जिल्लाको अनुभव बटुलेर पुन: केन्द्रमा फर्केको हुँ

dinesh-shrestha.jpg

A+ A A-

मंसिर १३ गतेको लागि तोकिएको नेपाल एद्योग वाणिज्य महासंघको निर्वाचनमा दिनेश श्रेष्ठले जिल्ला उपाध्यक्षमा उम्मेदवारी दिएका छन् । अघिल्लो कार्यकालमा जिल्ला नगर उपाध्यक्षमा नै हारेका उनले त्यसपछि बागमती प्रदेश उद्योग वाणिज्य संघको अध्यक्ष तथा काठमाडौं जिल्ला उद्योग वाणिज्य संघको अध्यक्षको भूमिका पाएका थिए । जिल्लाको अनुभव लिएर आएका कारण अब जिल्ला नगर उपध्यक्षमा आफू योग्य भएको दाबी गर्ने श्रेष्ठसँग शिलापत्रका भागवत भट्टराईले गरेको कुराकानी :

दोस्रो पटक जिल्ला नगर उपाध्यक्षमा प्रतिस्पर्धा गर्दै हुनुहुन्छ, अहिलेसम्मको तयारी कस्तो छ ?

तयारी राम्रो छ । साथीहरूमा उत्साह पाएको छु । जिल्लाका सबै साथीहरू मतदान गर्न आतुर हुनुहुन्छ । हाम्रो मान्छेभन्दा राम्रो मान्छे चाहिन्छ भन्नेमा सबै साथीहरूको एकमत भएको पाएको छु । कामका आधारमा उहाँहरूले सद्भाव व्यक्त गर्नुभएको छ । त्यसबाट उहाँहरू पनि उत्साहित हुनुहुन्छ म पनि उत्साहित भएको छु ।

तपाईं कसरी हाम्रोभन्दा राम्रो उम्मेदवार हुनुभयो ?

अहिलेसम्म मैले गरेको कामले प्रष्ट पार्छ । जिल्लाका अध्यक्षहरू जो हुनुहुन्छ, उहाँहरूले नै मलाई मत दिने हो । निजीक्षेत्रका लागि २० वर्ष दिएको योगदानको आधारमा, मैले व्यवसायको हकहितमा उठाएका विषयहरू छन् । यसै आधारमा नै उहाँहरूले मलाई राम्रो मान्छे ठान्नुभएको छ भन्ने मलाई लाग्छ ।

उहाँहरूले तपाईंको कामको कदर गरिने भनेर बचन पनि दिनुभएको छ । अझै पनि गर्नुपर्ने काम थुप्रै भएकाले मेरो आवश्यकता महसुस गरेको मैले पाएको छु ।

विगतमा वस्तुगत उपाध्यक्षमा काम गर्नुभयो । जिल्लामा अघिल्लो पटक पनि तपाईं पत्याइनु भएन । अहिले पनि जिल्ला नगर उपाध्यक्ष नै किन छनोट गर्नुभयो ?

जिल्ला नगरको साथीहरूको आग्रहअनुसार म उठेको हुँ । अघिल्लो पटक म झिनो मतले मात्र सफलता पाउन नसकेको हो । यो पटक फेरि जिल्ला नगरकै साथीहरूको चाहनाअनुसार आएको हुँ ।

विगतमा मैले हारेर पनि बागमती प्रदेशमा काम गर्ने अवसर दिन्छौँ भनेर लैजानुभयो । कामको दौरानमा थुप्रै जिल्ला नगरका साथीहरूसँग भेटघाट गर्ने अवसर पाएँ । समय परिस्थितिले गर्दा देशको राजधानी रहेको जिल्ला काठमाडौंमा पनि उद्योग वाणिज्य संघ खोलियो र त्यसको जिम्मेवारी नै मलाई दिइयो । त्यसमा पनि चुनाव लडेर जितेको होइन, सहमतिमा नै मलाई काम गर्न भन्नुभएको हो ।

जिल्लाको पनि अनुभव हासिल गर्ने अवसर मैले पाएँ । जिल्लाकै साथीहरूको अनुरोधमा मैले यो अवसर पाएको हुँ । त्यसैले अहिले मलाई चुनौती र अवसर दुवै छन् ।

सबै साथीलाई २० वर्षको अनुभवमा निजीक्षेत्रलाई परेका समस्याहरू आजसम्म जे-जे समाधान गरेको छु, यसको फेहरिस्त खुलाउनु पर्दैन । कर, भन्सार, बैंकसम्बन्धी हाम्रा सबैभन्दा ठूला समस्या हुन् । यी विषयमा मैले आवश्यक पहल गरेको छु । अहिले ती कुरा बुझेको मानिसको आवश्यकताअनुसार नै मलाई उठ्न भनिएको हो । मैले मात्रै चाहेर हुने होइन । साथीहरूले चाहेर हुने कुरा हो ।

राजनीतिका लागि म आएको होइन, मेरो गन्तव्य भनेको व्यवसाय नै हो, मेराे धर्म भनेको पनि व्यवसाय हो, मेरो कर्म भनेको पनि व्यवसाय नै हो । त्यस कारणले जनुसुकै आस्था, धर्म र संस्कृतिका साथीहरूले पनि मलाई सहयोग गर्ने आसमा म छु । किनभने मेरो गन्तव्य राजनीति होइन ।

जिल्ला नगरका विगतमा उम्मेदवारहरू विजयी भएका व्यक्तिहरू पनि हेरियो भने राजनीतिमा भिजेको मानिस नै हुनुहुन्छ ?

