अनि विशालले जन्माए 'कमेडी च्याम्पियन'

A+ A A-

‘कामले मान्छेलाई सफलता दिन्छ वा सफल हुने बाटोमा इट्टा थपिदिन्छ ।’

यो भनाइ निर्देशक विशाल भण्डारीमा लागू हुन्छ । विभिन्न चरणमा भोग्नु परेको असफलताले नै उनलाई सफलताको बाटो डोहोर्‍यायो । अन्तत: उनले सफलता हात पारे ।

उनले नेपालमा कमेडी रियालिटी शो ‘कमेडी च्याम्पियन’ जन्माए । यसै रियालिटी शोबाट विशालको परिचय साच्चै नै विशाल बनेको छ । उनको प्रशंसा गर्नेहरूको जमात बढेको छ ।

०००

विशाललाई सानो उमेरदेखि नै कलाकारितामा शोख थियो । त्यसमा पनि गायक उनको पहिलो रोजाइ थियो ।

२०६१ साल तिर विशालले पहिलो संगीतिक एल्बम निकाले । तर, विशाललाई पहिलो गाँसमा नै ढुंगा पर्‍यो । पहिलो एल्बम नै ‘डिजास्टर’ भइदियो ।

विशाल भन्छन्, ‘आफ्नो वरपरका साथीले राम्रो भन्देको भरमा एल्बम निकाल्ने आँट गरेको थिए । तर, त्यो समय म अपरिपक्क थिए । त्यसैले पनि असफल भइयो ।’

एल्बम फ्लप भयो । तर, सोही एल्बमको प्रचारका लागि ‘च्यानल नेपाल’ पुगेका विशाललाई सोही टिभीमा एउटा कार्यक्रम चलाउने अफर आयो । विशालले पाएको अवसरलाई गुमाउन चाहेनन् र काम गर्न तयार भए ।

‘गायक र त्योभन्दा अगाडि गरेको एउटा व्यवसायबाट मैले झण्डै साढे ६ लाख फिर्ता नहुने गरी डुबाइसकेको थिएँ’, विशाल भन्छन्, ‘शून्य जस्तै भएको समयमा आएको अफरलाई मैले नकार्ने कुरै भएन नि ।’

च्यानल नेपालमा विशालले निकै मिहिनेत गरे । उनले भिजे भएर ‘हिँड्दाहिँड्दै’, ‘म्युजिक एण्ड मोर’, ‘फ्रेस रिलिज’ जस्ता चर्चित कार्यक्रम चलाउने गर्थे । एउटा यस्तो समय पनि थियो- एक सातामा विशालले ८ वटासम्म कार्यक्रम चलाए ।

भिजे बनेर काम गर्दा विशाल सधैँ दोस्रो श्रेणीमा रहे । त्यो समय सुरजसिंह ठकुरी, आसिफ शाहलगायतका भिजेहरू पहिलो श्रेणीमा थिए । विशाल पहिलो हुन सकेनन् । जुन कुराले विशाललाई घोचिरहेको थियो ।

सोही समय विशाललाई म्युजिक भिडियोबाट अफर आयो । तर, पहिलो भिडियोमा नै निर्देशकीय जिम्मा लिने आँट विशालले गर्न सकेनन् । विशाल भन्छन्, ‘थाहा नपाएको दुई काम गर्दा म डुबिसकेको थिएँ । त्यसैले मैले काम गरिहाल्ने आँट गरिनँ ।’

विशालले भिडियोको लागि टिम बनाए । जसमा निर्देशक मनोजरत्न शाही र क्यामेराम्यान अमृत सुनार थिए । उनीहरूले एकसाथ झण्डै डेढ दर्जन भिडियोका काम गरे ।

अब भने विशाललाई आफैँ निर्देशन गर्ने आँट आयो । सतिश महर्जनको ‘भैगो भुलिदिन्छु’ बोलको गीतबाट विशाल आफैँ निर्देशक बने ।

पहिलो भिडियोमा नै विशाललाई घाटा लाग्यो । एक दिन गर्ने भनिएको सुटिङ पानी परेकाले दुई दिन गर्नुपर्‍यो । जसका कारण विशालले आफ्नै खल्तीको पैसा हालेर काम गर्नुपर्‍यो ।

भिडियो आएपछि विशालले राम्रो प्रतिक्रिया पाए । धेरैबाट प्रशंसा पाए । विशाल आफैँ पनि सन्तुष्ट थिए, ‘आफैँ लिडर भएर गरेको पहिलो काम राम्रै बनेछ है !’

