टिकटकमा प्रधानमन्त्रीदेखि राजघरानासम्म, मनाेरञ्जन एपमा भाषणबाजीको चिन्ता

टिकटकमा प्रधानमन्त्रीदेखि राजघरानासम्म, मनाेरञ्जन एपमा भाषणबाजीको चिन्ता

A+ A A-

गत सोमबार प्रधानमन्त्री केपी शर्मा ओलीले टिकटकमा आईडी बनाएर भिडियाे पाेस्ट गरे । पहिलो भिडियोमै उनले १६ लाख दर्शक पाएका छन् ।

१ लाख ३० हजारभन्दा दर्शकले उनको भिडियोमा लाइक गरेका छन् भने झण्डै साढे ६ हजारले कमेन्ट गर्न भ्याएका छन् । चार दिनमा प्रधानमन्त्रीले ५५ हजारभन्दा बढी फलोअर्स कमाइसकेका छन् ।

टिकटकमा प्रधानमन्त्रीकाे तरक्की यतिमै सीमित छैन । जम्मा एउटा भिडियाे पाेस्ट गरेका उनकाे अकाउन्ट टिकटकले 'भेरिफाई' गरिदिएको छ ।

डिजिटल नेपाल बनाउनका लागि सेवा एकीकरणमा भइरहेको कामबारे जनकारी गराएकाे भिडियाे ओलीले पाेस्ट गरेका थिए । त्यसयता टिकटकमा उनले दाेस्राे भिडियाे हालेका छैनन् ।

गत सोमबार राप्रपा अध्यक्ष कमल थापाले फेसबुकमा एक स्टाटस लेखे, 'मैले पनि टिकटक सुरु गरेको छु ।'

थापाले दुई महिनाअगाडिदेखि नै टिकटक सुरु गरेका हुन् । 'जाग लम्क चम्क हे' काे भिडियो पोस्ट गर्दै उनी टिकटकमा छिरेका थिए ।

अहिले उनी सक्रिय भएर टिकटकमा भिडियो पोस्ट गरिरहेका छन् । उनले सोमबार 'तीजको रमाइलो' क्याप्सनसहित एक भिडियो पोस्ट गरेका छन्, जुन भिडियोमा उनी 'पूर्व-पश्चिम रेल' बोलको गीतमा नाचिरहेकाे देख्न सकिन्छ । थापाले सोही दिन एउटा भाेजमा हिन्दी गीतमा नाचिरहेको भिडियो पनि पोस्ट गरेका छन् ।

उनले आफ्ना पुराना भाषणका भिडियाे पनि पाेस्ट गर्न थालेका छन् ।

मंगलबार उनले श्रीमतीसँगका विभिन्न तस्वीर जोडेर तयार पारिएकाे भिडियो पनि टिकटकमा पोस्ट गरेका छन् । 'एकसाथ हाम्रो समय' क्याप्सनसहित उनले भिडियो तयार गरेका छन् ।

बुधबार बिहान थापाले पूर्वराजा ज्ञानेन्द्र शाह क्लबमा पुगेको भिडियो पोस्ट गरेका छन् । भिडियो क्याप्सनमा लेखिएकाे छ, 'जनताका लागि जनताको राजा ।' भिडियोमा ज्ञानेन्द्रले क्लबमा आएकाहरूलाई नमस्कार फर्काउँदै हात हल्लाएको देखिन्छ ।

छवटा भिडियो पोस्ट भएको कमल थापाको टिकटक अकाउन्ट पनि 'भेरिफाई' भइसकेको छ । ५ हजारभन्दा बढी फलोअर्स कमाएका थापाले हालसम्म साढे २२ हजार लाइक पाइसकेका छन् ।

थापाले टिकटकमा तीन जनालाई फलो गरेका छन्, जसमा सद्‌गुरुजी, दामोदर वाग्ले र राजु नेपाल छन् ।

