पोडकास्ट : के लोकतन्त्रको परिभाषा रामचन्द्र पौडेल र प्रेम चलाउनेका लागि अलग-अलग हुन्छ ?

पोडकास्ट : के लोकतन्त्रको परिभाषा रामचन्द्र पौडेल र प्रेम चलाउनेका लागि अलग-अलग हुन्छ ?

Shilapatra News · सत्तासँग प्रश्न सोधौं, कांग्रेससँग पनि

A+ A A-

तनहुँमा पुल उद्घाटन गर्न गएका प्रतिपक्षी कांग्रेस नेता रामचन्द्र पौडेल बुधबार तीन घन्टा प्रहरी नियन्त्रणमा परे। नियन्त्रणबाट फुत्केपछि उनले सत्तारुढ नेकपामाथि आरोप लगाए, ‘विकासको नाममा राजनीति गर्‍यो नेकपाले । यो ओली सरकारको सर्वसत्तावाद हो ।’

पौडेलले राणा शासनमा समेत नभएको दमन ओली सरकारबाट भएको आरोप लगाएका छन् ।

पक्कै प्रश्न उठ्छ, नेकपामाथि । खासगरी नागरिक हक संकुचित गराउने उसका केही वर्षयताका कदमहरूप्रति । पत्रकारिताले यसबारे निरन्तर प्रश्न खबरदारी गर्दै आएको छ । अनि हामी किटेरै भन्न सक्छौँ, तनहुँमा रामचन्द्र पौडेलमाथि जुन किसिमले धरपकड भयो, त्यो गलत हो ।

आज शुक्रबार यसै विषयलाई लिएर कांग्रेस सभापति शेरबहादुर देउवाले बूढानीलकण्ठ निवासमा पार्टी पदाधिकारी र पूर्वपदाधिकारीहरूको मिटिङ डाकेका छन् । उनले ओलीबाट लोकतन्त्र सिध्याउने प्रयत्न भएको, अनि त्यसैको संकेतस्वरुप रामचन्द्र पौडेलमाथि आक्रमण भएको उनको आरोप छ ।

तनहुँको घटना त साम्य भइसक्यो । अनि पौडेलले भोलिपल्ट बिहीबार पुल उद्घाटन पनि गरी छाडे ।

अब यो बेला एउटा प्रश्न भने जरुर उठाउन सकिन्छ । केही साताअघि त्रिभुवन विश्वविद्यालयमा समाजशास्त्रका उपप्राध्यापक प्रेम चलाउनेमाथि मरणासन्न हुनेगरी कुट्ने नेविसंघका कार्यकर्ता थिए । हामी सबैलाई थाहा छ, नेविसंघ कांग्रेसको भ्रातृसंगठन हो । विश्वविद्यालयमा नियमित पठनपाठन हुनुपर्छ भन्ने हुँदा चलाउनेमाथि निर्घात कुटपिट गरियो । त्यहाँ नेर लोकतन्त्रको मात्रै होइन, मानिसको जीवनको हक, अर्थात् मानव अधिकारको समेत हदैसम्म हनन भएको थियो ।

तर किन यसमा कांग्रेसका नेताहरु मौन ?

यसमा किन रामचन्द्र पौडेल मौन ?

यसमा किन शेरबहादुर देउवा मौन ?

अझ यसमा किन कृष्ण सिटौला मौन ?

एउटा वक्तव्यसमेत निकाल्नुपर्ने आवश्यकता महसुस गरेरनन् यो दलका लोकतन्त्रवादी नेताहरूले ।

के लोकतन्त्रको कुरा गर्न जोकोही कांग्रेस नै हुनुपर्छ र ? या के मानव अधिकारको कुरा गर्न कम्युनिस्ट नै हुनुपर्छ र ?

पुल बनाउँछन् मजदुरहरूले । बाटो उनीहरूले बनाउँछन् । बिजुलीका गह्रुंगा खम्बाहरू बोकेर उनीहरू गाड्छन् । पैसा राज्यकोषको खर्च हुन्छ । त्यो कोष गरिखाने मानिसहरुले नै खडा गरेका हुन् । त्यसमाथि उद्घाटन, शिलान्यास नाममा राजनीति हुन्छ । भन्न त रामचन्द्र आफैंले विकासका नाममा राजनीति भयो भनेका छन् ।

तर के यहाँ जनताको खुन पसिनाको नाममा राजनीति भएन र ?

पौडेलमाथिको धरपकडको निन्दा गर्दैगर्दा विषयहरूलाई यसरी पनि हेर्न सकिन्छ ।

याे हाम्राे पहिलाे पाेडकास्ट हाे । यसकाे पूरा अंश शिलापत्रकाे वेबसाइट र साउन्डक्लाउडमा उपलब्ध छ । हाम्रा अरू पाेडकास्टहरू सुन्न शिलापत्रकाे साइट निरन्तर पछ्याउनुहाेस् ।

प्रकाशित मिति: शुक्रबार, मंसिर १९, २०७७ १३:३२