कम्युनिस्टको सरकार कमाउनिस्ट भयो : सुरेन्द्र भण्डारी

A+ A A-

नेपाली कांग्रेसका नेताहरूले वर्तमान सरकार अधिनायकवादतर्फ अघि बढेको भन्दै चर्को आलोचना गरेका छन् । कांग्रेस रूपन्देहीले सोमबार भैरहवामा गरेको सरकारविरोधी प्रदर्शनमा बोल्ने अधिकांश नेताहरूले सरकार जनताको समस्याभन्दा पनि भ्रष्टाचारमा लिप्त भएको भन्दै अधिनायकवादतर्फ सरकार लागेको बताए ।

कांग्रेस केन्द्रीय सदस्य सुरेन्द्र भण्डारीले कम्युनिस्टको सरकार कमाउनिस्ट भएको आरोप लगाए । उनले भने, ‘जताततै भ्रष्टाचारले जरो गाडेको छ । विमानदेखि महामारीबेला औषधि खरिद गर्दासमेत मन्त्रीहरूले भ्रष्टाचार गरेका छन् । विडम्बना तिनलाई कारबाही हुँदैन, उल्टै प्रधानमन्त्रीले संरक्षण गर्नुहुन्छ ।’

भण्डारीले लामो संर्घषबाट प्राप्त उपलब्धि नै खतरामा परेको भन्दै यो सरकारले उपलब्धिको रक्षा गर्न नसकेको जनाए । ‘सरकार भ्रष्टाचारमा चुर्लुम्म डुबिसक्यो नै देश पनि खतरामा पर्‍यो, हामीले ल्याएको व्यवस्थाविरुद्ध आवाज उठिसके । त्यसैले व्यवस्थाको रक्षा गर्न, मुलुक बचाउन र भ्रष्ट सरकारलाई सही दिशामा काम गर्न कांग्रेसले मुलुकभर खबरदारी गरेको हो’, उनले भने ।

सरकारले बलात्कार, दण्डहीनता र व्यवस्थाविरुद्ध प्रसय हुने काम गरिरहेको भण्डारीको आरोप छ । ‘यो सरकार त आफैँ पतन हुन्छ नै । यसैका कारण हाम्रो व्यवस्था नखोसियोस् भनेर कांग्रेस चिन्तित बनेको हो’, उनले भने । आगामी निर्वाचनपछि कांग्रेस पहिलो शक्ति बन्ने र नेकपा विलय हुने उनको दाबी छ ।

सरकारबाट कोही पनि सन्तुष्ट नरहेको बताउँदै भण्डारी सरकारले कर मात्रै थुपारेर काम गर्ने उद्योगी व्यवसायीलाई हत्तोसाहित बनाएको बताए । उनले पर्दा पछाडिबाट पूर्वराजाले अहिलेको व्यवस्था फेर्छु भनेर आन्दोलन गराउनु दिवा स्वोप्ना मात्रै भएको जनाए ।

कांग्रेस नेता एवं संघीय संसद्‌का सार्वजनिक लेखा समिति सभापति भरतकुमार शाहले सरकारमा व्याप्त भ्रष्टाचारकै कारण जनतामा वितृष्णा पैदा भएको बताए । ‘यसैको परिणामस्वरूप सडकमा राजावादीको आन्दोलन सुरु भएको छ । ओलीजीले अझै पनि आँखा खोल्नु भएन भने परिणाम अर्कै नआउला भन्न सकिँदैन’, उनले भने, ‘यो सरकारले जनहितमा यस्तो काम गर्‍यो भन्ने केही छैन । जनतामा जुन अपेक्षा थियो, त्यो सबै निराशामा पैदा भयो ।’

राष्ट्रपतिले आफ्नो भूमिका बिर्सेर नेकपामा नेताजस्तो भएर काम गरिरहेको शाहले आरोप लगाए । उनले वर्तमान राष्ट्रतिकै कारण यसको गरिमा घटिरहेको दाबी गरे । मल नपाएर जनता आजित हुने, महामारीमा औषधिसमेत नपाउने अवस्था आउनु निकै दुर्भाग्य भएको शाहको भनाइ छ । कांग्रेस सधैँ जनताको साथमा रहेको बताउँदै उनले जस्तोसुकै अवस्थामा पनि भ्रष्ट सरकारको विरोधमा उत्रिने बताए ।

कांग्रेस नेता एवं संघीय सांसद प्रमोदकुमार यादवले वर्तमान सरकारले जनहितमा कुनै पनि काम गर्न नसकेको आरोप लगाए । उनले जिल्लावासी कृषिमन्त्री भएर पनि यहाँका किसानले समयमै मल नपाउनु दुःखद् भएको बताए । समयमै मल नदिने कृषिमन्त्री घनश्याम भुसाललाई अब रुपन्देही प्रवेशमा रोक लगाउनुपर्ने बताए ।

विरोधसभामा बोल्दै कांग्रेस जिल्ला सभापति अब्दुल रज्जाक गद्दी, पूर्वसभापति रामचन्द्र ढकाल, पूर्वसांसद इस्तियाक अहम्मद खान, जिल्ला सचिव रामकृष्ण खाँण, क्षेत्र नं. १ का क्षेत्रीय सभापति हीराबहादुर खत्री, सिद्धार्थ उद्योग वाणिज्य संघका अध्यक्ष कुलप्रसाद न्यौपानेलगायतले कम्युनिस्ट सरकार सामन्ती, भ्रष्टाचारी, देशद्रोही, नैतिकहीन भएको आरोप लगाए । कांग्रेस नेताले मुलुकभर भइरहेको राजावादीको प्रदर्शनको पनि चर्को आलोचना गर्दै प्रजातन्त्र, लोकतन्त्रमा धावा बोल्ने जोकोहीलाई कांग्रेसले ठेगान लगाउने दाबी गरे ।