तर, उक्त भिडियोपश्चात् विशालले डेढ वर्ष भिडियोमा काम पाएनन् । कारण थियो- च्यानल नेपालको मनोरञ्जनात्मक कार्यक्रम छोडेर नेपाल वानमा राजनीतिक कार्यक्रम चलाउनु ।

विशालले नेपाल वानमा ‘फेस द नेसन’ नामक कार्यक्रम चलाउँथे । जसमा उनले राजनीतिक व्यक्तिहरूसँग अन्तर्वार्ता गर्नुपर्थ्यो । उनले त्यो समय केपी शर्मा ओली, विजयकुमार गच्छदार, रामशरण महतलगायत नेतासँग अन्तर्वार्ता गरेका थिए ।

तर, उक्त कार्यक्रम गर्दा विशाल आफैँ सन्तुष्ट भने थिएनन् । सानो उमेरको फुच्चेले राजनीतिका हस्तीहरूसँग गरेको चर्को प्रश्नले विशाल आफैँलाई घोचिरह्यो । विशाल भन्छन्, ‘राति कार्यक्रम हेर्दा मजस्तो फुच्चेले त्यो स्क्रिनमा प्रश्न गरेको सुहाएको छैन जस्तो लाग्थ्यो । सोही कारण देखाएर मैले त्यहाँ जागिर छोडेँ ।’

त्यो समय विशाललाई ‘नेसनल टिभी’बाट इन्टरटेनटमेन्टकै लागि अफर आयो । नेशनल टिभीमा मनोरञ्जनको राम्रो टिम बनेको थियो । जसमा सन्दीप क्षेत्रीदेखि रीमा विश्वकर्मासम्म थिए ।

उनीहरूको त्यहाँ राम्रै चलिरहेको थियो । तर, केही समयपछि नेशनल टिभी पनि न्युज च्यानलको रूपमा परिवर्तन भयो ।

विशाल भन्छन्, ‘जे कारण देखाएर नेपाल वानबाट जागिर छोडेको थिएँ, नेशनल टिभीमा पनि त्यही काम गर्नुपर्‍यो । केही समय काम गरेँ । तर, मबाट यो हुन्न भनेपछि छोडिदिएँ ।’

विशाल जागिर छोडेर फुर्सदमा थिए । सोही समय पुरानो टिमका अमृत सुनारले उनलाई भिडियोको अफर गरे । भिडियोको छायांकन इलाममा हुने थियो । इलाम घुम्न पाइने लोभले पनि विशाल इलाम पुगे ।

इलाममा नै रहेको समय विशालले आफ्नो मेल चेक गरे । नेपाल वानबाट मेल आएको रहेछ । मनोरञ्जन बिट खाली भएकाले काम गर्नको लागि विशाललाई अफर गरिएको थियो ।

विशाल भन्छन्, ‘मैले राजीनामामा लेखेको कुरा उहाँहरूलाई मन परेको रहेछ । त्यसैले मनोरञ्जन बिट खाली हुनेबित्तिकै मलाई बोलाउनुभयो ।’ विशालले नेपाल वान पुगेर ‘हेल्लो नेपाल’ नाम कलिङ शो सुरु गरे ।

म्युजिक भिडियोमा छलाङ

नेपाल वानमा काम सुरु गरेसँगै विशाललाई भिडियोको अफर आयो । उनले ‘तिमी हिँड्ने गोरेटेमा’ बोलको गीतको भिडियो बनाए । उक्त गीत सुपरहिट नै भयो । त्यसपश्चात् विशालले म्युजिक भिडियो निर्देशनमा छलाङ मारे ।

व्यवसायमा, गायनमा र भिजेका रूपमा पाउन नसकेको सफलता विशालले भिडियोमा पाए । उनी म्युजिक भिडियो निर्देशनमा धेरैको पहिलो रोजाइमा परे । विशाल भन्छन्, ‘नम्बर १ भएँ कि भइनँ मलाई थाहा भएन । तर, धेरैको पहिलो रोजाइमा म थिएँ ।’

एउटा यस्तो समय पनि आएको थियो- विशालले एक महिनामा ३५ वटासम्म भिडियो निर्देशन गरेका छन् ।

