यसरी प्रहरीको फन्दामा परेका थिए रामचन्द्र पौडेल

A+ A A-

कांग्रेस वरिष्ठ नेता रामचन्द्र पोडेल बुधबार आफ्नै गृहजिल्ला तनहुँबाट पक्राउ परे । साे घटनाको विरोधमा कांग्रेसले देशभर प्रदर्शन गरिरहेको छ । आज फेरि कांगेसनेता शंकर भण्डारी, प्रदीप पौडेललगायतका नेता तनहुँ पुगेर विरोध प्रदर्शन जारी राखेका छन् । तनहुँको व्यास नगरपालिका- १ र ११ जोड्ने बुल्दी खोला पुल उद्घाटन गर्न जाँदा पौडेल बुधबार प्रहरीको फन्दामा परेका थिए । पुल उद्घाटनबारे नेकपा र कांग्रेसका स्थानीय कार्यकर्ताबीच मंगलबारदेखि नै विवाद थियो ।

विवादकै बीच पौडेलले मंगलबार भने तनहुँको व्यास नगरपालिका र रिसिङ गाँउपालिका जोड्ने सुँडे पुल उद्घाटन गरिछाडे । मंलगबार जिल्ला प्रशासन कार्यालय तनहुँले व्यास नगरपालिकालाई उद्घाटन कार्यक्रम रोक्न भनेको थियो । तर, प्रशासनको निर्देशनलाई लत्याउँदै व्यास नगरपालिकाले उद्घाटन गराइछाड्यो, पौडेलले उद्घाटन गरे । त्यसैको निरन्तरता दिन पौडेल फेरि बुधबार दमौलीनजिकैको बुल्दी खोला पुल उद्घाटन गर्न पुगे । मंगलबारको उद्घाटन रोक्न नसकेको नेकपा भ्रातृ संगठन राष्ट्रिय युवा संघले दमौलीमा जुसुल र मोटरसाइकल र्‍याली गर्‍यो । स्थानीय प्रशासनले दमौलीमा निषेधाज्ञा जारी गर्‍यो ।

उता बुल्दी खोला पुल उद्घाटन कार्यक्रम पुल निर्माण उपभोक्ता समितिको आयोजनामा तय भएको थियो । मंगलबारझैँ विवाद बढेपछि तनहुँ प्रशासनले बुधबार पुल उपभोक्ता समितिका अध्यक्ष खड्गबहादुर अधिकारीलाई पत्राचार गर्दै उद्घाटन रोक्न आग्रह गर्‍यो । तर, स्थानीय प्रशासनको निर्देशन उपभोक्ता समितिले मानेन । पुल उद्घाटन कार्यक्रम अघि बढायो । प्रशासनले १२ देखि साँझ ६ बजेसम्म बुल्दी पुलवरिपरि निषेधाज्ञा जारी गरिसकेको थियो । निषेधाज्ञाका बाबजुद दिउँसो २ बजेपछि वरिष्ठ नेता पौडेलसहितको टोली पुल उद्घाटनमा जान खोज्दा प्रहरीले नियन्त्रणमा लिएको थियो ।

उनीसँगै तनहुँ कांग्रेसका दर्जनभन्दा बढी नेता–कार्यकर्तामाथि प्रहरीले लाठीचार्जसमेत गरेको थियो । तनहुँ कांगेसका कोषाध्यक्ष रेशम गुरुङका अनुसार तनहुँका नेकपा सांसद किसान श्रेष्ठकाे दबाबमा नगरपालिका र पुल निर्माण ठेकेदारले उद्‍घाटनका लागि पौडेललाई बोलाउँदा पनि उद्‍घाटन गर्नमा रोक लगाइएको हो ।

‘नेपाली कांग्रेसको सरकारको पालामा पौडेलकै पहलमा पुल शिलान्यास भएको हो । त्यसैले नगरपालिका र पुल उपभोक्ता समितिले उनैलाई उद्‍घाटन गर्न बोलाएको हो । तर, प्रहरी प्रशासनको बलमा नेकपा सांसद श्रेष्ठले उद्‍घाटन गर्न रोके,’ गुरुङले भने । मंगलबार उद्‍घाटन गरेको सुँडे पुलको शिलालेखसमेत नेकपा कार्यकर्ताले फुटाइसकेको उनले बताए ।

तर, राष्ट्रिय युवा संघ तनहुँका संयोजक ईश्वर बस्याल भने आफूहरूले सुँडे पुलको शिलालेख नफुटाएको बताए । ‘हामीले मंगलबार सुँडे पुल स्थानीय प्रशासनले रोन्नुभन्दा पनि किन उद्‍घाटन भयो भनेर बुधबार दमौलीमा प्रदर्शन गरेका हौँ । पौडेललाई पक्राउ गर्नुपर्‍यो भन्ने माग होइन । म आफैैँ पनि प्रहरीको नियन्त्रणमा परेँ । यो घटनामा सांसद किसान श्रेष्ठलाई जोड्नुको कुनै अर्थ रहँदैन,’ बस्यालले भने ।

बुधबार निषेधाज्ञा तोड्दा पौडेल पक्राउ परेको गण्डकी प्रदेश प्रहरी प्रमुख डीआईजी घनश्याम अर्यालले बताए । ‘पुल उद्‍घाटनको विषयमा नेकपा र कांग्रेस कार्यकताबीच विवाद भएपछि प्रशासनले निषेधाज्ञा जारी गरेको हो । साेही निषेधाज्ञा उल्लंघन गर्ने हुँदा पौडेल पक्राउ परेका हुन्,’ डीआईजी अर्यालले भने । तनहुँ पुल उद्‍घाटनको जस कसले लिने भन्ने विषयमा राजनीतिक कार्यकर्ताबीचको विवादले कांग्रेस आन्दोलनमा उत्रिएको छ । बुल्दी खोला पुल २ करोड ५४ लाख रुपैयाँमा निर्माण सम्पन्न भएको थियो ।

प्रकाशित मिति: बिहीबार, मंसिर १८, २०७७ १३:०४