साझा पार्टीका संयोजक रवीन्द्र मिश्रकाे नामबाट पनि टिकटक अकाउन्ट खाेलिएकाे छ । उक्त अकाउन्टमा पोस्ट गरिएका भिडियोहरू मिश्रले फेसबुकमा शेयर गरिरहेका हुन्छन् । तर, उनका अनुसार साे अकाउन्ट उनकै शुभचिन्तकले बनाइदिएका हुन् । आफैँ भने सक्रिय भएर टिकटक भिडियो बनाउँदैनन् ।

केही दिनअगाडि मिश्रले आफैँले बनाएको एक भिडियो शेयर गरेका थिए । वैवाहिक वर्षगाँठको खुसी मनाउन भन्दै उनले श्रीमती सारिक र आफ्नो तस्वीरबाट भिडियो तयार गरेका थिए । जुन भिडियो उनले बनाएको पहिलो टिकटक भिडियो हो ।

रवीन्द्र मिश्रले आफ्नो अफिसियल भन्ने टिकटक अकाउन्ट उनका शुभचिन्तकले चलाउने गर्छन् । टिकटक प्रोफाइलमा नै उक्त कुरा उल्लेख गरिएको छ । उनको अकाउन्टमा विशेष गरी उनले दिएका अन्तर्वार्ताका फुटेजहरू बढी देखिन्छन् ।

मिश्रको उक्त अकाउन्टमा हालसम्म २० वटा भिडियो पोस्ट भएका छन् । मिश्रलाई पछ्याउने ५ हजार ३ सयभन्दा माथि छन् । उनले ३७ हजारभन्दा बढी लाइक पाएका छन् ।

मिश्रले १३ अकाउन्टलाई फलो गरेका छन् । जसमा नेपाली तथा विदेशी न्यूज च्यानलका अकाउन्टहरू छन् ।

नेकपा केन्द्रीय सदस्य तथा प्रतिनिधिसभा सदस्य रामकुमारी झाँक्री पनि टिकटकको सक्रिय प्रयोगकर्ता हुन् । लामो समयदेखि टिकटकमा सक्रिय उनले हलसम्म ६० वटाभन्दा बढी भिडियो पोस्ट गरेकी छिन् । झाँक्रीले विभिन्न नेपाली गीतमा अभिनय गरेका भिडियाे पाेस्ट गरेकी छिन् । विशेष गरी उनले लोकगीतमा टिकटक बनाउने गरेकी छिन् ।

झाँक्रीले हालसम्म झण्डै १७ हजार फलोअर्स पाइसकेकी छिन् । उनको भिडियोमा २ लाख ४५ हजारभन्दा बढी लाइक मिलेको छ । झाँक्रीले ३१ जनालाई फलो गरेकी छिन् ।

त्यस्तै, सामाजिक सञ्जालमा बेलाबेला पूर्वराजघरानाका व्यक्तिहरूको टिकटक पनि हिट भइरहेको हुन्छ । पूर्वयुवराज पारस शाहको विभिन्न व्यक्तिहरूले टिकटक बनाइदिन्छन् । ती भिडियोहरू भाइरल भइरहेका हुन्छन् । पारसकी श्रीमती हिमानी शाह र उनका दुई छोरीले बनाएका टिकटक पनि भाइरल हुने गरेका छन् ।

पारसकी छोरी पूर्णिका शाह टिकटकमा सक्रिय छिन् । उनले हालसम्म २१ वटा भिडियो पोस्ट गरेकी छिन् । पूर्णिकाले विशेष गरी टिकटकमा चलेको 'साउण्ड'मा टिकटक बनाउने गरेकी छिन् ।

पूर्णिकालाई फलो गर्नेको संख्या १ लाख ५५ हजारभन्दा बढी छ । उनले हालसम्म १२ लाखभन्दा बढी लाइक पाएकी छिन् । पूर्णिकाले १ सय जनालाई फलो गरेकी छिन् ।

पारसकी कान्छी छोरी कृतिका शाह पनि टिकटकमा सक्रिय छिन् । उनले पनि हालसम्म ८० हजारकाे हाराहारीमा फलोअर्स पाइसकेकी छिन् । उनका भिडियोहरूमा लाइक गर्नेको संख्या ९ लाख ३१ हजारभन्दा बढी छन् । उनले पनि टिकटमा ट्रेण्डिङ बनेको साउण्डमा टिकटक बनाउने गरेकी छिन् ।

किन रोजाइमा पर्‍यो टिकटक ?

