बर्दिबास बालिका हत्या प्रकरण : अनि चल्यो न्याय माग्नेमाथि गोली

A+ A A-

छोरीको हत्या वियोगमा रहेकी बर्दिबासकी ३० वर्षीया सबिना खातुन अर्धमूर्छित छिन् । ६ वर्षीया छोरी गुलाब्सा खातुनकाे हत्या भएकाे खबर सुनेपछि सबिनालाई पाँच दिनदेखि आफन्त र छिमेकीले सम्हालिरहेका छन् । बुबा शहिद आलमको पनि होसहवास हराएको छ ।

हत्या आरोपी यसअघि समेत पटकपटक आपराधिक घटनामा मुछिएर छुटेकाले उनलाई कारबाही र पीडितलाई न्यायका लागि प्रदर्शनमा उत्रिँदा प्रहरीको गोली लागेर मृत्यु भएका स्थानीय सञ्जय न्यौपानेको परिवार पनि गहिरो पीडामा छ ।

उनकी ६४ वर्षीया आमा अम्बिका न्यौपानेसमेत आफूलाई सम्हाल्न सकिरहेकी छैनन् । सिउँदो पुछिएकी उनकी पत्नी गंगा र तीन जना छोराछोरी बुबा खोज्दै रुँदैछन् ।

मृतक बालिका र गोली लागेर ज्यान गुमाएका दुवै घटनाको सत्यतथ्य पत्ता लगाउन गृह मन्त्रालयले तीन सदस्य छानबिन टोली गठन गरेपछि बर्दिबासको अवस्था शान्त बनेको छ । तर, दुवै जनाको मृत्युले बर्दिबास शोकमग्न छ ।

बलात्कारपछि हत्या आरोपमा पक्राउ परेका स्थानीय अरुण साहविरुद्ध शुक्रबार इलाका प्रहरी कार्यालय बर्दिबासमा पीडित परिवारले किटानी जाहेरी दिएका छन् । डीएसपी राजन चापागाईँका अनुसार अपहरण, शारीरिक बन्धक, जबर्जस्तीकरणी र कर्तव्यज्यान गरी साहमाथि चार वटा मुद्दा चलाइएको छ । गएको आइतबार साँझ चकलेट किन्न अरुणको पसलमा पुगेकी गुलाब्साको शव मंगलबार मध्यरातमा बोरामा प्याक गरेर झाडीमा फालिएको अवस्थामा भेटिएकाे थियो ।

बुबाले नै छोरालाई प्रहरीको जिम्मा लगाए

गुलाब्सा सधैँजसो आइतबार पनि साँझ छेउमै रहेको अरुणको पसलमा चकलेट किन्न पुगिन् । तर, एक घण्टापछि समेत फर्केर नआउँदा परिवारका सबै सदस्य खोजतलासमा जुटे । टोलभर खबर भयो । स्थानीयले इलाका प्रहरी कार्यालय बर्दिबासमा समेत जानकारी गराए । रातभर खोज्दा पनि अवस्था पत्ता नलागेपछि उनीहरू त्यत्तिकै सुते ।

परिवारमा रातभर छटपटी भयो । चकलेट किन्न गएकाले नफर्किँदा अरुणले नै गुलब्सालाई लुकाएर राखेको पीडित परिवार र स्थानीयलाई शंका लाग्यो । महोत्तरीकै गौशाला हत्याकाण्डमा मुछिएर केही दिनअघि मात्र अदालतबाट धरौटीमा रिहा भएका उनीमाथि पहिले पनि विभिन्न आरोप लागेकाले परिवारका सदस्य, आफन्तले गुलाब्सालाई अरुणले लुकाएर राखेको छ भनेर आशंका गरे ।

स्थानीयका अनुसार उनले यसअघि पनि पसलमा गएकी बालिकालाई दुर्व्यवहार गर्ने गरेका थिए । साहविरुद्ध बालिका दुर्व्यवहारसम्बन्धमा इलाका प्रहरी कार्यालय बर्दिबासमा उजुरी नै दर्ता भएको स्थानीयको भनाइ छ । तर, कोरोना महामारीको बहाना बनाउँदै प्रहरीले कारबाही प्रक्रिया अगाडि नै बढाएन ।

गुलाब्साका आफन्त र छिमेकीले वरिपरि सबै घरको तलासी गरिसकेका थिए। तर, अरुणको घर तलासी गर्न खोज्दा त्यहाँ रहेका दुई जना प्रहरीले अनुमति दिएनन् । ‘हामीलाई अरुणमाथि सुरुदेखि नै शंका लागेको थियो । उसको घरभित्र जानखोज्दा त्यहाँ उभिएका दुई प्रहरीले अनुमति नै दिएनन्,’ बालिकाकाकी बुबा आलमले भने ।

