एसिड आक्रमणमा परेकी आरती भन्छिन्, 'श्रीमानले मार्न खोजे, ससुराले करणी प्रयास गरे'

एसिड आक्रमणमा परेकी आरती भन्छिन्, 'श्रीमानले मार्न खोजे, ससुराले करणी प्रयास गरे'

A+ A A-

एसिड आक्रमणमा परी घाइते बनेकी आरतीकाे टाउको, अनुहार, छाती र पेटसम्म घाउ छ । पाेलेकाे सहन नसकी घरीघरी उनी अचेत हुन्छिन् । शरीर जल्दाकाे पीडाले छटपटाइरहेकी उनी ‘माई गे माई’ अर्थात् आमाआमा भन्दै चित्कार गर्छिन् । र, बेड छेउमै बसेकी उनकी आमा छाेरीकाे अवस्था हेरेर आँसु राेक्न सक्दिनन्, तापनि उनकाे हात समाएर सान्त्वना दिने प्रयास गर्छिन्, ‘नानी तिमीलाई केही हुन्न । हामी छौँ नि ! डाक्टरसा'प पनि यहीँ हुनुहुन्छ । तिमी रोएपछि बच्चालाई कसरी सम्हाल्नु ?’

यी त बिरामीकाे आत्मविश्वास बढाउन सम्झाउने कुरा भए । वास्तवमा आरतीकाे शरीरमा एसिडको डढेलो निकै भयानक छ । डाको छोडेर रुँदै आरती भन्छिन्, ‘मलाई यतिदिनसम्म गाईभैँसीजस्तै पिटे पनि म सहेरै बसेँ । डरले म उसले हिँडने बाटाे नै हिँड्न छोडेकी थिएँ । मैले उसको के बिगारेकी थिएँ र ?'

उनलाई आफूभन्दा पनि आफ्नी छाेरीकाे चिन्ता ज्यादा छ । भन्छिन्, 'मलाई थाहा छ, म अब धेरै बाच्दिनँ । तर, उसलाई त्यसै नछाड्नू । छोरीकै लागि म यतिका पीडा सहेर बाँचिरहेकी थिए । तर, उसले मेरी छोरीलाई पनि छोडेन ।’

शनिबार बिहान श्रीमान सञ्जीव साहले जनकपुरधाम उपमहानगरपालिका–७ जानकीनगरस्थित माइत बस्दै आएकी आरतीलाई घरमै पसेर एसिड आक्रमण गरेका थिए । ‘जसरी पनि छोरीलाई राम्राेसँग हुर्काउने, पढाउने मेरो चाहना थियो', उनी मन्द सुनिइन्, 'मेरो छोरीको विवाहपछि म खुसीखुसी मर्न तयार थिएँ । त्यसपछि त उसले मलाई मारदिँदा पनि हुन्थ्यो । धन्य, रियाको हातमा मात्र एसिड परेछ, नभए म उतिखेरै मरिहाल्थेँ ।’

आरतीकै छाेरी रिया । उनी पनि घाइते भएकी छन् ।

दीपावलीको तयारी सकेर पूजा गर्न लागेका बेला आरतीलाई उनका श्रीमानले शनिबार बिहान करिब साढे ९ बजे एसिड आक्रमण गरेपछि तीन वर्षीया छोरीसँगै कीर्तिपुर अस्पतालमा उनी छटपटाइरहेकी छन् । उपचारमा संलग्न डाक्टरका अनुसार एसिड लागेर उनको शरीरको करिब २५ प्रतिशत भाग जलेको छ । छोरी रियाको शरीरमा पनि एसिड परेको छ । ‘म प्लास्टिकको बट्टा सफा गर्दै थिएँ ।अचानक घरमा पस्याे । स्टिलको गिलासमा केही लिएर आएकाे थियाे । छयाप्पै मुखमै फालेर भाग्याे । बछिटाले छोरीलाई पनि लाग्यो । म चिच्चाउन थालेँ । छोरी पनि चिच्याउन थालिन्’, उनले कहालीलाग्दाे त्याे क्षण सम्झिइन् ।

पहिलाे पटक हाेइन

त्यसाे त आरतीमाथि ज्यानै लिने खालकाे आक्रमण भएकाे याे पहिलाे पल्ट हाेइन । करिब ७ वर्षअघि जनकपुरधाम उपमहानगरपालिका–२० का सञ्जीवसँग आरतीको विवाह भएको थियो । तर, वर्ष दिन नबित्दै उनीहरूबीच सम्बन्ध चिसिन थाल्यो ।

‘जहिल्यै रक्सी र गाँजा खाएर आउँथ्याे । मलाई कुट्थ्याे । महिनैपिच्छे काम छोड्थ्याे र मसँग पैसा माग्थ्याे', आरतीले भनिन्, ‘तैपनि मैले आमा बुवालाई दुई वर्षसम्म केही भनिनँ । मलाई के भन्लान्, लाेग्नेकाे बेइज्जत हुन्छ भनेर चुप बसेँ । अन्तिममा सहन नसकेपछि मात्र आमालाई सबैकुरा बताएकी हुँ ।’

