Podcast Interview : नेतृत्व हस्तान्तरण अहिलेको आवश्यकता हो, दुवै अध्यक्षले याे कुरा बाेलिसक्‍नुभयाे

Podcast Interview : नेतृत्व हस्तान्तरण अहिलेको आवश्यकता हो, दुवै अध्यक्षले याे कुरा बाेलिसक्‍नुभयाे

Shilapatra News · नेतृत्व हस्तान्तरण अहिलेको आवश्यकता हो । ओलीजी र प्रचण्डजीले पनि भनिसक्नुभयाे

A+ A A-

शिलापत्र पोडकास्ट अन्तर्वार्ता : उपप्रधानमन्त्री तथा नेकपा सचिवालय सदस्य ईश्वर पोखरेलसँग नेकपा किचलाेकाे सेराेफेराेमा रहेर शिलापत्रकर्मी बसन्त बस्नेतका प्रश्नहरू

प्रधानमन्त्री किन हिजोको स्थायी कमिटी बैठकमा नआउनुभएको ?

उहाँले सचिवालयमै प्रचण्डको अभियोगपत्रबारे बोलिसक्नुभएको थियो । वास्तवमा त्यो प्रस्ताव नभएर अभियोगपत्र थियो । त्यसप्रति प्रधानमन्त्रीको गम्भीर आपत्ति छ । कुनै प्रस्ताव ल्याउने हो भने विधानतः दुवै अध्यक्षको परामर्शमा आउनुपर्छ । प्रक्रियाको हिसाबले पनि त्यो उचित छैन । कन्टेन्ट पनि आपत्तिजनक छ । राज्यको कानुनले समेत दण्डित गर्नुपर्छ भन्ने तहका आरोप छन् । प्रधानमन्त्रीले त्यसलाई खारेज गर्छु भन्नुभएको छ ।

यही कुरा भन्नलाई पनि प्रधानमन्त्री स्थायी कमिटीमा आए हुँदैन ?

यसको जवाफ त १३ मंसिरमै उहाँले दिइसक्नुभएको छ । हिजो पनि उहाँले बैठकलाई चिट्ठीका रूपमा दिनुभयो । मैले नै वाचन गरेँ । जरुरत परे स्थायी कमिटीमा आएरै त्यो भन्नुहुन्छ ।

२८ मंसिरको बैठकमा उहाँ आउनुहुन्छ ?

उहाँ आउन सक्नुहुन्छ ।

केन्द्रीय कमिटी बैठकमा पनि आउनुहुन्छ ?

अहिले स्थायी कमिटी बैठक तय गरेका छौँ । त्यसमा आउन सक्नुहुन्छ । त्यहीँ बसेर कुरा गर्नुहुन्छ ।

नेकपा विवादको समाधान कहाँ गएर भेटिएला ?

जे-जे कारणले विवाद उठेका छन् । आधारभूत रूपमा ती विवादलाई सम्बोधन गरेपछि समाधान हुन्छ ।

त्यो भनेको २६ भदौको सहमतिमा फर्किने भन्नुभएको ?

त्यो एउटा आधार हो । असारदेखि भदौसम्म त्यति लामो स्थायी कमिटी बसेर सर्वसम्मतिले निर्णय गरिएको छ । १५ वटा विषयमा छलफल गरेर के-के गर्ने टुंगो गरिएको छ । दुईवटा अध्यक्षको काम विभाजन गरिएको छ । त्यो किटान हुँदाहुँदै डेढ महिना नबितीकन यो विवाद आउनुलाई हामीले स्वाभाविक मानेका छैनौँ । हिजो बैठकमा पनि अनौपचारिक छलफल गर्ने भनेका छौँ । त्यसले एकअर्काको भनाइ बुझ्न, सुन्न सजिलो हुन्छ ।

प्रचण्ड–माधव नेपाल पक्ष अब पार्टी र सरकारको शीर्ष दुईमध्ये एक पद प्रधानमन्त्रीले छाड्नुपर्छ भन्दै छ नि ?

अहिलेसम्म बैठकमा त्यो औपचारिक रूपमा प्रवेश गरेको छैन । तर, बाहिर चैँ सुनिएको छ । ओलीले आफ्नो पोजिसन स्पष्ट राख्नुभएको छ- 'म महाधिवेशनपछि अध्यक्ष हुने होइन, चुनावपछि प्रधानमन्त्री हुने होइन ।' चैतमा महाधिवेशन गर्ने निर्णय त यसअघि नै भइसकेको छ । त्यसपछि जो अध्यक्ष हुने हो, बने भइहाल्यो भनेर उहाँले भनिसक्नुभएको छ । आम चुनावपछि प्रधानमन्त्री हुनेले पनि चुनाव पर्खिने । जनादेश पनि यही हो, पार्टीका कार्यकर्ताहरूको भनाइ पनि यही हो ।

त्यस बेलासम्म पार्टीको काममा प्रचण्ड, सरकारको काममा ओली केन्द्रित हुने भन्ने २६ भदौको त्यो सहमति कहाँनेर खण्डित भयो ?

