८ वर्षमा पनि बनेन बुटवल-बेलहिया सडक

A+ A A-

बुटवल बेलहिया व्यापारिक आयोजनाको २७ किलोमिटर सडक निर्माण हुन थालेको आठ वर्ष पुगे पनि अझै सम्पन्न भएको छैन ।

आर्थिक वर्ष २०६८/०६९ बाट निर्माण थालिएको यो सडक अझै चार किलोमिटर निर्माणको क्रममा छ ।

सडक निर्माण पूरा नहुँदै मर्मतमा भने तीन करोडभन्दा बढी खर्च भइसकेको छ । बुटवल-बेलहिया व्यापारिक आयोजनाका प्रमुख जयलाल मरासनीका अनुसार हालसम्म सडक मर्मतसम्भारमा ३ करोड ५० लाख रुपैयाँ खर्च भएको छ ।

नेपालकै दोस्रो ठूलो भन्सार बेलहिया नाकालाई पूर्वपश्चिम राजमार्गसँग जोड्ने सिक्स लेन सडकमा क्षमताभन्दा बढी लोडका भारवााहक गाडी गुडाउँदा ओभरलोडकै कारण बारम्बार मर्मत गर्नु परेको आयोजनाले जनाएको छ ।

५० टन क्षमताको आधारमा निर्माण भइरहेको सडकमा १ सय टन भारसहितका गाडी गुडाउने गरेका कारण सडक सम्पन्न नहुँदै भत्किने गरेको हो ।

सडक ऐनले २ एक्सल भार भएको ६ चक्के गाडीले १६ हजार २ सय केजी (गाडी समेत), ३ वटा एक्सल भएको १० चक्के गाडीले २५ हजार केजी (गाडी समेत), ४ वटा एक्सल भएको १२ चक्के गाडीले ३१ हजार केजी (गाडी समेत) र ४ वटा एक्सल भएका १४ चक्के गाडीले ४० हजार २ सय केजी (गाडी समेत) गरी गुडाउने मापदण्ड तय गरेको भए पनि यहाँ चल्ने गाडीहरूले १ सय टनसम्म अर्थात् १ लाख केजीसम्म तौलका भार ढुवानी गर्ने गरेका छन् ।

बेलहियाबाट बुटवलसम्मको करिब २४ किलोमिटर सडकमा लुम्बिनी रोडमा रहेका उद्योग र बुटवल बेलहिया सडकखण्डको किनारमा रहेका फलाम उद्योगहरूले सडकको क्षमताभन्दा कैयौँ गुणा बढी भार बोकेका कारण सडक निर्माण सम्पन्न नहुँदै विग्रदै गएको इन्जिनियर सुभेच्छा सारुले बताइन् ।

बुटवल बेलहिया सडकखण्डमा रहेका गोयन्का इन्फोटेक र एभरेष्ट रोलिङ मिलले चार वर्षअघि आयोजनालाई पत्र लेखेरै उद्योगको प्रवेशद्वारमा १ सय टन क्षमताका ट्रक प्रवेश गर्ने भएकोले सोही आधारमा प्रवेशद्वारमा कल्भर्ट निर्माणका लागि आग्रहसमेत गरेका थिए ।

आयोजनाले ३२ जेठ २०७३ मा जिल्ला प्रशासन कार्यालय रूपन्देही, जिल्ला प्रहरी कार्यालय रूपन्देही र यातायात व्यवस्था कार्यालय लुम्बिनीलाई पत्र लेखेर बेलहिया बुटवल सडकखण्ड निर्माणाधीन रहेको र सडकले १०.२ मेट्रिक टनभन्दा बढी भार थेग्न नसक्ने जनाउँदै बेलहिया नाकाबाट भित्रिने भारतीय गाडीले सडकले थेग्नै नसक्ने गरी भार बोकेर आउने गरेकोले सो नियन्त्रण तथा व्यवस्थापन गर्न आग्रह गरेको थियो । चार वर्षअघिको आग्रहको वेवास्ताकै कारण अहिले पनि सडक बिग्रिदै गएको छ ।

आयोजनाकाअनुसार बेलहिया बुटवल सडकखण्डको सडक डिजाईन गर्दा ५० टन क्षमताका आधारमा निर्माण भइरहेको छ । तर, सडकमा निर्वाध रूपमा १ सय टन क्षमताका गाडीहरू सोही बाराबरका भार बोकेर हिँडेपछि सडकको आयु खस्किने सम्भावना बढेको हो । ‘हामीले डिजाइन नै ५० टनको गरेका हाँै । यदि सय टनका गाडी गुडाउने हो भने डिजाईन परिवर्तन गरेर फेरि बनाउनुपर्‍याे,’ इञ्जिनियर सारुले भनिन् ।

लुम्बिनी ट्राफिक प्रहरी कार्यालय बुटवलका प्रहरी नायब उपरीक्षक डिल्ली पाण्डेले त्यस्ता ओभरलोड सवारीलाई भन्सारबाट प्रवेश नै रोक्नुपर्ने बताए । ‘हामीले हाम्रो तर्फबाट गर्ने कारबाही गरेकै छाैँ । तर, यसको नियन्त्रण भन्सार, यातायात विभाग, सडक विभागबाटै हुनुपर्छ,’ उनले भने ।

अदालतमा मुद्दा परेकाले ढिलाइ

करिब ५ अर्ब ९२ करोड लागतमा निर्माणाधीन सडकको ८ प्रतिशतको काम अझै बाँकी छ । बुटवल बजार क्षेत्रको सडकको मुद्दा अदालतमा पुगेकोले समयमै सडक निर्माण सम्पन्न हुन नसकेको आयोजना प्रमुख मरासनीले बताए । अदालतको फैसला वा आदेशविना नै सडक विस्तार गर्न नसकिने भएकाले अहिले अदालतको आदेश वा फैसला कुरेर आयोजना बसेको छ । लामो समयदेखि अदालतमा पुगेको मुद्दाको छिनोफानो नहुँदा सडक विस्तार रोकिनुका साथै लागत समेत वर्षेनी बढाइरहेको छ ।

त्यस्तै, फराकिलो सडक, डिइभाईडर र सर्भिस लेनमा हरियाली, विद्युतिय बत्तीले झलमल्ल बन्दै गएको सडकको समयमै काम पूरा नहुँदा निर्माण सकिएको क्षेत्रमा पनि सडकको सौन्दर्य बिग्रिँदै गएको छ ।

बुटवलको राजमार्ग चौराहादेखि भैरहवासम्म सम्पन्न भएको सडक बुटवल बजार क्षेत्र (चौराहा गोलपार्क) सम्मको सडक विस्तारको काम अगाडि बढ्न सकेको छैन । बेलहिया नाकादेखि बाइपाससम्म करिब ७ सय ५० मिटर सडकखण्ड पनि अलपत्र छ । निर्माणाधीन सडक चालू आर्थिक वर्ष भित्रै सम्पन्न गर्ने गरी काम भइरहेको आयोजनाले जनाएको छ ।

प्रकाशित मिति: शुक्रबार, मंसिर ५, २०७७ १३:००