धेरै नै काम भएपछि विशालले नयाँपन भने दिन सकेनन् । त्यसैले उनले काम कम गर्न खोजिरहे । तर, विशालले काम कम गर्न सकेनन् । उनलाई कामको लर्को लागिरह्यो । तर, विशाललाई केही नयाँ गर्ने रहरले पोलिरहेको थियो ।

यात्रा रियालिटी शोतर्फ मोडियो

केही नयाँ काम गर्ने सोच बनाइरहेका विशाललाई ‘एपी वान टिभी’ले अफर गर्‍यो । एपी वानले विशाललाई नेपाल आइडलका लागि अफर गरेको थियो । विशाल त्यसमा सहमत भए ।

विशालले नेपाल वानबाट राजीनामा दिइसकेका थिए । तर, नेपाल आइडल सुरु हुन १ वर्ष ढिला भयो । उक्त समयमा विशालले अरु समयभन्दा दुई गुणा बढी भिडियोमा काम गरे ।

नेपाल आइडलमा विशाललाई ‘ब्याक स्टोरी’को लिडरसिप दिइएको थियो । विभिन्न प्रतियोगीहरूको अन्तरकथाको भिडियो निर्माण गर्ने गर्थे । जुन विशालको लागि अर्को पाठशाला नै बन्यो ।

विशाल भन्छन्, ‘मेरो करिअरमा नेपाल आइडल अर्को गतिलो टर्निङ प्वइन्ट बन्यो ।’

तर, विशाल नेपाल आइडलमा लामो समय टिकेनन् । केही बिमतीमा कारण विशाल अडिसन राउण्ड सकिएलगत्तै टिमबाट बाहिरिए ।

नेपाल आइडलबाट बाहिरिएलगत्तै विशाललाई अभिनेत्री केकी अधिकारीले चलचित्र निर्देशनको अफर गरिन् । विशालले पनि उक्त कुरालाई स्वीकारे ।

विशाल भन्छन्, ‘केकीसँग केही पहिलादेखि नै एक हिसाबको सल्लाह भइरहेको थियो । त्यसैले अफरलाई नकार्ने कुरै रहेन ।’

विशाल र केकीको सहकार्यमा ‘कोहलपूर एक्सप्रेस’ बन्यो । उक्त चलचित्रले विशाललाई चलचित्रमा ब्रेक दियो, चलचित्रको मेकिङ बुझायो । ‘यस चलचित्र व्यापारिक रूपमा सफल हुँदा दर्शकलाई के मन पर्छ भन्ने कुरा थाहा पाइयो’, विशाल भन्छन्, ‘चलचित्र समीक्षात्मक असफल हुँदा समीक्षात्मक सफलताको लागि के-के कुरा गर्नुपर्छ भन्ने कुरा पनि सिकियो ।’

‘कोहलपुर एक्सप्रेस’ लगत्तै विशाललाई ‘द भ्वाइस अफ नेपाल’बाट अफर आयो । नेपाल आइडलमा उनले स्टुडियो छायांकनको उति ज्ञान पाएनन् । त्यही बुझ्ने लोभले पनि विशाल द भ्वाइसमा काम गर्न तयार भए । यस शोमा विशालले मुख्य सहायक निर्देशकको रूपमा काम गरे ।

विशाल भन्छन्, ‘नेपाल आइडल र द भ्वाइसबाट मैले धेरै कुरा सिकेँ । विशेषगरि विदेशबाट आउनु हुने विभिन्न व्यक्तिहरूबाट हामीलाई धेरै कुराहरू सिक्ने मौका मिल्यो ।’

यसरी जन्मियो कमेडी च्याम्पियन

द भ्वाइस सकेर विशाल दोस्रो चलचित्र बनाउने तयारी गर्दै थिए । तर, केकी उक्त समय व्यस्त भइन् । विशाल एक्लो परे ।

सोही समय विशालले नयाँ रियालिटी शोबारे सोच्न थाले । उनलाई लाग्यो- ‘नेपालमा कमेडी रियालिटी शो छैन । कमेडी रियालिटी शो गरियो भने त राम्रो हुन्छ ।’