२६ भदौको सहमतिको अर्थ कोही एउटा कार्यकारी र अर्को सेरेमोनियल भन्ने होइन । दुवै कार्यकारी हुन् । एउटा कार्यकारी अध्यक्ष सरकारमा, अर्को कार्यकारी अध्यक्ष पार्टीका काममा केन्द्रित हुने भनेको हो । दुवैले आ–आफ्ना काम गर्दा परामर्श गर्ने भनिएको हो ।

त्यै त, प्रचण्डले भनिरहनुभएको छ, 'परामर्श भएन ओलीबाट ।'

परामर्श भएन भन्ने मलाई लाग्दैन । सबैभन्दा बढी उहाँहरूकै भेटघाट हुने गर्छ । राजदूत प्रस्ताव, मन्त्रिपरिषद् पुनर्गठन आदिबारे उहाँहरूबीच मज्जाले कुरा भएको छ ।

‘सचिवालयमै बसेर आफ्नाेबारे जेपायो त्यही बोलेको’ भनेर प्रचण्ड तपाईंसँग निकै रिसाउनुभएछ । अस्ति खुमलटार निवासमा यसबारे के कुरा गर्नुभयो ?

म सचेतनतापूर्वक सबै नेतालाई सम्मान गर्छु । हाम्रा दुइटा अध्यक्षलाई त्यही ढंगले आदर गर्छु । त्यसमा २०–१९ छैन । मैले अध्यक्ष प्रचण्ड या ओलीबारे त्यस्तो अनुचित बोेलेको छैन । मर्यादाका सीमा ख्याल गरेर बोलेको छु । प्रचण्ड कमरेडले अस्तिको भेटमा भन्नुभयो, ‘तपाईंले मनबाटै कुरा गर्नुभयो । म खुसी छु ।’ त्यसैले बाहिर चित्रण गरिएजस्तो हाम्रो सम्बन्ध बिग्रेको छैन ।

त्यस्तो त प्रचण्डले सप्पैलाई भन्दिनुहुन्छ... ।

(लामो हाँसो) होइन, मैले त उहाँले मसँग भनेको कुरा पो गरेको । बाहिर एक ढंगले कुरा गरिरहँदा पनि मलाई तपाईं त्यस्तो मान्छे होइन भन्ने लाग्छ भनेर उहाँले भन्नुभयो ।

पार्टी जनताको जनवादमा गइसक्यो, तपाईंहरू किन जबज ब्युँताउन लाग्नुभएको ?

एकता गर्दैगर्दा हामीले दुवैका राजनीतिक कार्यक्रमहरूको चर्चा गरेका छौँ । जनताको बहुदलीय जनवाद, एक्काइसौँ शताब्दीको जनवाद त्यसमा परेका छन् । जनताको जनवादमा सूत्रवद्ध गर्दा जबजका कुरा पनि परेका छन् । अहिले एकता गरिसकेपछि जनताको जनवादमा जाऔं भनिएको छ । जबज र एशजलाई महाधिवेशनमा पुग्दा टुंगो लगाउने भनिएको छ । उहाँहरूले जनयुद्ध दिवस मनाउने, हामीले जबजको कुरा नगर्ने भन्ने हुँदैन । यो महाधिवेशसम्म टुंगो लाग्ने कुरा हो । जनताको जनवादको विचारबाट सूत्रीकृत भएरै त्यहाँसम्म जाने भन्ने कुरा हो ।

तपाईं माधव नेपाल, झलनाथ खनाल, वामदेव गौतमलाई तीन दशकभन्दा लामो समयदेखि जान्नुहन्छ । किन अहिले उहाँहरू ओलीको विरोधमा एक स्वरले खनिनुभएको छ ?

यो मैले पनि बुझ्न पाएको छैन । उहाँहरू खनिनु नै भएको त होइन होला । कतिपय कुरामा आलोचनात्मक हुनुभएको छ । यसलाई राम्रोसँग बुझौँला, सुनौँला । केही कारण त राम्रोसँग नदेखिने, निकै देखिने विषय पनि होलान् । हामी बहस छलफल गर्दै जाऔँला ।

ओली, प्रचण्ड दुवैले अब नयाँ पुस्तामा नेतृत्व सुम्पिने कुरा गर्नुभयो नि ?

ओलीले पटक-पटक यो भन्ने गर्नुभएको छ । म एउटै कक्षा दोहोर्‍याएर पढ्दिनँ पनि भन्ने गर्नुहुन्छ । अस्ति १३ गते प्रचण्डजीको आरोपको खण्डन गर्ने क्रममा पनि उहाँले त्यसो भन्नुभएको छ । चाँडो महाधिवेशन गरेर, अझ पुस, माघमा नै टुंगो लगाए पनि हुन्छ भन्ने गर्नुभएको छ । हिजो प्रचण्डजीले स्थायी कमिटीमा बोल्दाखेरी ओलीले भन्नुभएको कुरालाई नै हेक्का राख्दै बोल्नुभएको हो भन्ने लागेको छ । ठीकै छ, त्यो त अब... । नेतृत्व हस्तान्तरण अहिलेको आवश्यकता हो । नेताहरूले सुझबुझपूर्ण ढंगले नै त्यो बोल्नुभएको होला । त्यो त राम्रो कुरा हो ।

अन्तिम प्रश्न, जनताले कहिले नेकपाको किचलोका समाचारबाट मुक्त भएर राष्ट्रिय समस्या समाधानमा सरकार केन्द्रित भएको सुन्न पाउँछन् ?

सरकार राष्ट्रिय समस्या समाधानमा सक्दो केन्द्रित छ । तर, सत्तासीन पार्टीभित्रका अनुचित, अनावश्यक किचलोले त्यसलाई बाधा पारेको छ । गरिरहेको काम पनि ओझेल परेका छन् । हामी जतिसक्तो छिटो त्यसलाई मत्थर बनाउनेछौँ ।

प्रकाशित मिति: सोमबार, मंसिर २२, २०७७ १४:२१