फरहदवा हत्याकाण्ड : आरोपित पूर्वमन्त्रीका भाइ मेहताव को हुन् ?

A+ A A-

रौतहटको राजपुर फरहदवामा बम विस्फाेटपछि घाइतेलाई जिउँदै इँटाभट्टामा हालेर मारेको अभियोगमा पूर्वमन्त्री मोहम्मद अफताव आलमका भाइ महताबलाई प्रहरीले पक्राउ गरेको छ । पूर्वमन्त्री अफताव पक्राउ परेको एक वर्षपछि भाई मोहम्मद मोहम्मद मेहताव २ नम्बर प्रदेश प्रहरीको नियन्त्रणमा परेका हुन् ।

पहिलो संविधानसभा चुनावको पूर्वसन्ध्यामा आलमका काका शेख इद्रिसको गोठमा बम बनाउँदाबनाउँदै विस्फाेट भएको थियो । विस्फाेटनबाट घाइते त्रिलोकप्रताप सिंह र ओसी अख्तरलाई आलम परिवारकै इँटाभट्टामा हालेर मारेको अभियोग छ ।

गाैरकाे मुख्य सडकबाट घाइतेलाइ जिउँदै जलाएकाे राजापुर फरहदवा जाने बाटाे

यही अभियोगमा रौटहट प्रहरीले पूर्वमन्त्री अफतावलाई गत वर्षको २६ असोजमा रौतहटबाट पक्राउ गरेको थियो । उनी अहिले पुर्पक्षका लागि थुनामा छन् । उनका भाइ भने फरार थिए । अफतावको आपराधिक यात्रामा उनका भाइको बलियो भरथेग थियो ।

१९ असार २०६० मा रौतहटको राजपुर भेडियाहीका देवा पटेल (हरदेव पटेल)को आँखामा एसिड छ्यापेर दुवै आँखाको ज्योति गुमाइदिएका थिए । युद्धरत माओवादीका कार्यकर्ता थिए, पटेल त्यसबेला । युद्धविराम भएकाले खुला भएका बेला एक प्रहरीसँग वादविवाद हुँदा मेहतावले प्रहरीकै सहयोगमा एसिड छ्यापेको यो प्रतिनिधिसँग उनकै घरमा भेट्दा पटेलले बताएका थिए ।

‘पिप्राभगवानपुरदेखि राजपुर फर्कंदै थिएँ । राजपुर प्रहरी कार्यालयका असई जागेश्वर ठाकुरसँग बजारमा भनाभन हुँदै ठेलमठेल भयो,’ झोलुङ्गे खटियामा बसेका पटेलले भने, ‘असईले मेरा दुवै हात समाते । त्यहीँ रहेका मेहतावले आँखामा एसिडले छर्किदिए ।’

त्यसपछि उनको संसार अन्धकार छ । देब्रे आँखा एसिडले छ्याप्पै भिजेको थियो भने दाहिनेमा अलि कम लागे पनि धमिलो मात्र देखिन्छ । देब्रे कामै नलाग्ने भयो ।

त्यति मात्र होइन, युद्धविरामका बेला समातिएका पटेल हातहतियार तथा खरखजाना मुद्दामा साढे दुई वर्ष जेल बसे । प्रहरी प्रशासनको सहयोगमा मेहतावले आफूलाई केही पहिलाको घटनाको प्रतिशोध लिएको पटेलको दाबी छ ।

२०५६ सालमा आलम परिवारको घरमा डकैती र आगजनी भएको थियो । पटेलको अगुवाइमा माओवादीले उक्त घटना गराएको आशंकामा मेहतावले आफूमाथि बदला लिएको हुन सक्ने पटेलको अनुमान छ । तर, आफू मेहतावको घरमा आगजानी भएको दुई वर्षपछि अर्थात् २०५८ सालमा माओवादीमा सामेल भएको पटेलको जिकिर छ ।

