदेश-२ का सांसदले गुटअनुसार आ-आफ्ना ढंगले विश्लेषण गरेका छन् । पुष्पकमल दाहाल (प्रचण्ड)-माधव नेपाल समूहले प्रधानमन्त्री ओलीको कदमलाई असंवैधानिक, अलोकतान्त्रिक र तानाशाही शासनको रूपमा व्याख्या गरेका छन् भने ओली पक्षधर सांसद उनको बचाउमा उत्रिएका छन् ।

प्रधानमन्त्री ओलीको गैरसंवैधाानिक निर्णयले मुलुक अस्थिरताको दलदलमा फसेको र यसले सिंगो देश नै अप्ठ्योरो स्थितिमा पुगेको नेकपा सांसद दिलिप साहले बताए ।

‘प्रतिनिधिसभा विघटन गर्ने प्रधानमन्त्री ओलीको निर्णयले देशलाई बर्बादीतर्फ धकेलेको छ । यो लोकतन्त्र, संघीयता, गणतन्त्र र जनमत विरोधी निर्णय हो,’ उनले भने । साह पूर्वमाओवादी समूहका सांसद हुन् । तर, स्थायी कमिटी सदस्यसमेत रहेका नेकपा प्रदेश-२ का संसदीय दलका नेता सत्यनारायण मण्डल प्रधानमन्त्री ओलीको यो कदमको बचाउमा उत्रिएका छन् ।

ओलीविरुद्ध चौतर्फी घेराबन्दी गरेपछि निर्वाचनमा जाने निर्णय गरिएको र ताजा जनमतले जनादेश दिनेले सरकारको नेतृत्व गर्ने उनको भनाइ छ । नेता मण्डल समूहमा ओलीनिकट मानिन्छन् । केन्द्रबाट अहिलेसम्म प्रदेश सांसदलाई कुनै समूहबाट स्पष्ट निर्देशन नआइसके पनि प्रचण्ड-नेपाल र ओली समूहका नेताहरु सांसदलाई आ-आफ्नो पक्षमा तान्न सक्रिय भएका छन् ।

२३ जना प्रदेशसभा सदस्य रहेको प्रदेश २ मा प्रचण्ड-नेपाल समूह बलियो देखिन्छ । प्रदेशसभामा तत्कालीन एमालेबाट २१ र पूर्वमाओवादीबाट ११ जना सांसद छन् । नेपाल समूहका आठ र ओली समूहका १३ जना सांसद छन् ।

माओवादीबाट कुन्दनप्रसाद कुशवाहा, दिलिपकुमार साह, प्रमिलाकुमारी यादव, फुलियादेवी सदा, भरतप्रसाद साह, मोहम्मद समीर, रामकुमार यादव, रामचन्द्र मण्डल, जगतप्रसाद यादव, रुबीकुमारी कर्ण र ज्वाला कुमारी साह रहेका छन् ।

यस्तै, नेपाल समूहबाट अशोककुमार यादव, गोविन्दबहादुर न्यौपाने, मन्जुकुमारी यादव, शत्रुधन महतो, बेची लुंगेली, हसिमा खातुन, रविन्द्र बैठा र प्रमोदकुमार यादव रहेका छन् ।

त्यस्तै, ओली समूहबाट सत्यनारायण मण्डल, सुन्दरबहादुर विश्वकर्मा, त्रिलोकी प्रसाद, अनिता कुमारी यादव, किशोरी साह कमल, जगतारैन देवी, नागेन्द्र राय यादव, मनोजकुमार सिंह, शारदा थापा, लगनलाल चौधरी, सीता गुरुङ, दिल्लीप्रसाद उप्रेती र मदनसेन श्रीवास्तव रहेका छन् ।

यद्यपि केन्द्र, प्रदेश, जिल्ला र स्थानीय तहमा फरक किसिमको अन्तरविरोध रहेकाले तत्काल आँकलन गर्नु उपयुक्त नहुने सांसद रामचन्द्र मण्डलले बताए । ‘अहिले कसलाई कहाँबाट कस्तो अफर आउने, को कहाँ जाने भन्न सकिन्न । केही दिनपछि मात्र वास्तविक कुरा यकिन गर्न सकिन्छ,’ उनले भने ।

प्रकाशित मिति: बुधबार, पुस ८, २०७७ १२:२०