अहिलेको समयमा सूचना प्रवाहको बलियो आधार टिकटक भएको बुझेर नै प्रधानमन्त्रीले टिकटक अकाउन्ट खेलेका हुन् । प्रधानमन्त्रीका प्रेस सल्लाहकार सूर्य थापाले भने, 'सूचना तथा सन्देश प्रवाहका लागि प्रभावकारी माध्यम भएकाले टिकटक अकाउन्ट खोलिएको हो ।'

प्रधानमन्त्रीको अकाउन्टबाट विभिन्न सूचना तथा सन्देशमूलक भिडियो मात्रै पोस्ट गरिने थापाको भनाइ छ ।

रामकुमारी झाँक्री भने आफू पहिल्यैदेखि सांस्कृतिक क्षेत्रमा क्रियाशील भएका कारण मनोरञ्जनका लागि टिकटक सुरु गरेको बताउँछिन् । उनी भन्छिन्, 'म पहिल्यैदेखि सांस्कृतिक क्षेत्रमा क्रियाशील थिएँ । नाचगान मेरो अभिरुचि पनि हो । यो पनि एउटा सामाजिक सञ्जाल हो, यसको पनि प्रयोग गरौँ न त भन्ने लागेर टिकटक सुरु गरेकी थिएँ ।'

रामकुमारीले सुरुमा टिकटक खोलेर केही समय निष्क्रिय रहिन् । पछि पुन: उनलाई रहर लाग्यो र सक्रिय हुन थालिन् । 'साथीहरूले मेरा भिडियो मन पराउनुभयो । केही समय भिडियो आएन भने खोइ भनेर प्रश्न गर्न थाल्नुहुन्छ', झाँक्री भन्छिन्, 'त्यसैले पनि म टिकटकमा सक्रिय नै छु ।'

झाँक्रीलाई भाषणका टुक्राहरू टिकटकमा पोस्ट गर भन्नेहरूको जमात सानो छैन । तर, झाँक्री आफ्नो भाषणको टुक्रालाई टिकटकमा हाल्ने मन गर्दिनन् । उनी भन्छिन्, 'भाषण हेर्नका लागि त युट्युब छँदै छ नि । यो त गीत-संगीत तथा विभिन्न भिडियोहरू हेरेर मनोरञ्जन लिने साइट हो ।'

कुनै समय राजनीतिक रूपमा समेत झाँक्रीलाई 'टिकटके' भनेर उडाउने गर्थे । अहिले उनीहरू नै टिकटकमा आएकाले झाँक्री खुसी छिन् । उनी भन्छिन्, 'मैले पहिला फेसबुक चलाउँदा मलाई राजनीतिक वृत्तमा फेसबुके भनियो । ट्वीटरमा आउँदा ट्वीटे भने । टिकटक प्रयोग गर्दा टिकटके पनि भन्न भ्याए । तर, मलाई लाञ्छना लगाउनेहरू नै अहिले फेसबुकेदेखि टिकटकेसम्म भएका छन् ।'

ट्वीटरमा सुभास अधिकारीले व्यंग्य गरेका छन्, 'भनेपछि अब टिकटकमा पनि नेताहरूकाे बकबक ?'

नेताहरूले यसमा ध्यान दिनुपर्नेछ । किनकि टिकटक ज्ञान बाँड्ने र भाषण छाँट्ने चाैतारी हाेइन, मनाेरञ्जनकाे थलाे हाे ।

प्रकाशित मिति: बुधबार, मंसिर १७, २०७७ १९:३०