सई वीरेन्द्र सिंह र हवल्दार फुलगेन मण्डलले घरभित्र खोजतलास गर्न ‘सर्च वारेन्ट’ लिएर आउन भनेको उनको भनाई छ । गुलाब्सा बेपत्ता भएपछि हत्या हुनुमा ती दुई प्रहरीको समेत मिलोमतो रहेको पीडित परिवारको आराेप छ । ‘बेपत्ता भएकै दिन अरुणको घर तलासी लिएको भए सायद गुलाब्सा जिउँदै हुन्थिन्,’ आलमले थपे । तर, आरोपी साहको पसलमा सीसीटीभी जडान भएको थाहा पाएपछि पसल अगाडि उभिएर त्यहाँका गतिविधि नियाल्दै बालिकाकाको खोजतलास तथा अनुसन्धानमा जुटेको प्रहरीको दाबी छ । स्थानीयलाई घरभित्र प्रवेशमा रोक लगाएपछि प्रहरीले आरोपीलाई बचाउन खोजेको अफवाह फैलिएको डीएसपी राजन चापागाईको भनाइ छ ।

‘ड्युटीमा खटिएको सई र आरोपीको घर एउटै गाउँमा छ । दुबै जनाले एकअर्कालाई चिन्थे । त्यसरी त चिन्ने धेरै हुन्छन् नि । केहीले प्रहरीले उसलाई जोगाएको, सँगै भोजभतेर गरेको लगायतका गलत अफवाह फैलाए,’ उनले भने ।

अरुणले पसल बन्द गरेर आफ्नो घर गौशाला पुगेका थिए । रक्सीले मातिएका उनले राती बालिकालाई आफूले मारेको घटना बुबालाई सुनाए । बुबाले फकाएर घटनाबारे सोधपुछ गरेपछि अरुणले घटनाबारे सारा वृतान्त सुनाए ।

तुरन्तै इलाका प्रहरी कार्यालय गौशालामा छोराले बालिकाको हत्या गरेको सुनाएपछि प्रहरीले उनलाई पक्राउ गरे । त्यहीँ राति गौशाला प्रहरीले साहलाई इलाका प्रहरी कार्यालय बर्दिबासको जिम्मा लगाए । प्रहरीको सोधपुछको क्रममा उनले आरोप स्वीकार गरी बोरामा प्याक गरी फालिएको बालिकाको शव प्रहरीलाई देखाएका थिए ।

चर्कियो आन्दोलन, चल्यो गोली

बालिकाको शव फेला परेपछि प्रहरी घटनास्थललाई घेरा हालेर अनुसन्धानमा जुट्यो । अर्कोतर्फ प्रहरीले मुचुल्का उठाउँदै बिहान भयो । गम्भीर खालको घटना भएकोले त्यहाँ गाउँलेको भीड बढ्दै गयो । आक्रोशित भीड बिहानै आरोपीको पसलमा तोडफोड गर्न अघि सर्‍याे । प्रहरीको काबुबाट स्थिति बाहिर जान थाल्यो । लगतै थप मद्दतमा शसस्त्र प्रहरी आइपुग्यो । आरोपीको घर अगाडिको गेटमा प्रहरीले घेर्‍यो ।

प्रहरीको आँखा छल्दै दुई युवा उनको तीन तल्ले घरमा पस्यो । उनीहरूले घरमा तोडफोड गर्न थाले । झ्यालको सिसा, टीभी, फर्निचरका समान घरबाट निकालेर फाले । प्रहरीले अवस्था नियन्त्रणमा लिन खोज्यो । तर, सकेन ।

यो क्रम बिहान साढे सात बजेसम्म चल्यो । त्यसपछि आरोपीलाई सामाजिक बहिस्कार गर्नुपर्छ भन्दै भीडबाट नाराबाजी हुन थाल्यो । लगतै भीडबाट पसल र घरमै आगो लगाइदिए । उनीहरूले सोचे जस्तो आगो सल्किएन । प्रदर्शनकारीले घरभित्र रहेको खाना पकाउने ग्यास लिक गरे । टायर ल्याएर पोट्रल खन्याए । अनि आगो दनदनी बल्यो ।

