एन्टिजेन परीक्षण : काठमाडौंमा ८ प्रतिशत संक्रमित, अब देशैभर परीक्षण

A+ A A-

काठमाडौं उपत्यकाको समुदायमा कोरोना संक्रमण न्यून पाइएको छ । सरकारले एन्टिजेन विधिबाट परीक्षण गर्दा काठमाडौंमा संक्रमण न्यून पाइएको हो । इपिडिमियोलोजी तथा सरुवा रोग नियन्त्रण महाशाखाका निर्देशक वासुदेव पाण्डेले काठमाडौंको मुख्यमुख्य ठाउँमा परीक्षण गर्दा ८ प्रतिशत जतिमा संक्रमण देखिएको बताए ।

८ प्रतिशतमा मात्र संक्रमण

‘प्रत्येक दिनको अपडेट हेर्दा संक्रमण दर १६ प्रतिशत छ । काठमाडौंको मुख्यमुख्य ठाउँमा परीक्षण गर्दा ८ प्रतिशतमा मात्र संक्रमण देखियो,’ डा. पाण्डेले भने । डा. पाण्डेका अनुसार १ हजार ५ सय ५ जनाको परीक्षण गर्दा १ सय १५ जनामा संक्रमण देखिएको छ ।

‘धेरै संक्रमित होला भन्ने थियो तर त्यस्तो देखिएन । सोचेको भन्दा थोरै संक्रमण देखियो,’ निर्देशक डा. पाण्डेले भने, ‘संक्रमितको क्लोज कन्ट्याक्टमा रहेकाको परीक्षण गरेका थियौँ ।’ काठमाडौंको चाबहिल, धुम्बाराही, मित्रपार्क, बालाजु, विशालनगर, नयाँबजार, कुलेश्वर, कलंकी, असन, शंखमुल लगायतका क्षेत्रमा एन्टिजेन विधिबाट परीक्षण गरिएको थियो ।

मानिसको न्यून सहभागिता

एन्टिजेन विधिबाट परीक्षण गराउनेको संख्या भने न्यून रहेको छ । ३ हजारको परीक्षण गर्ने तयारी भए पनि १५ सयले मात्र परीक्षण गराएका छन् । ‘स्थानीय निकायको समन्वयमा परीक्षण गरिएको हो । टोलटोलमा खबर गरिएको थियो तर मानिसको सहभागिता कम भयो,’ निर्देशक डा. पाण्डेले भने,’ जनताको बुझाइमा टेस्ट गरे पनि घरमै बस्ने त हो नि भन्ने रहेछ ।’

अब चेन ब्रेक

सरकारले कारोना संक्रमणको चेन ब्रेक गर्ने गरि देशभर नै एन्टिजेन विधिबाट परीक्षण गर्ने भएको छ । पहिलो चरणमा काठमाडौंमा परीक्षण गरे पनि अब धेरै संक्रमण रहेको जिल्लामा पनि परीक्षण गरिने भएको छ । ‘कोरोनाको चेन ब्रेक गरौँ भनेर नै एन्टिजेनबाट परीक्षण गर्न लागिएको हो,’ निर्देशक डा. पाण्डेले भने, ‘अब संक्रमित धेरै रहेको र क्लोज कन्ट्याक्ट भएको सबै ठाउँमा परीक्षण गर्छौँ ।’

पीसीआर विधिबाट गरेजस्तै एन्टिजेनमा पनि स्वाब निकालेर नै परीक्षण गरिने हो । स्वाब किटमा राखेको केही समयमा नै रिपोर्ट आउँछ । त्यसैले छिटो रिपोर्ट आवश्यक पर्नेका लागि पनि एन्टिजेनबाट परीक्षण गर्न सकिन्छ ।

उपत्यमामा संक्रमण कम हुँदै

उपत्यकामा पछिल्लो समय संक्रमितको संख्या घट्दै गएको छ । दसैँ-तिहारअघिसम्म १ हजारदेखि २ हजारको हाराहारीमा संक्रमित देखिने गरेको थियो । तर, पछिल्लो दिनमा संक्रमितको संख्या घट्दै गएको छ । एक पटक परीक्षण गरेर पोजिटिभ देखिएपछि दोस्रो पटक परीक्षण गर्नु नपर्ने भएकाले पनि संक्रमितको संख्या कम भएको हो ।

निर्देशक डा. पाण्डेले पनि संक्रमण कम हुँदै गएको बताए । ‘हरेक दिन संक्रमण कम हुँदै गएको देखिन्छ । मृत्यु भएका पनि पहिला इन्फेक्स भएका तर अहिले मृत्यु भएका पनि छन् । अस्पतालबाट रिपोर्ट ढिला आएर पनि हो,’ उनले भने, ‘भारतमा पनि संक्रमण घट्दै गएको छ । एक पटक पिक भएर घट्दै जाने रोगको नियम नै हो ।’

विगत १३ दिनको संक्रमणको ग्राफ हेर्दा पनि संक्रमितको संख्या १ हजार भन्दा कम छ ।

१७ मंसिर ७२३
१६ मंसिर ५३०
१५ मंसिर ८०९
१४ मंसिर ५४८
१३ मंसिर ६४५
१२ मंसिर ८२२
११ मंसिर ७८५
१० मंसिर ८३५
९ मंसिर ९४७
८ मंसिर ४५४
७ मंसिर ९५७
६ मंसिर ८९९
५ मंसिर ५१३

अन्य रोगमा कम

कोरोनाका कारण स्वास्थ्यको मापदण्ड पालना गर्दा अन्य रोगमा कमि आएको छ । ‘मास्क लगाउने, हात धुने र दूरी कायम गर्नाले अन्य रोग कम भएको छ,’ डा. पाण्डेले भने, ‘डायरिया, डेगुं लगायतका रोग यो वर्ष कम भएको छ । भ्याक्सिन र अन्य उपाय नआएसम्म स्वास्थ्यको मापदण्ड पालना गर्नैपर्छ ।’

प्रकाशित मिति: बिहीबार, मंसिर १८, २०७७ १३:००