बन्द खामभित्र ओलीका खुला सन्देशहरू

A+ A A-

सचिवालयमा पेस गर्न लेखेको दस्तावेज गाउँगाउँसम्म छरिएपछि १३ मंसिरसम्मको प्रतीक्षा प्रचण्डका लागि कम्ती कठिन थिएन । अन्ततः अर्का ‘कार्यकारी अध्यक्ष’ (प्रधानमन्त्री केपी ओलीका सल्लाहकार विष्णु रिमालको भाषामा) ले यसको जवाफ बन्द खाममार्फत दिएका छन् । ओलीले लेखेको जवाफी पत्रका सन्देश खुला छन् ।

चार बुँदामा हेरौँ :

एक, सबैभन्दा संगीन आरोप- उनले प्रचण्डलाई पार्टी विभाजनका लागि नेतृत्व पंक्तिलाई उकासेको आरोप लगाएका छन् । शान्ति प्रक्रियायता प्रचण्डबाट निरन्तर धोकाधडी र चालबाजीमात्रै भइरहेको तर्क गरेका छन् ।

दुई, ओलीले प्रष्टै सन्देश दिएका छन् : वास्तवमा एमाले र माओवादीको एकता भएको थिएन । माओवादी बाध्यताले एमालेमा समाहित हुन आइपुगेको थियो । आफूलाई प्रधानमन्त्री बनाउन प्रचण्डको कुनै त्याग थिएन, त्यो उनको विकल्पहीन बाध्यता थियो ।

तीन, पार्टी आफ्नो भएको सन्देश प्रवाह गर्दै उनले बस्न मन नलागेको भए छाडेर जान चुनौती दिएका छन् । योसँगै नेकपाभित्र नेतृत्वको द्वैध स्वामित्व आफूले अन्त्य गर्न चाहेको ओलीले सन्देश प्रवाह गरेका छन् ।

चार, पार्टी नेतृत्वमा आफू अल्पमतमा पर्ने स्पष्ट भएपछि ओली अब संख्याको खेलमा नलाग्ने विन्दुमा आइपुगेका छन् । उनले प्रचण्डमार्फत् माधव नेपाल, झलनाथ खनाल, वामदेव गौतमजस्ता आफ्नै विगतका सहयात्री, प्रतिष्पर्धी दुवैलाई यो सन्देश दिएका हुन् ।

ओलीको यो पत्र यसअघि अनुमान गरिएजस्तो ‘लेटर-बम’ का रूपमा भने आएन । आज बिहान शिलापत्रकर्मी शिशिर ढकालसँग कुरा गर्दै नेकपा महासचिव तथा अर्थमन्त्री विष्णु पौडेलले यसको संकेत दिइसकेका थिए । बरू यसअघि नै केही अनलाइनमार्फत् ओली पक्ष ‘मिडिया ट्रायल’ गरेर प्रचण्डलाई पहिल्यै रक्षात्मक बनाउने गरी प्रस्तुत भएको थियो ।

ओलीको पत्र अध्ययन गर्न तीन दिन लाग्ने भन्दै इतर पक्षले समय लिएको छ । १६ मंसिरमा सचिवालयको दोस्रो बैठक बस्ने छ । १८ गते त स्थायी समिति नै छ । त्यसअघि नेतृत्वमा संयुक्त दस्तावेज र साझा दृष्टिकोण बनिसक्नुपर्ने अपेक्षा पार्टीभित्र छ ।

ओलीको एउटा बानी छ, कस्तै प्रतिकूलतामा पनि उनी ढिट देखिन्छन् । त्यसअर्थमा प्रचण्ड-माधव पक्षका लागि आगामी बैठकहरू एक हदसम्म कष्टकर साबित हुनेछन् । अस्थायी युद्धविराम भयो भने आश्चर्य हुने छैन, तर सबै दृश्यांशहरु भनिरहेका छन्- नेकपाको तीन वर्षे यात्रा दुर्घटनाको डिलैमा छ ।

माधव नेपाल, झलनाथ खनाल, वामदेव गौतमको साथ यतिन्जेलसम्म प्रचण्डलाई छ । राजनीति हो, तिक्तता बढ्दै जाँदासम्म यो साथ ऐजन रहिरहला भन्न सकिन्न । जनताको बहुदलीय जनवाद ब्युँताउने ओली रणनीति प्रदेश तहका जुम मिटिङहरुमा उनकै मुखबाट अभिव्यक्त भइसकेको छ ।

मदन भण्डारी र मनमोहन अधिकारीप्रति भावनात्मक लगावबाट पैदा भएको विगत एमालेको आकर्षणलाई ओली एकपल्ट फेरि परीक्षण गर्न चाहन्छन् । त्यसबाट आफ्नो सत्ता शक्ति सुरक्षित हुनसक्ने उनको ठम्याई छ । वारपारको अवस्था आएमा जबज-अस्त्रको असर माधव, झलनाथ र वामदेवलाई नपर्ला भन्न सकिन्न ।

सुवास नेम्बाङ, शंकर पोखरेल, प्रदीप ज्ञवाली र विष्णु रिमाल बहुदलीय जनवादका काँडाले प्रचण्डलाई घोच्ने गरी दस्तावेज लेखेका हुन् । यद्यपि नेम्बाङले आफू दस्तावेज लेख्ने टिममा नरहेको प्रष्टीकरण दिएका छन् ।

प्रचण्डमाथि सम्पूर्ण दबाब सिर्जना गर्ने, बाँकी नेतालाई उनीबाट अलग्याउन नैतिक दबाब सिर्जना गर्नेगरी यो दस्तावेज आएको छ । प्रचण्डलाई अविश्वसनीय र अराजनीतिक सिद्ध गर्नलाई कुनै पनि दृष्टान्त दिन बाँकी छाडेका छैनन्, ओलीले ।

तर ओली पक्षको तयारी पनि उस्तै प्रतिक्रियात्मक थियो । प्रचण्डले तयार पारेको प्रस्तावका लिखित प्रतिहरु बाँड्न कुनै पनि हालतमा रोक लगाउन ओलीले आफू निकट युवा विद्यार्थी कार्यकर्तालाई निर्देशन दिएका थिए । नेकपाका दुई समूहबीच एक चरण भिडन्त जिल्लाहरूमा भइसकेको छ । यो अझै थपिन सक्छ ।

प्रकाशित मिति: शनिबार, मंसिर १३, २०७७ १६:३६