धेरैपछि स्कुल जाँदा अनौठो लाग्यो

A+ A A-

छ महिनासम्म पूर्ण लकडाउनपछि धेरै रमाइलो भयो । लकडाउनपछि स्कुल खुल्यो । यति लामो समयपछि स्कुल खुल्दा मलाई स्कुल जानै मन लागेन तर जानैपर्ने भएकाले म स्कुल गएँ ।

धेरै महिनापछि साथीहरूसँग भेट्दा मनमा अर्कै खालको आनन्द लाग्दोरहेछ । साथीहरू र शिक्षकहरूसँग भेटेर खुसी लाग्यो । तैपनि पहिलेजस्तो टिफिन साटासाट गर्ने, एउटै बेञ्चमा बसेर केही क्रियाकलाप गर्ने र खेलहरू खेल्ने कामहरू हुन पाएनन् ।

पहिले कुनै साथीले टिफिन लिन बिर्सिएमा बाँडीचुँडी खाने गर्थ्याैं तर अहिले त्यस्तो गर्न मिलेन । अहिले कुनै साथीले राम्रा केही चिजहरू ल्याए पनि हेर्न पाइँदैन । गर्मीमा त मास्क लगाउँदा पसिना आएर हैरान हुन्थ्यो । अहिले जाडो मौसम भएकाले त्यति अप्ठेरो हुँदैन ।

घोराही उपमहानगरपालिकाका केही विद्यार्थीको कोरोनाका कारण मृत्यु भएपछि फेरि सबै स्कुल बन्द भए । त्यसपछि हामी धेरै ठाउँमा घुम्न गयौँ । घुमेर रमाइलो गर्दागर्दै दसैँ आयो । दसैँको दिन मामाघर नगएर घरमा मात्रै मनायौँ । दसैँको दोस्रो दिन मात्रै मामा घर गयौँ ।

मामाघरमा मामा, माइजू र हजुरबुबा, हजुरआमासँग रमाइलो भयो । मामाघरमा मैले घाममा बसेर अमिलो खाएँ । मामासँगै खेतमा गएँ, खेत जोतिसकेपछि डल्ला फुटाउन लगाइने मुढोमा चढेर रमाएँ । म त्यसअघि कहिल्यै पनि मुढोमा बसेको थिइनँ । म मुढोमा साह्रै रमाएँ ।

मामाघरमा मैले माटाका सानासाना भाँडाहरू बनाएर खेलेँ । दसैँपछि फेरि स्कुल खुल्ने भएकाले म छिट्टै मामाघरबाट फर्किएँ । फेरि स्कुलमा जान पाइयो । स्कुलमा पहिले हरेक शुक्रबार रमाइला कार्यक्रम वा खेलकुद हुन्थे तर यस पटक कोरोनाका कारण नहुने भएको छ । ती रमाइला दिन कहिले आउलान् भनेर सोचिरहेको छु तर सोचेर केही काम छैन ।

स्कुलबाट घर आएर साबुनपानीले हात धुन्छु अनि नास्ता खान्छु । त्यसपछि होमवर्क गर्छु । होमवर्क सकेर बहिनीसँग खेल्छु, टीभी हेर्छु । फेरि बिहान उठेर हातमुख धोएर चियाखाजा खाएर पढ्छु । अनि खाना खाएर स्कुल जान्छु । कोरोनाका बीच मेरा दिनहरू यसैगरी बितिरहेका छन् ।

मेराे त अब एउटै सुझाव छ- कोरोनाबाट आफू सचेत बनौँ र अरुलाई पनि सचेत बनाऔं ।

प्रकाशित मिति: शनिबार, मंसिर ६, २०७७ ०७:०५