पोडकास्ट: के प्रतिपक्ष देखिन र सुनिन थालेको हो ?

Shilapatra News · के प्रतिपक्ष देखिन र सुनिन थालेको हो?

A+ A A-

तपाईंहरूले हेरिरहनुभएको छ, देखी पनि रहनुभएको छ । कांग्रेस नेता/कार्यकताहरूले सामाजिक सञ्जालमार्फत प्रचार गरिरहेका छन्- 'भ्रष्टाचार, अन्याय, बेथिति र प्रतिगमनका विरुद्ध जुटौँ, मंसिर २९ गते आफ्नो मुकाममा जाऊँ ।'

कांग्रेस सरकारका विरुद्धमा ७७ जिल्ला मुकाममा शक्ति प्रदर्शन गर्ने प्रयासमा छ । पछिल्लो पटकको प्रमुख प्रतिपक्षको भूमिकापछि राष्ट्रिय मुद्दा लिएर सडकमा निस्किनसकेको कांग्रेस सडकबाटै आफ्नो शक्ति देखाउन खोज्दै छ । जसका लागि शुक्रबार १० नारा तय गरेको छ, शीर्ष नेताको सम्बोधन क्षेत्र पनि तोकेको छ ।

जनताका थुप्रै गुनासो नसुनेको, नसुनाएको र आफ्नो भूमिका ननिभाएको आरोप खेपेको कांग्रेसले १७ मंसिरमा जब आफ्ना नेता रामचन्द्र पौडेल पुल उद्घाटनका क्रममा आफ्नै जिल्लाबाट प्रकाउ परे, अनि तातेको देखिन्छ । सदनमा समेत प्रभावकारी भूमिका ननिभाएको आरोप कांग्रेसले नखेपेको होइन, सडकमा कसरी दबाब दिन सक्छ, हेर्न बाँकी नै छ ।

तपाईंलाई याद होला, जब सरकारले सदनबाट चिकित्सा शिक्षा विधयेक पारित गर्‍यो, तब कांग्रेस झस्किएको थियो । सरकार पेलेरै अघि बढ्ने भयो भन्नेर तर्सिएको पनि ।

चिकित्सा शिक्षा विधेयक पारितपछि केही दिन सदनमा विरोध जनाए पनि कांग्रेसका माग सरकारले पूरा त गरेन । तर, उसले सदन खुलाउने निर्णय भने लियो ।

२० माग २०७५ मा कांग्रेस नेता गगन थापाले अर्को दिनबाट कांग्रेस सडक र सदनमा देखिने बताएका थिए । सरकारले प्रतिपक्ष देखिएन र सुनिएन भनेको अवस्थामा उपस्थिति देखाउने उनको भनाइ थियो । करिब २ वर्षपछि कांग्रेस १० नाराका साथ सडकमा आउँदै छ । यसै समयमा कांग्रेसले लामो समयदेखि बन्द रहेको सदन खुलाउन पनि मूलभूत माग राखेको छ ।

सदन खुलाउन दबाब दिएको र सडकमा जनताको समस्या लिएर जान थालेको कांग्रेस के देखिन र सुनिन थालेको हो त ?

सडकमा आउँदै गर्दा कांग्रेस नेता कार्यकताले रट्दै आएको सर्वसत्तावादी सरकार उसको मूल नारा छ । तर, कुन-कुन कामले सरकार सर्वसत्तावादी देखियो ? जनतालाई चित्त बुझाउने गरी बोल्न सक्छ वा सक्दैन, हेर्न बाँकी छ ।

कांग्रेस प्रवक्ता विश्‍वप्रकाश शर्माले भन्दै आएका छन्- प्रतिपक्ष देखिनका लागि ढुंगा-मुढा गर्नैपर्छ, बन्द हड्ताल गर्नैपर्छ भन्ने छैन । जिम्मेवार प्रतिपक्षको भूमिका निभाउन कांग्रेस चाहन्छ ।

शर्माले तनहुँ घटना, सर्वसत्तावादी चिन्तन एवं भ्रष्टाचारविरुद्ध जनआवाज बुलन्द गर्न सडकमा आउनुपरेको बताएका छन् ।

सुतेर बसेको भनिएको कांग्रेस झस्केर सडकमा उपस्थिति देखाउने प्रयास गरिरहेको देखिएको छ । तर, सडकमा आउनुपर्ने कारण कारण र औचित्य पुष्टि गर्न सक्छ वा सक्दैन ?

प्रकाशित मिति: शुक्रबार, मंसिर २६, २०७७ १९:१३