पाँच सन्तानका पिता पटेल अहिले परिवारको जीवन गुजार्नै समस्यामा छन् । ‘साथीहरूले पेटी ठेकेदार बनाएका छन् । फिल्डमा नगई अलिअलि काम गर्छु । धुलोले काम गर्नै सक्दिनँ । आँखा बल्झिहाल्छ,’ उनी भन्छन्, ‘साथीहरूले माया गर्न छाडेपछि मेरो परिवारको बिचल्ली हुनेछ ।'

मेहतावको अवैधानिक कार्य यतिमै सीमित छैन । कुनै समय अस्थायी शिक्षक रहेका मेहताव स्थायी हुने परीक्षामा अर्कैलाई जाँच दिलाउनसमेत लगाएका थिए । ३ असार २०६२ मा शिक्षक सेवा आयोगले स्थायी शिक्षकका लागि आन्तरिक खुला परीक्षा लिएको थियो । परीक्षामा मेहतावको नाममा अर्कै शिक्षकले जाँच दिएको प्रहरीले फेला पार्‍यो । गौरको जुद्ध माविमा भएको परीक्षामा मेहतावको सट्टा हरेन्द्रप्रसाद यादवले जाँच दिइरहेका थिए ।

मेहतावलाई प्रहरीले २१ असारमा समातेर सरकारी कागजात कीर्ते गरेको अभियोगमा मुद्दा चलायो । १० दिन हिरासत बसेका उनी धरौटीमा छुटे । त्यसको दुई वर्षपछि जिल्ला अदालत रौतहटले १५ दिन कैद र ५ सय रुपैयाँ जरिवानाको फैसला सुनाएकाे थियो । १० दिन हिरासतमा रहेको लागत कटाउँदा उनी अझै ५ दिन जेल बस्न बाँकी छ ।

२०६० देखि २०६२ सम्म रौतहट प्रहरी प्रमुखको जिम्मेवारी सम्हालेका पूर्वप्रहरी नायब महानिरीक्षक (डीआईजी) केशबहादुर शाहीका अनुसार जाँचमा मात्र होइन, पढाउनसमेत मेहतावले खेताला शिक्षक राख्ने गर्थे । एसएलसी परीक्षामा चिट चोर्नु सामान्य मानिन्थ्यो । शाही भन्छन्, ‘एसएलसीमा कहीँ पास नभए रौतहटबाट जाँच दिए पास होइन्छ भनेर जिल्ला बदनाम थियो । यो सबै बदनामीमा मेहताव जोडिएका थिए ।’ तर, प्रमाण भेटिएको एउटा घटनामा मात्र मुद्दा चलाइएको शाही सम्झन्छन् ।

प्रहरीले परीक्षालाई मर्यादित तुल्याउन खोजेपछि राजनीतिक पार्टीमा संलग्न शिक्षकले गरेको विरोधको अगुवामा मेहताव नै थिए । ‘उनी आफू पढाउँदैनथे । खेताला शिक्षक राख्थे, ‘शाही सम्झन्छन्, ‘मैले शिक्षकहरूले खेताला लगाएको यहीँ सुनेको हुँ ।’

बम विस्फोटनकाे घटनामा जोडिएपछि फरार मेहतावले आफ्ना दाइ अफताव पक्राउलाई साम्प्रदायिक स्वरुपसमेत दिन खोजेको त्यसबेला रौतहट प्रहरी प्रमुख रहेका प्रहरी उपरीक्षक (एसपी) भूपेन्द्र खत्री बताउँछन् । मेहतावले भारतमा आश्रय लिएर नेपालका मुस्लिम समुदायलाई उचाल्न खोजेका थिए । त्यो सम्भव नभएपछि भारतमै लुकेका प्रहरीले पक्राउ गरेको छ ।

यी दाजुभाइसहित १० जनाविरुद्ध प्रहरीले लगाएको अभियोग जिल्ला अदालत रौतहटमा दर्ता छ । अभियोग प्रमाणित भएमा विस्फाेटक पदार्थ, कर्तव्य ज्यान र ज्यान मार्ने उद्योगका कसुरमा उनीहरूले ३२ वर्षकाे जेल सजाय भोग्नुपर्नेछ ।

प्रकाशित मिति: सोमबार, मंसिर २२, २०७७ २१:५२