दाजुबहिनी नै राष्ट्रिय खेलाडी : भाइटीकाको उपहार खेल सामग्री

A+ A A-

एलिना महर्जन र राकेश महर्जन दाजुबहिनी हुन् । यी दाजुबहिनी नै टेबुलटेनिसका राष्ट्रिय खेलाडी हुन् । अहिले राकेश टेबुलटेनिसको कोच हुन् । घरमा मात्र होइन, खेल क्षेत्रमा पनि दाजुबहिनी सँगैसँगै हुन्छन् । एलिनाले पढेको स्कुलमा दाइ कोच थिए । सुरुमा एलिनाले त्यति चासो दिएकी थिइनन् । बिस्तारै दाइकै प्रभावले उनी पनि टेबुलटेनिसमा तानिइन् ।

कोच भन्ने कि दाजु, एलिना कहिलेकाहीँ अलमलमा पर्छिन् । ‘कहिलेकाहीँ दाइ त हो नि भनेर सिरियस नहुने हुन्छ,’ दाइप्रति कृतज्ञ हुँदै एलिना भन्छिन्, ‘दाइकै प्रोत्साहनले खेलाडी बनेकी हुँ । दाइ कोच हुँदा राम्रो सहयोग, ज्ञान र खेल्न टेक्निकल सपोर्ट हुन्छ ।’

उनको खेल जीवनको गुरु नै दाजु भए । त्यसैले एलिनालाई तिहार पनि विशेष लाग्छ । उनी भाइटीकाको प्रतीक्षामा हुन्छिन् । ‘तिहार भन्नेबित्तिकै भाइटीका आउँछ । रंगोली बनाउने, झिलीमिली बत्ती बाल्न रमाइलो लाग्छ,’ एलिना भन्छिन्,’ ‘भाइटीकाको दिन झन् विशेष लाग्छ ।’

एलिनालाई जस्तो राकेशलाई खेल्न सहज थिएन । उनको समयमा परिवारलाई बुझाउन नै सकस थियो । तिनताक खेल भन्नेबित्तिकै परिवारले अनुहार खुम्च्याउँथे । तर राकेशले आफ्नो सपना त्यागेनन् । अनवरत उनी टेबुलटेनिसमै रहे । आज उनको परिवार पनि खुसी छ ।

‘सुरुमा सपोर्ट थिएन । अहिले राम्रो छ,’ पुराना दिनलाई स्मरण गर्दै राकेश भन्छन्,’ ‘मेरै कारण बहिनीहरू पनि खेलक्षेत्रमै लागेका हुन् ।’

‘दाजुबहिनी नै एउटै क्षेत्रमा कसरी सम्भव भयो ?’ यस प्रश्नमा राकेश भन्छन्, ‘एसएलसीपछि बहिनीको स्कुलमा कोच भएको थिएँ । परिवारलाई मनाएर सिकाएको हुँ । २००३ देखि खेल क्षेत्रमा पनि सँगसँगै छौँ ।’

रोचक त के छ भने उनको परिवार नै खेल क्षेत्रमा जोडिएको छ । एलिना माइली बहिनी हुन् भने कान्छी बहिनी पनि टेबुलटेनिसकै खेलाडी हुन् । कान्छी बहिनी अहिले अस्ट्रेलियामा छिन् । राकेशकी श्रीमती नविता श्रेष्ठ पनि टेबुलटेनिसकै खेलाडी हुन् । अहिले नविता पहिलो नम्बर, बहिनी एलिना दोस्रो नम्बरकी खेलाडी हुन् । कान्छी बहिनी तेस्रो नम्बरकी खेलाडी थिइन् ।

श्रीमती र बहिनीको फाइनल भिडन्त पर्छ । श्रीमती र बहिनी राष्ट्रिय खेलमा पाँच पटक भिडिसकेका छन् ।

‘त्यो बेला कसलाई सपोर्ट गर्नुहुन्छ त ?’ प्रश्नले उनी धर्मसंकटमा पर्छन् । भन्छन्, ‘अक्सर फाइनलमा उनीहरू नै पुग्छन् । जसले जिते पनि फरक पर्दैन । घरकैले जित्ने हो ।’

तीनै जना नेपाल पुलिससँग आवद्ध छन् । टेबुलटेनिसतर्फ राकेशको परिवारकै वर्चस्व छ । ‘राम्रो खेल भएकै कारण पुलिसले लिएको हो । पुलिसका लागि नै खेलिरहने छाैँ,’ राकेश भन्छन् ।

राकेशलाई पनि तिहारको भाइटीका विशेष लाग्छ ।

राकेशले टेबुलटेनिस खेलाडी रबिना देसारलाई पनि बहिनी बनाएर भाइटीका लगाइरहेका छन् । रबिना यसपालि दुबईमा छिन् ।

अघिपछि खेल र ट्रेनिङमै सबै जना ब्यस्त हुन्छन् । भाइटीकाको दिन राकेशको घरमा खेलाडी नै खेलाडी हुने भएकाले थप रमाइलो माहाैल बन्छ ।

‘तिहारमा बहिनीलाई के उपहार दिनु हुन्छ त ?’

‘पहिले खेलसामग्री, के आवश्यक छ त्यो दिन्थेँ । अहिले पैसा, लुगा दिन्छु,’ मुस्कुराउँदै उनी भन्छन्, ‘सबैभन्दा धेरै आशीर्वाद । मैले बहिनीलाई, बहिनीहरूले मलाई ।’

यो वर्ष भने उनीहरूको टीका छैन । बाजे बित्नुभएकाले परिवार शोकमा छ । टीका नभए पनि दाजुबहिनीको माया, सद्भाव, आशीर्वाद र सम्बन्ध भने प्रागाढ छ ।

अन्त्यमा एलिनाले भनिन्, ‘दाइले सोचेका सबै इच्छा पूरा हुन् । बहिनीको प्रार्थना छ ।’

प्रकाशित मिति: शनिबार, कात्तिक २९, २०७७ ०८:०२