विशालले अध्ययन सुरु गरे । विभिन्न देशका विभिन्न कमेडी शो हेरे । त्यो मात्रै होइन, रियालिटी शो गर्दा आउने प्रतियोगीहरू छन् कि छैनन् भन्ने विषयमा पनि विशालले अध्ययन गरे ।

विशाल भन्छन्, ‘म त्यो समयमा विभिन्न रेस्टुरेन्टहरूमा पुगेर स्ट्याण्डअप कमेडीहरू हेर्ने गर्थें । यत्तिका कमेडियनहरू आए हाम्रो शो पनि उठ्छ र उनीहरूले पनि गतिलो प्ल्याटफर्म पाउँछन् भन्ने लागेपछि मैले कमेडी रियालिटी शो गर्ने निधो गरेको थिएँ ।’

विशालले सुरुमा केकीलाई नै सल्लाह गरे । केकी केही अलमलमा परिन् । तर, विशालले केकीलाई भरोषा दिए ।

विशालले केकीलाई भनेका थिए, ‘यो शो यस्तो शो हुन्छ कि, लागिहल्यो भने सिधै छक्का लाग्छ । यदि लाग्दै लागेन भने नि चौका चाहिँ पक्का लाग्छ ।’

विशालको भनाइमा केकीले विश्वास गरिन् र टिमअप गर्न तयार भइन् ।

अब विशालले होस्टको लागि रीमा विश्वकर्मालाई कुरा राखे । विशालले रीमालाई भनेका थिए, ‘पहिलो सिजनको मध्यतिर पुग्दा तिमीले नम्बर वान शो नै होस्ट गरिरहेको हुनेछौँ । त्यो कुरामा तिमी चिन्तै नगर ।’

टिम तयार भएपछि विशाल आफैँले शोको नाम जुराए – ‘कमेडी च्याम्पियन’ ।

०००

कमेडी च्याम्पियनको सुरुवात निकै खराब रह्यो । समाचार पनि त्यस्तै आए । टिमका अन्य सदस्य केही हच्किएका थिए । विशालको मनमा पनि डर थियो । तर, टिममा उनले कहिल्यै डरको भाव देखाएनन् । उनले भन्ने गर्थे, ‘यस्तै हो के । केही एपिसोड पर्ख, यसले गति लिइहाल्छ ।’

विशाल भन्छन्, ‘रियालिटी शो भनेको चलचित्र जस्तो होइन, शुक्रबार लागेर शनिबार नै पत्तासाफ हुने । रियालिटी शोमा त हरेक हप्ता नयाँ गर्न सकिन्छ । अझै राम्रो गर्न सकिन्छ भन्ने विश्वास सधैँ मलाई थियो ।’

विशालले सेटदेखि हरेक कुरामा थप मिहिनेत गरे । केही एपिसोडपछि कमेडी च्याम्पियनको सर्वत्र चर्चा सुरु भयो । धेरैले उक्त शोको चर्चा गर्न थाले ।

सुरुका दिनमा कमेडी च्याम्पियनले ठूलै आर्थिक झमेला पनि सहनुपरेको थियो । कैयौँपटक कमेडी च्याम्पियनको सेटमा ताला लाग्थ्यो । तर, त्यो अवस्थामा पनि विशाल हत्तोसाहित भएनन् ।

‘आर्थिक समस्याले गर्दा धेरै पटक 'कमेडी च्याम्पियन'को गेटमा ताला लागेको थियो । तर मलाई विश्वास थियो कि, एउटा यस्तो समय आउँछ जुन समयमा हामीले दर्शकको अथाह माया पाउनेछौँ’, विशाल भन्छन्, ‘अन्तत: त्यो विश्वास नै सत्य सावित भयो ।’

अबको तयारी

विशाल अहिले कमेडी च्याम्पियन सिजन-२ को तयारीमा जुटेका छन् । केही समयमा नै दोस्रो सिजनको फिजिकल अडिसन सुरु हुँदैछ ।

त्योसँगै विशाल अर्को रियालिटी शोको तयारीमा छन् । विशालले ‘डान्स मास्टर लिटिल चाम्स’ नामक डान्सिङ रियालिटी शो गर्दैछन् ।

डान्स मास्टरभन्दा अगाडि विशालले एक चलचित्रको काम गर्नेछन् । जुन चलचित्रको अहिले स्क्रिप्टमा काम भइरहेको छ ।

प्रकाशित मिति: शनिबार, मंसिर २०, २०७७ १४:०८