कतार प्रहरीका लागि अवैध अन्तर्वार्ता लिने ३ म्यानपावरको ६ महिना कामकारबाही रोक !

कतार प्रहरीका लागि अवैध अन्तर्वार्ता लिने ३ म्यानपावरको ६ महिना कामकारबाही रोक !

manpower.jpg

A+ A A-

वैदेशिक रोजगार विभागले पूर्वश्रम स्वीकृति नै नलिई कतार प्रहरीमा कामदार पठाउन अन्तर्वार्ता लिइरहेका डीडी ह्युमन रिसोर्स, एसओएस म्यानपावर र लाजिम्पाटस्थित होप इन्टरनेसनल म्यानपावरमा गत हप्ता छापा मारेको थियो ।

ती तीन म्यानपावरले कतारी प्रहरीको रोजगारीमा पठाउनै भन्दै पूर्वश्रम स्वीकृति नै नलिई अवैध रूपमा कामदारसँग अन्तर्वार्ता लिएको अवस्थामा विभागले छापा हानेको थियो । तीनैवटा म्यानपावरले भिसा प्रमाणीकरण र पूर्वश्रम स्वीकृति नलिई कतारी प्रहरीमा पठाउने भन्दै करिब १ हजार युवासँग अन्तर्वार्ता लिएको विभागले जनाएको छ ।

श्रम, रोजगार तथा सामाजिक सुरक्षा मन्त्रालयले पूर्वश्रम स्वीकृति र श्रम सम्झौताविपरीत कतार प्रहरीको रोजगारीमा पठाउने भन्दै कामदारसँग अन्तर्वार्ता लिइरहेका ३ म्यानपावरलाई विभागले वैदेशिक रोजगार ऐनको दफा ६१ अनुसार कारबाही गर्ने भएको छ । ऐनका दफा ६१ मा वैदेशिक रोजगारीमा कामदार पठाउन म्यानपावर कम्पनीले पूर्वश्रम स्वीकृति र सम्बन्धित निकायलाई जानकारी नगराई अन्तर्वार्ता गरे ६ महिनासम्म कामकारबाही रोक्का र ऐनअनुसार आर्थिक जरिवाना गर्न सक्ने व्यवस्था छ ।

तीनैवटा म्यानपावरले पूर्वश्रम स्वीकृति नलिई कतार प्रहरीमा पठाउने भन्दै कामदारसँग अन्तर्वार्ता लिएको पाएको र ती म्यानपावरले वैदेशिक रोजगार ऐनअनुसार अन्तर्वार्ता गर्नका लागि कुनै पनि पत्रिकामा विज्ञापनसमेत नगरेको पाइएका कारण ऐनअनुसार कामकारबाही रोक्का गरिने श्रम मन्त्रालयका एक कर्मचारीले जानकारी दिए ।

तीनैवटा म्यानपावरलाई शुक्रबार नै कामकारबाही रोक्का गर्ने निर्णय गर्ने तयारी भएको थियो । तर, अन्य म्यानपावरले पनि अवैध रूपमा कतार प्रहरीमा कामदार पठाउने भन्दै अन्तर्वार्ता लिँदै छन् भन्ने सूचना आएका कारण शुक्रबार निर्णय नगरिएको ती कर्मचारीले जानकारी दिए ।

‘तीनैवटा म्यानपावरको कामकारबाही ६ महिनासम्म रोक्का हुन्छ । ऐनमा व्यवस्था भएअनुसार कानुनी आर्थिक जरिवाना हुन्छ,’ ती कर्मचारीले भने, ‘वैदेशिक रोजगारीमा कामदार पठाउने नाममा म्यानपावरले धेरै मनपरी गर्न थालेका छन् । यसरी भइरहेको गतिविधि राज्यलाई नै चुनौती भइरहेको छ । जसका कारण कडा कदम चल्नुपर्ने अवस्था आएको हो ।’

कतार प्रहरीमा कामदार पठाउने भन्दै शिखर म्यानपावरले राति अन्तर्वार्ता गरिरहेको सूचना आएको विभागले जानकारी दिएको छ । यो विषयमा विभागले अनुसन्धान र खोजी गरिरहेको जनाएको छ ।

विभागका दूतावासको ४५ सीडी ००९ नम्बरको होप म्यानपावरभित्र भेटिएको थियो । उक्त गाडीमा कतारी दूतावासका एक जना कन्सुलर र विदेश रोजगार हेर्ने कर्मचारी रहेको श्रम मन्त्रालयले जनाएको छ ।

विभागको टोली पुगेको थाहा पाएपछि अन्तर्वार्ता बन्द गरेर म्यानपावर सञ्चालक, कर्मचारी र दूतावासका अधिकारीलाई कार्यालयभित्र राखेका थिए । उनीहरू विभागको टोलीलाई अटेर गर्दै बाहिर निस्किएका थिए ।

विभागले सोमबार डीडी ह्युमन रिसोर्स र एसओएस म्यानपावर कम्पनीमा छापा मारेर कागजपत्र जफत गरेको थियो । ती म्यानपावरमा ७ सयभन्दा बढी युवा अन्तर्वार्तामा लागि आएको भेटिएको थियो । यी दुवै म्यानपावरको अन्तर्वार्तामा कतारीस्थित नेपाली दूतावासका कर्मचारीको संलग्नता रहेको विभागको दाबी छ ।

दूतावासका कर्मचारी नै म्यानपावरले लिएको अन्तर्वातामा भेटिएपछि कतार कामदार पठाउने सिण्डिकेटमा दूतावासको संलग्नता रहेको रोजगार व्यवसायीले बताउने थालेका छन् । कर्मचारीले कूटनीतिक मयार्दाविपरीत अन्तर्वार्तामा संलग्न भइरहेको म्यानपावर व्यवसायीको आरोप छ । कतार कामदार पठाउन कतारी भिसा सेन्टरमार्फत १७ वटा म्यानपावर छनोटमा परेका छन् ।

एसओएस म्यानपावर, होप इन्टरनेस्नल, अल थाक्वेत ओभरसिज, डीडी ह्युमन रिसोर्स म्यानेजमेन्ट, राज ओभरसिज, कैलास इन्टरनेस्नल म्यानपावर, अल-रायन इन्टरप्राइजेज, न्यू पाथिभरा प्लेसमेन्ट सर्भिसेज, गोर्खा इन्काउन्टर्स, सुपर्भ फर अल्टिमेट म्यानपावर सोलुसन, डेभिड फरेन रिक्विमेन्ट एजेन्सी, धर्म ओभरसिज, साउन्डलिनेस रिक्रुटमेन्ट, कञ्चन ह्युमन रिसोर्स म्यानेजमेन्ट र इन्टरनेसनल म्यानपावर रिक्रुटमेन्ट प्रालिलाई मात्रै कतारमा श्रमिक पठाउने गरी सिन्डिकेटका लागि छनोट भएका छन् ।

प्रकाशित मिति: आइतबार, मंसिर १४, २०७७ १३:४०