विवाह भएको दुई वर्षपछि सञ्जीव विदेश गए । त्यसपछि ससुरा सहदेवले आफूमाथि गलत नजरले हेर्न थालेको उनी सुनाउँछिन् । ‘मेरो कोठामा काठको गेट थिएन । कपडाको पर्दाले ढाकिएको थियो । श्रीमानले गेट नबनाइदिएपछि ससुरालाई पटक-पटक भनेँ तर उनले पैसा छैन भनेर धेरै बहाना बनाए’, उनले थपिन्, ‘म सुतेको बेला उनी कोठामा पस्थे । जबर्जस्ती गर्ने प्रयास गर्थे । ससुराबाट बँच्न अन्तिममा म भागेर माइत पुगेँ ।’

विदेशबाट करिब दुई वर्षमै फर्किएका सञ्जीव र आरती ससुरालीनजिकै पेठिया बजारमा डेरा लिएर बस्न थाले । त्यहाँ पनि उनीहरूबीचकाे झगडा साम्य भएन । भनाभनकै क्रममा सञ्जीवले आरतीलाई मट्टीतेल छर्केर आगो लगाउने प्रयास गरेका थिए । 'जिउमा मट्टितेल छर्केपछि जसोतसो भागेर ज्यान जोगाएकी थिएँ, आज यसरी तड्पिन रहेछ', उनले भनिन् ।

त्यसअघि सञ्जीव महोत्तरीको राम गोपालपुरमा सुनचाँदी पसलमा काम गर्न पुग्दा आरती पनि उनीसँगै गएकी थिइन् । तर, त्यहाँ पसलबाट चोरी गरेर उनी फरार भए । घरबेटीकाे भाडा नतिरेर उनले आफ्नी श्रीमतीलाई बन्धकी राखे । ‘घरबेटीकाे २० हजार रुपैँया घर भाडाकाे साटाे मलाई उनले बन्धकी राखेर हिँडे । पछि मेरी आमाले घरबेटीको पैसा तिरेपछि म त्यहाँबाट फर्केँ', उनले भनिन्, ‘सधैँ झगडा र मारपीट गर्न थालेपछि म माइतमै बस्न थालेँ । तैपनि उसले दुःख दिन छोडेन ।’

छोरीलाई राम्ररी हुर्काएर पढाउने सपना पूरा गर्न आफूले दाेस्राे बिहे नगरेको आरतीले बताइन् । 'फेरि त्यस्तै श्रीमान पाएँ भने सबैले सोच्लान् यो केटी नै खराब छे । त्यसैले मैले छाेरीकै लागि जिउने अठाेट गरेँ', आरतीले थपिन् ।

गएको फागुन महिनामा श्रीमानले कुटपिट गरेपछि उनले जिल्ला प्रहरी कार्यालयमा उजुरी समेत दिएकी थिइन् । यस विषयमा प्रहरी कार्यालयमा दुवै पक्षबीच छलफलसमेत भएको थियो ।

‘मेरी छोरी उसँग बस्दिनँ भनेर क्लियरै भइसकेकाे हाे । तर, उसले छाेटपत्र गर्न मानेन । उल्टै मेरो मोबाइलमा फोन गरेर पटक-पटक गालीगलौज र धाकधम्की दिइरह्याे’, उनकी आमा सुनिताले सुनाइन् ।

करिब एक वर्षदेखि माइत बस्दै आएकी आरती आफ्ना बुवासँगै बजारमा तरकारी व्यापार गरेर गुजारा चलाउँदै आएकी थिइन् ।

सञ्जीवले एसिड कहाँबाट ल्याए ?

जिल्ला प्रहरी कार्यालय धनुषाका अनुसार सञ्जीवले जनकपुरधाम उपमहानगरपालिका-४ स्थित किराना पसल सञ्चालक नागेन्द्र साहसँग एसिड किनेका थिए । उनैको बयानको आधारमा खोजतलास गरी छापा मार्दा उनको पसलबाट ५८ बोतल एसिड बरामद गरिएकाे छ । बियरको बोतलमा भरेर राखिएको एसिडका बोतलसहित साहलाई पक्राउ गरिएको धनुषाका प्रहरी उपरीक्षक रमेश बस्नेतले जानकारी दिए ।

उनका अनुसार एउटा बोतलमा ७ सय ५० एमएल मात्रामा एसिड भरेर राखिएको थियो । स्राेतका अनुसार सुनचाँदी पसलेलाई बेच्न एसिड ल्याएको भनी साहले प्रहरीसमक्ष बयान दिएका छन् । । साहले विराटनगरका एक व्यापारीबाट एसिड खरिद गरेको बताएका छन् । बरामद भएको एसिड करिब साढे ४३ लिटर रहेकाे प्रहरीले जनाएकाे छ । एसिड प्रहारबाट अङ्गभङ्ग बनाएमा २० वर्षसम्म कैद र बिनाअनुमति बिक्रीवितरण गर्नेलाई १० वर्षसम्म कैद सजाय कानुनले ताेकेकाे छ ।

प्रकाशित मिति: सोमबार, मंसिर १, २०७७ ०६:५७