शिलान्यास भएको ८ दिनमै तिनाउ-दानव करिडोरमा स्थानीयको विरोध

A+ A A-

बुटवलको तिनाउ र दानव नदीलाई आधार बनाएर निर्माण थालिएको तिनाउ-दानव करिडोर शिल्यानास भएको ८ दिनमा नै स्थानीयले विरोध जनाएका छन् । १० मंसिरमा अर्थमन्त्री एवं रूपन्देही क्षेत्र नं. २ का सांसद विष्णु पौडेलले उक्त करिडोरको शिल्यानास गरेका थिए ।

तर, अहिले स्थानीयले आफूहरूलाई कुनै व्यवस्थापन नगरी करिडोरको काम थाल्न लागिएको भन्दै विरोध जनाएका छन् । उनीहरूले करिडोर निर्माण गर्नुपूर्व आफूहरूलाई व्यवस्थापन नगरेसम्म काम अगाडि बढ्न नदिने र त्यसका लागि चरणबद्ध आन्दोलन घोषणा त्यहाँका स्थानीयले गरेका छन् ।

आज कैलाशनगरमा स्थानीयको भेला नै बसेर आन्दोलन चर्काउने र करिडोरको काम अबरुद्ध पार्ने निर्णयसमेत गरेका छन् । वडा नं. १२, १३ र १४ का ७ वटा टोल समितिका अध्यक्षहरू सम्मलित संघर्ष समिति गठन गरेर वैकल्पिक व्यवस्थापन नहुँदासम्म करिडोरको काम सुरु हुन नदिने निर्णय गरेका हुन् ।

संघर्ष समितिका अध्यक्ष बावुराम उपाध्यायले गरीव जनताको गास बासको व्यवस्थाविना करिडोर निर्माण नदिने बताए । उनले बस्ती व्यवस्थापनका लागि बिहीवार नै डिभिजन सडक कार्यालय बुटवल, बुटवल उपमहानगरपालिका, ४ वटा वडा कार्यालयमा ज्ञापनपत्रसमेत बुझाएको बताए ।

ज्ञापनपत्रमा उनीहरूले खोलाको क्षेत्रफल, सडकको भाग, फुटपाथ, हरियाली क्षेत्रलगायतको के कति क्षेत्रफल हो टुङ्गाउन, अर्थमन्त्री पौडेलले भनेको र सडक कार्यालयको इन्जिनियरले भनेको विषयमा फरक तथ्यांक सार्वजनिक भएकोले नदी तटीय क्षेत्रका जनतामा समस्या भएको उल्लेख छ ।

उनीहरूले करिडोर निर्माणको काम शून्य बिन्दुबाट सुरु नगरेर बीच भागवबाट गर्न पनि नहुने माग गरेका छन् । भेलामा वडा नम्बर ११ का सदस्य नहकुल शाही, १४ का सदस्य युवराज सारुले आफूहरूलाई करिडोरको बारेमा जानकारी नभएको बताए ।

त्यस्तै, नेपाली कांग्रेस बुटवल नगर सभापति खेलराज पाण्डेले तिनाउ तथा दानव नदी किनारमा निर्माण गरिने करिडोरका लागि काम सुरु हुनुपूर्व स्थानीयको घरबासको उचित व्यवस्थापन गर्नुपर्ने बताए । उनले कांगेस विकास विरोधी नभएको भन्दै जनताको माग सम्वोधन गरेर काम गर्न आग्रह गरे ।

तिनाउ र दानव नदीको दायाँबायाँ निर्माण हुने दुई लेनको सडकका लागि त्यहाँ रहेका घर टहरा हटाउने गरी लिखित प्रतिबद्धता जनाएका स्थानीय निकायले व्यवस्थापन नगर्दा भएको स्थानीयको विरोधले समयमै काम सम्पन्न नहुने निश्चित भएको छ ।

करिडोर क्षेत्रमा बुटवल उपमहानगरपालिका, तिलोत्तमा नगरपालिका तथा सैनामैना नगरपालिकाका ७ सय ५ घरटहरा व्यवस्थापन गर्न बाँकी छ ।

सडक डिभिजन कार्यालय बुटवलका इञ्जिनियर कृष्ण कुँवरले ती घरटहरालाई स्थानीय तहले व्यवस्था गर्नुपर्ने भए पनि अहिलेसम्म नगरिएको बताए । सडकले अधिकांश सुकुम्बासी बस्तीको क्षेत्र ओगट्ने भएकाले उक्त बस्ती व्यवस्थापन गर्नुपर्ने जिम्मा स्थानीय तहको भए पनि व्यवस्थापन नगरेकाले स्थानीयको विरोध भएको उनले बताए ।

बुटवल उपमहानगरका मेयर शिवराज सुवेदीले घरधनीलाई खाली जग्गामा व्यवस्थापन गर्ने तयारी अन्तिम चरणमा पुगेको भन्दै करिडोर क्षेत्रका जनतालाई व्यवस्थापन गरेरै छाड्ने बताए ।

अर्थमन्त्री पौडेलले शिल्यानास गरेको उक्त करिडोरको पहिलो चरणमा ५० किलोमिटर सडकको डीपीआर तयार भएको छ । सोमध्ये अहिले तिनाउतर्फ साढे आठ र दानव नदीतर्फ तीन किलोमिटर सडक निर्माण सुरु भएको हो ।

गत असोजमा ठेक्का स्वीकृत भएको उक्त काम तिनाउतर्फ बुटवल उपमहानगर बसपार्क पछाडिको जिरो प्वाइन्टबाट तिलोत्तमा नगरपालिकाको मगरघाटसम्म र दानवपट्टी बेलबासको झोलुङ्गे पुलदेखि नयाँ गाउँको पुलसम्म काम हुने डिभिजन सडक कार्यालय बुटवलका इञ्जिनियर कुँवरले जानकारी दिए ।

तिनाउ करिडोर निर्माणमा ५२ करोड ४६ लाख रुपैयाँ लागत लाग्नेछ । सो करिडोरको किराँतेश्वर मैनाचुली अविसा जेबिलेसँग ३६ महिनामा निर्माण सम्पन गर्ने सम्झौता भएको छ । त्यस्तै, दानव करिडोर निर्माणका लागि १९ करोड ४२ लाख रुपैयाँमा २७ महिनामा सक्ने गरी लामा बानियाँ जेबीले ठेक्का सम्झौता गरेको छ ।

निर्माण सम्झौताअनुसार २२ मिटर चौडाइको सडक क्षेत्रमध्ये किनारतर्फको १० मिटर ग्रिनरी अर्थात् रूख रोपेर हरियाली बनाइने र बाँकीमा १२ मिटरमा सडक संरचना हुने इञ्जिनियर कुँवरले बताए ।

प्रकाशित मिति: बिहीबार, मंसिर १८, २०७७ २०:५३