पर्यटकका लागि आकर्षक गन्तव्य बन्दै गोठीकाँडा

A+ A A-

पछिल्लो समय सुर्खेतको गोठीकाँडा आन्तरिक पर्यटकको प्रमुख रोजाइ बन्न थालेको छ । प्रायः यहाँका स्थानीय शनिबारको समय गोठीकाँडामा बिताउन थालेका छन् । गोठीकाँडाबाट सुर्खेत उपत्यकाको दृश्यावलोकन गर्न सजिलो हुने भएका कारण पर्यटककाे रोजाइमा गोठीकाँडा पर्ने गरेको हो । गोठीकाँडा वीरेन्द्रनगरबाट १० किलोमिटर टाढा पर्छ ।

गोठीकाँडाको सदरमुकाम वीरेन्द्रनगर सारिएपछि लामो समय सो क्षेत्र सुनसान बनेको थियो । तर, अहिले भने गोठीकाँडा छुट्टी मनाउनेका लागि आकर्षक केन्द्र बनेको छ । अग्लाे स्थानमा रहेको गोठीकाँडाबाट फराकिलो उपत्यका, पहाड र हिमालको दृश्यावलोकन गर्न सकिने होटल व्यवसायी धनलाल देवकोटाले बताए ।

शान्त वातावरण, चिसो हावा, स्थानीयस्तरमा उत्पादन हुने दूध, दही, लोकल कुखुरा खान यहाँ शनिबार घुइँचो नै लाग्ने गरेको छ ।’ उनले भने, ‘हरेक महिनाको पहिलो शनिबार वीरेन्द्रनगर बजार क्षेत्रमा व्यवसाय बन्द गर्ने भएकाले यहाँ बस्ने ठाउँ पाउनसमेत मुस्किल हुन्छ ।’

पश्चिमको नगरकोटका रूपमा चिनिन थालिएको स्थानीयले बताएका छन् । गोठीकाँडा पुग्ने पर्यटकको संख्या बढ्दै गएपछि यो क्षेत्रलाई व्यवस्थित बनाउन स्थानीय सरकारले काम थाल्ने तयारीसमेत गरेको छ । ‘यहाँ आउने पर्यटकको रोजाई स्थानीय परिकार पर्नुका साथै दृश्याअवोकोलन पनि हो,’ वडाध्यक्ष टोपबहादुर दर्लामीले भने, ‘गोठीकाँडालाई अझै व्यवस्थित गरेर अगाडि बढ्ने सोच बनाएका छौँ ।’

करिब २ सय वर्षअघि गोठीकाँडा नजिकैको बयलकाँडामा बहादुर शाहको पालामा गढी निर्माण गरिएको थियो । सो गढी अहिले भने भग्नाशेष अवस्थामा रहेको वडाध्यक्ष दर्लामीले बताए । ‘गोठीकाँडा नजिकै बहादुर शाहको पालमा निर्माण भएको ऐतिहासिक गढी । त्यो गढीको संरक्षणका लागि काम थाल्ने तयारी पनि गरेका छौँ,’ वडाध्यक्ष दर्लामीले भने ।

आन्तरिक तथा बाह्य पर्यटक वृद्धिभएसँगै गोठीकाँडा आसपासमा होटेल तथा अन्य व्यवसाय सञ्चालन पनि बढिरहेको उनको भनाइ छ । सहरको आधुनिकताभन्दा फरक प्राकृतिक आनन्द दिने गोठीकाँडा मल्लकालीन ऐतिहासिकस्थल भएको स्थानीय बताउँछन् ।

आन्तरिक पर्यटन केन्द्र बन्दै गएको गोठीकाँडालाई विकास गर्न पूर्वाधारसहितको योजना तय गरिएको वडाध्यक्ष दर्लामीले बताए । ‘सडक विस्तार, खानेपानी र सुरक्षा यहाँका मुख्य समस्या हुन्,’ उनले भने, ‘पूर्वाधार विकासका लागि हामीले स्थानीय, प्रदेश र केन्द्र सरकारसँग समन्वय गरेका छौँ, तर भने अनुसारको विकास हुन सकेको छैन ।’

प्रकाशित मिति: शनिबार, मंसिर २०, २०७७ ०९:४३