सरकारी रिपोर्ट भन्छ : कोरोना समुदायमा फैलियो

A+ A A-

नेपालमा कोरोना भाइरस (कोभिड-१९) समुदायस्तरमा फैलिएको सरकारी अनुसन्धानले देखाएको छ । इपिडिमियोलोजी तथा सरुवा रोग नियन्त्रण महाशाखा, राष्ट्रिय जनस्वास्थ्य प्रयोगशाला र विश्व स्वास्थ्य संगठनले सातवटै प्रदेशको समुदायमा परीक्षण गर्दा संक्रमण समुदायमा फैलिएको देखिएको हो ।

‘प्रदेश २ र प्रदेश ३ मा संक्रमण स्थानीय रूपमा देखिएको छ । प्रदेश-प्रदेशको रिपोर्ट फरक छ, इपिडिमियोलोजी तथा सरुवा रोग नियन्त्रण महाशाखाका निर्देशक डा. वासुदेव पाण्डेले भने, ‘रिपोर्ट तयार पाररे मन्त्रालयमा दिएका छौँ, मन्त्रालयले अध्ययन गरेर सार्वजनिक गर्छ ।’

प्रारम्भिक प्रतिवेदनअनुसार प्रदेश २ र ३ मा संक्रमण समुदायस्तरमा फैलिएको छ । ‘प्रत्येक दिनको अपडेटले पनि प्रदेश २ र ३ मा समुदायस्तरमा देखिन्छ,’ उनले भने, ‘संक्रमण बच्चा, जयेष्ठ नागरिक, महिला, पुरुष सबैमा देखिएको छ ।’

संक्रमण समुदायमा फैलिएको हो होइन भनेर हेर्न सातै प्रदेशबाट ३ हजार १ सय ५० जनाको नमुना संकलन गरेको थियो । एउटा प्रदेशबाट ४ सय ५० जनाको दरले परीक्षण गर्न नमुना संकलन गरिएको थियो ।

सेरोप्रिभलेन्स सर्भेक्षणका लागि समुदायका मानिसबाट रगत लिइएको हो । ब्लड स्याम्पल लिएर भाइरसको एन्टिजेन अथवा एन्डिबडी छ छैन भनेर हेरिएको हो । यसलाई सेरोलोजिकल टेस्ट भनिन्छ । ‘यो सर्भेमा इमिनोग्लोबोलिम- एम (आईजीएम) र इमिनोग्लोबोलिम -जी (आईजीजी) छ छैन भनेर हेरिन्छ,’ त्रिभुवन विश्वविद्यालय माइक्रोबायोलोजी विभागका प्रमुख डा. मेघराज बन्जाराले भने, ‘कोही मान्छे कोरोना भाइरसबाट संक्रमित छ भने शरीरमा सुरुमा आईजीएम उत्पादन भएको हुन्छ । त्यसको केही समयपछि आईजीजी उत्पादन भएको हुन्छ ।’

विज्ञहरूले समुदायमा कोरोना भाइरस फैलिएको दाबी गर्दै आएका भने सरकारले क्लस्टरमा कोरोना फैलिएको बताउँदै आएको थियो । ‘उदयपुरबाट नै समुदाममा फैलिएको थियो । काठमाडौं उपत्यकामा जेठदेखि गयो । तीज र दसैँको समयमा व्यापक फैलियो,’ इपिडिमियोलोजी तथा सरुवा रोग अस्पतालका पूर्वनिर्देशक बाबुराम मरासिनीले भने, ‘सरकारले पहिला ढाँटेको हो ।’

उपत्यकामा चीनको वुहानभन्दा बढी भएको उनको भनाइ छ । ‘काठमाडौं वुहान भएको हो । वुहानमा ८० हजार बिरामी भए । उपत्यकामा २ लाख बढी संक्रमित भए । अब समुदायमा गएको हो होइन भनेर बहस गर्नु नै बेकार हो,’ उनले भने ।

गर्भवती महिला कोरोनाबाट मृत्यु भएको समयमा नै समुदायमा फैलिएको उनको बुझाइ छ । ‘काठमाडौंमा सुत्केरी भएकी सिन्धुपाल्चोकको महिलाको मृत्यु भयो त्यो समयमा नै समुदायमा फैलिएको थियो,’ डा. मरासिनीले प्रश्न गरे,’ ‘गर्भवती महिलामा कसरी संक्रमण भयो ?’

दसैँपछि भने संक्रमण घटेको डा. मरासिनीले बताए । ‘दसैँको समयमा धेरै मानिस बाहिर गए । कार्यालयमा भीड पनि कम भयो । व्यापारिक र संघसंस्था पनि बन्द भए । त्यसैले संक्रमण घटेको हो,’ उनले भने ।

रोगको नियम नै हाइमा पुगेर तल झर्ने रहेको उनी बताउँछन् । ‘काठमाडौंमा कम हुँदै गएको छ । रोगको नियम शिखरमा पुग्छ,’ उनले भने, ‘सगरमाथाको टुप्पोमा पुगेपछि जाने ठाउँ हुँदैन अनि झर्नै पर्छ । कोरोना पनि भएको त्यही हो ।’

प्रकाशित मिति: शुक्रबार, मंसिर १२, २०७७ १७:२९