कहाँ गए 'बाल टुरिस्ट गाइड' राहुल साहनी ?

A+ A A-

गत १६ कात्तिकदेखि बेपत्ता कपिलवस्तुका 'बाल टुरिस्ट गाइड'ले चिनिने राहुल साहनी अझै फेला परेका छैनन् । घरबाट पढ्न भन्दै कपिलवस्तुकै सिद्धार्थ विद्या मन्दिरमा हिँडेका उनी अहिलेसम्म बेपत्ता छन् । सोही विद्यालयमा कक्षा ६ मा पढ्ने राहुलले बुद्धजन्मस्थल लुम्बिनी र कपिलवस्तुको तिलौराकोट आउने पर्यटकलाई गाइडको काम गर्थे ।

आन्तारिक एव बाह्य पर्यटकलाई उनीहरूकै भाषामा गाइड गर्ने राहुल बेपत्ता भएको २० दिनभन्दा बढी भइसकेकाले खोजी गरिदिन परिवारले आग्रह गरेको छ । कपिलवस्तुको तौलिहवा घर भएका राहुलले अढाई वर्ष अघिदेखि गाइडको काम गर्दै आएका थिए ।

सानै उमेर आन्तारिक एवं बाह्य पर्यटकलाई गाइड गरेकै कारण साहनी चर्चामा थिए । १६ कात्तिकको बिहान ९ बजे घरबाट साइकल र झोला लिएर विद्यालय हिँडेका साहनी त्यही साँझ घर नफर्किएपछि परिवारले १७ कात्तिकमा जिल्ला प्रहरी कार्यालयमा छोरा राहुललाई खोजिदिन भन्दै निवेदन गर्दा गरेका थिए ।

राहुलका बुवा रिक्नु सहनीले अहिलेसम्म छोराका बारेमा केही जानकारी नआएकाले सबैलाई खोजीका लागि सहयोग गर्न आग्रह गरे । ‘स्कुल हिँडेको छोरा साँझसम्म नआएपछि जहाँतहीँ खोजी गर्‍यौँ । केही पत्ता नलागेपछि जिल्ला प्रहरी कार्यालय, कपिलवस्तुमा उजुरी दिएका हौँ,’ उनले भने ।

गाइडकै काम गरेर उठेको रकमबाट आफूलाई खर्च पुर्‍याउने राहुल कतै नहराई कसैले बेपत्ता पारेको हुन सक्ने उनले बताए । ‘अरूलाई गाइड गर्थ्यो । कतै गएर हराएको भने होइन,’ उनले भने, ‘कतै कसैले लगेर बेपत्ता पो बनाएकी !’

यता, जिल्ला प्रहरी कार्यालय कपिलवस्तुका प्रहरी नायब उपरीक्षक धर्मराज भण्डारीले राहुल बेपत्ता भएको बारेमा खोजी जारी रहेको बताए । ‘घटना क्रमअनुसार उनी बेपत्ता पारिएको नभई आफैँ कतै गएको जस्तो देखिन्छ । हामीले खोजी कार्य तीव्र पारेका छौँ,’ उनले भने ।

बजारमा जडित सीसीटीभी क्यामेरामा समेत उनले साइकल लिएर हिँडेको केही फुटेज देखिएकाले उनी कतै गएको हुन सक्ने प्रहरी नायब उपरीक्षक भण्डारीले बताए

साहनीको क्षमता

कक्षा ६ मा पढ्ने राहुलले बुद्धसँग सम्बन्धित र तिलौराकोटका विषयमा जानाकारी दिन सक्ने क्षमता थियो । बुद्धले २९ वर्ष बिताएको दरबारनजिकै घर रहेका राहुलले टुरिस्टलाई गाइड गरेरै आफ्नो अध्ययनका लागि आवश्यक खर्च जुटाउने गर्थे । विद्यालय समयमा विद्यालय जाने र छुट्टी भएपछि तिलौराकोटमा पुगेर गाइडको काम गर्थे ।

तिलौराकोटको पूर्वी द्वारदेखि पश्चिम द्वारसम्मका सबै पुरातात्त्विक वस्तुहरूको उनलाई ज्ञान थियो । तिलौराकोट उत्खनन‍्को सुरुवातदेखिको जानकारी उनलाई थियो । पाँचौँ शताब्दीमा चिनियाँ यात्री फाहियान र सातौँ शताब्दीमा ह्विन सानले तिलौराकोटको विषयमा लेखेका कुरा पनि उनले खर्रर बताउँथे ।

प्रकाशित मिति: मंगलबार, मंसिर २, २०७७ १३:४४