उद्योग वाणिज्य महासंघलाई राजनीतिबाट पृथक राख्नुपर्छ भन्ने हिसाबले हाम्रा पूर्वजहरूको चाहना छ । सदस्यसम्मका लागि हामीले कुनै पनि पार्टीकाे राजनीतिक आस्थाको आधार भएकाले पनि भाग लिन पाइन्छ । तर, पदाधिकारी हुनुपरेपछि हामीले राज्यसँग नै बसेर काम गर्नुपर्ने भएकाले महासंघ राजनीतिक फोहोर नबनोस् भन्ने विधानले नै व्यवस्था गरेको छ । राजनीतिमा लागेको व्यक्ति पदाधिकारी हुन पाइँदैन । त्यस कारण विगतमा पनि यस्ता उदाहरणहरू छन् ।

विशुद्ध व्यवसायमा लागेको, जिल्ला बुझेको जिल्लाकै मानिस हुनुपर्छ भनेका आधारमा पहिले मलाई जुन आदेश दिइएको छ, अहिले त्यहीअनुसार गरेको छु । पहिला जिल्ला बुझेर आऊ भन्ने आदेश दिएको ठानेर जिल्लालाई बुझेर आएका कारणले जिल्लाका साथीहरू खुसी छन् ।

लामो समयदेखि सक्रिय रूपमा लाग्नुभएको छ, राजनीति गर्ने थलो भयो भन्ने चिन्ता पनि छ, अनि दुई प्यानल बनाएर लड्नुभएको छ, योचाहिँ राजनीति होइन ?

यो एउटा प्राजातान्त्रिक प्रकियाका आधारमा लोकप्रिय मानिस छानिने हो । प्यानल भन्दैमा यहाँ राजनीतिक विचार र आस्थाको प्यानल छैन । हामीले आस्थाका आधारमा हेर्दैनौँ । हामी जुनसुकै आस्थामा भएको भए पनि व्यवसायीका समस्यामा सहयोग गर्ने हो । महासंघमा राजनीति हावी हुन दिनु हुँदैन र हामी गर्दैनौँ पनि ।

दुई समूह भएको आस्थाका आधारमा होइन । मेरो आग्रह साथीहरूलाई, टिमलाई जिताइदिनुस् भन्ने हो । हाम्रो टिमले जितेमा काममा डिस्टर्व गर्छौं भन्ने पनि सुनिएको छ । हाम्रो टिम राम्रो आएको छ, हामीले नेतृत्वलाई हटाउन सक्छौँ भन्दै दम्भ देखाइएको पनि छ । त्यो दम्भ हटाउनका लागि पनि हामीले जित्नुपर्छ ।

तपाईंले किन किशोर प्रधानको प्यानल छनोट गर्नुभयो ?

किशोर दाइ (किशोर प्रधान) र म मिलेर विगतमा पनि सरकारसँग लवि गर्ने कामहरू धेरै गरका छौँ । अहिले पनि किशोर दाइसहितको यो टिम काम गरेर आएको टिम हो । हामीले छनोट गरेका साथीहरू जोसुकै आऊन्, हामी हाम्रो भनेका छैनौँ । जिल्लामा सक्रिय भएका सक्षम व्यक्तिहरू जो व्यवसायमा जमेका र राम्रोसँग व्यवसाय गरेका व्यक्तिहरूलाई हामीले सदस्यको उम्मेदवार बनाएका छौँ ।

हाम्रो छनोट हुने पनि योगदानकै आधारमा हो । यसमा जतिसुकै मिडियाबाजी गरे पनि काम गरेर सक्षम भएका साथीहरूले काम गरेर सक्षम व्यक्तिहरूलाई नै छनोट गर्नुहुन्छ ।

किशोर प्रधानले २८ वर्षसम्म महासंघमा गरेको योगदानका कारण गत वर्ष हारेर पनि अर्को पक्षले पनि उहाँ चाहिन्छ भनेर अगाडि ल्याएको मानिस हो । नचाहिने भएको भएदेखि सायद विगतमा नै ल्याइँदैनथियो होला । त्यसैले हामी एक टिममा रह्यौँ ।

अवसरका हिसाबले तपाईं र किशोर प्रधानले त हारेर पनि अवसर नै अवसर पाउनुभयो नि ?
हो, हामीले मागेर भन्दा पनि साथीहरूले चाहिन्छ भनेर अवसर दिनुभएको हो । अहिले पनि हामीले अवसर पाउँछौँ भन्नेमा आशावादी रहेका छौँ । यो नै हाम्रो मुख्य ऊर्जा हो । चुनावका लागि एउटा टिममा बस्नुपर्ने हुन्छ । त्यसो हुँदा मात्रै काम गर्न सकिन्छ ।

म एक्लै महासंघमा केही होइन । मेरा टिमका सम्पूर्ण साथीहरू र मेरा अग्रज सबैको सहयोग पाइयो भने धेरै काम गर्न सकिन्छ । यो टिम हाम्रा उद्देश्य पूरा गर्न सफल हुनेछ ।

जिल्ला दौडाहा पनि सकिएको होला, कति प्रतिशत जिल्लाको मत आउँछ टिमलाई ?

यो चुनाव जतिसुकै गफ लगाए पनि एकदमै कडा प्रतिस्पर्धा हुनेछ । अझैसम्म साथीहरूको कुरा सुन्दा झिनो मतको अन्तरले मात्रै जीत-हार हुनछ । त्यसमा दुईमत छैन । अहिले प्रतिशत भन्न हतार नगरौँ ।

प्रकाशित मिति: शुक्रबार, मंसिर ५, २०७७ १९:२१