प्रहरीले आगो निभाउन बर्दिबास नगरपालिका र धनुषाको क्षिरेश्वरनाथ नगरपालिकोको दमकल बोलायो । दकमल आउँदा बिहानको ८ बजिसकेको थियो । भीडले बाटोमा टायर बालेर अवरोध गरिसकेका थिए । प्रहरीभन्दा प्रदर्शनकारीको संख्या बढी थियो । घरमा आगो दनकिरह्यो । भीड अगाडि प्रहरीको केही चलेन । ग्यासको सिलिण्डर पड्किएपछि आगो झन् दन्कियाे ।

‘बलात्कारलाई फाँसी दे’, ‘हत्यारालाई कडा कारबाही गर’, ‘ओरोपीलाई तुरुन्त घटना स्थलमा ल्याएर हामीलाई जिम्मा लगा’ भन्ने नारासहित घटनास्थलमै स्थानीयले प्रर्दशन गरे । प्रहरीले घटनास्थलमा घेरा हाल्याे । प्रदर्शनकारीले बिहान साढे ८ बजे पहिलोपटक प्रहरीमाथि ढुङ्गामुढा गरे । त्यसको जवाफमा प्रहरीले आन्दोलनकारीमाथि टियर ग्यास प्रहार गर्‍यो । लाश उठाएर पोस्टमार्टमका लागि पठाउन बर्दिबास उद्योग वाणिज्य संघले पीडित परिवार, गाउँले र डीएसपीलाई राखेर छलफल राख्यो ।

दोषीलाई कडा कारबाही गर्ने, आरोपीको घर भत्काएर त्यहाँ बालिकाको स्मृति पार्क बनाउने, दोषी प्रहरीलाई निलम्बन गरेर कारबाही गर्नेलगायतको सहमति भयो । त्यो सहमति भीडमा गएर सुनाइयो । पैसा खाएर घटना मिलाउन लागेको भन्दै भीडले आरोप लगायो । त्यही प्रदर्शनकारीकाे भीडले प्रहरीमाथि ढुंगा र इट्टा बर्सायो । त्यसपछि प्रहरीले अश्रु ग्याससँगै हवाई फायर पनि खोले ।

हवाई फायर हुँदा बिहानको १० बजिसकेको थियो । प्रहरीले आरोपीको घर समयमै तलासी गरेको भए बालिका बाँच्थे भन्दै प्रहरीविरुद्ध भीड खनियो । ढुंगामुडा झन बढी हुन थाल्यो । त्यसपछि त्यो भीड अनियन्त्रित भयो । भीडले लाशलाई लिएर राजमार्ग बन्द गराउन बर्दिबास चोकमा हिँड्यो । प्रहरीले रोक्न खाेज्दा प्रहरीमाथि फेरी ढुंगामुडा भयो ।

प्रदर्शनकारीले राजमार्गमा शव राखेर १२ बजेसम्म प्रदर्शन गरे । राजमार्गमा शव राख्नुअघि बिहानै टायर बालेर राजमार्ग बन्द गराइसकिएको थियो । शव प्रदर्शन गर्ने स्थानमा नेपाल प्रहरी बीट छ । आन्दोलनकारीले त्यसमा ढुङ्गामुढा र आगजानी गर्नथालेपछि थप प्रहरी आएपछि धमाधम आन्दोलनकारीलाई तितरवितर बनाउन गोली चलायो । गोेली लागेर आन्दोलनकारी घाइते भए । त्यहीँबेला बालिकाको लाश उठाएर प्रहरीले पोस्टमार्टका लागि अस्पताल लग्यो ।

प्रहरीको गोली लागेर प्रदर्शनकारी र प्रदर्शनकारीको ढुङ्गा लागेर प्रहरी घाइते भए । प्रहरीको गोली लागेर बर्दिबास- १ का बुद्धिराज भनिने सञ्जय न्यौपाने र बर्दिबास- ५ का श्याम कार्की घाइते भए । त्यसक्रममा स्थानीय अफताक आलम पनि घाइते भए ।

बुद्धिराजको बाँया तिघ्रा गोली वारपार भएको थियो । उनलाई हेलिकोक्टरबाट र श्यामलाई एम्बुलेन्समार्फत उपचारका लागि काठमाडौं पठाइयो । घाइतेलाई उपचारका पठाउँदै गर्दा ३ बजेको थियो । त्यसपछि फेरी आन्दोलनकारी सडकमा आए । प्रहरीले टियर ग्यास, लाठी चलाएपछि साँझसम्म माहोल शान्त भयो । तर, शुक्रबादेखि बर्दिबासमा समान्य नारा, जुलुस र विरोध प्रदर्शनबाहेक अवस्था सामान्य छ ।

प्रकाशित मिति: शनिबार, मंसिर १३, २०७७ १९:४८