ओली किमाथांका उडेका बेला प्रचण्डको आक्राेश : पार्टी फुट्न सक्छ, तर अब हामी माओवादीमा फर्कन्नौँ

ओली किमाथांका उडेका बेला प्रचण्डको आक्राेश : पार्टी फुट्न सक्छ, तर अब हामी माओवादीमा फर्कन्नौँ

A+ A A-

भूपि शेरचनले तीन दशकअघि नै चिसो एस्ट्रे संज्ञा दिएको सहर हो, राजधानी काठमाडौं । चिसिँदो हिउँदबीच यो उपत्यका यतिखेर नेकपा विवादले बढ्तै रापिएको छ ।

प्रधानमन्त्री केपी ओलीलाई सायद थप शीतल हावा चाहियो । उनी दोस्रो मिर्गौला प्रत्यारोपणपश्चात् बुधबार पहिलोपल्ट काठमाडौं बाहिर निक्ले । कुनै खास एजेन्डा थिएन, तर चिनियाँ सीमा नाका किमाथांका पुगिछाडे ।

खिचातानीका बेला अर्थ अनेक लाग्छन्, लगाइन्छन् । चीनभन्दा कम छैन, चिनियाँ नाका । बीओपी उद्घाटन, अरुण तेस्रो निरीक्षण, अनि किमाथांका जोगवनी करिडोर - यीचाहिँ झट्ट हेर्दा देखिने एजेन्डाहरू । याद रहोस्, भोलि बिहीबारका लागि उनी इतर पक्षले नेकपा सचिवालय बैठक डाकेको छ ।

यो संयोग होइन । पहिलो वरीयताका अध्यक्ष संखुवासभा उडेका बेला दोस्रो वरीयताका अध्यक्ष सक्रिय भइहाले ।

ओलीले करिब उपाध्यक्ष बराबर व्यवहार गरिरहेका पुष्पकमल दाहाल प्रचण्डले बुधबार साँझ आफूनिकट युवा र विद्यार्थी भ्रातृ संस्थाका शीर्षस्थ नेताहरूलाई खुमलटार निवास डाके । ओलीले किमाथांका पुगेर आफू पार्टी र सरकार दुवैतर्फ सक्रिय नेतृत्वमा रहने, आफूलाई हटाउने अरूको षड्यन्त्र सफल हुन नदिने बताउँदै गर्दा यता प्रचण्ड आफूनिकटसँग आक्रोश पाेख्दै थिए ।

प्रचण्डले भने, ‘पार्टी नफुटोस् भन्ने हाम्रो चाहना छ । हामी पार्टी फुटाउँदैनौँ पनि । तर पार्टी फुट्ने स्थिति आयो भने हामी पूर्ववत् माओवादी भएर अब बस्दैनौँ ।’

एकता जाेगाउन आफूले पटकपटक सम्झाैता र समर्पण गरेकाे भन्दै अब याेभन्दा निहुरिन खाेजे आफ्नाे र आन्दाेलनकाे ढाडै भाँचिने उनले तर्क गरे । उनले विगतकाे कुनै पनि सहमति ओलीबाट पालना नभएकाे राेषसमेत पाेखे ।

ओलीले पार्टी फुटाउन चाहे पहिलेझैँ एमालेका रूपमा उदाउन नसक्ने उनले ठोकुवा गरे । पूर्वएमाले पक्षको ओलीइतर कित्ता अब कुनै पनि हालतमा ओलीसँग मिल्न नसक्ने बुझाइमा प्रचण्ड छन् । उनका अनुसार, उनलाई माधवकुमार नेपाल, वामदेव गौतम, झलनाथ खनालले यो आश्वासन दिइसकेका छन् ।

ओलीजस्तै छन्, प्रचण्ड । जस्तोसुकै अर्थ लागोस्, यी दुवै ‘कार्यकारी अध्यक्षहरू’ भाषा प्रष्ट बोल्छन् । बुधबार साँझ भने विद्यार्थी, युवाहरू उनको कुरा सुनेर केहीबेर अल्मलिए ।

प्रचण्ड आफैँले फुकाए, ‘हामी समाजवादी भएर बस्छौँ । माधवजी, वामदेवजी, झलनाथजीहरूको पनि कुरा त्यही छ । समाजवादी आन्दोलन धरापमा पर्‍यो, हामी मिलेर जोगाऔँ भन्नेमा उहाँहरू पनि हुनुहुन्छ ।’

पार्टी सचिवालयभित्र ओलीइतरका नेताहरूबीच एक भएर जानेमा ‘उच्चतम् समझदारी बनेको’ प्रचण्डले सुनाए । प्रचण्ड भेट्न गएका युवा नेताहरूका अनुसार उनी केही सातायताको समझदारी कायम रहनेमा ढुक्क छन् । बिहीबार बस्ने भनिएको सचिवालय बैठकमा त्यो एकता उही रूपमा झल्किने उनको हदैसम्म विश्वास छ ।

तर, वामदेव गौतमका कारण अलिकति संशयमा देखिन्छ खुमलटार । बुधबारै वामदेवको पक्षमा हुनेगरी सर्वोच्च अदालतको फैसला आएको छ । ओलीसँग अन्तिममा खेल्न मिल्ने वामदेव कार्ड अझै पनि बाँकी छ । ओलीले हरियो बत्ती बाले उनी क्याबिनेटमा शक्तिशाली उपप्रधानमन्त्री बन्न सक्छन् । वामदेवलाई खुसी हुन ठूलो कुरो चाहिँदैन पनि ।

अरू नेताहरूबीच प्रचण्डको जुन गतिशील छवि (अविश्वसनीय भन्न मिल्छ) छ, त्योभन्दा ‘गतिशील’ छन्, वामदेव ।

दुई अध्यक्षबीच चरम असमझदारीबीचको ‘बैठक बोलाउने समझदारी’ ठोस भएमा महासचिव विष्णु पौडेलले सचिवालय डाक्नेछन् । ९ सदस्यीय सचिवालयमा ६–३ को समीकरण थियो । प्रचण्ड पक्षका नेता रामबहादुर थापा बादललाई ओलीले आफूनिकट बनाइदिए । नेकपा नेता अजम्बर काङमाङ राई भन्छन्, ‘५–४ को स्थिति छ अहिले । एक जना मात्रै नेता दायाँबायाँ हुँदा स्थिति उल्टिन पनि सक्छ ।’

यो बेला प्रचण्डलाई अचानक ‘समाजवाद’ को चिन्ता हुन गएको छ । उनी ओलीबाट समाजवादको रक्षा नहुने भन्दै आन्दोलन जोगाउन समाजवादीहरू चिन्तित हुनुपर्ने जिकिरमा छन् । जबकि यो यथार्थ छिपेको छैन, उनी खानेपानीमन्त्री बिना मगरलाई क्याबिनेटमा कायम राख्न चाहन्छन्, माओवादीबाटै गएका उद्योगमन्त्री लेखराज भट्टलाई चाहिँ फ्याँक्न । प्रचण्डनिकट हरिबोल गजुरेल, देवेन्द्र पौडेलहरू यो बीचमा उनीसँग केही दूरीमा छन् । स्रोतका अनुसार, यो अंकगणितीय हिसाबकिताब बुझेका ओलीले तिनलाई मन्त्री बनाउने आश्वासनको तुरुप पनि फालिसके । अनि प्रचण्डनिकट ऊर्जामन्त्री वर्षमान पुन पनि यो बीचमा धरमर भइसकेका छन् । यसर्थ ‘समाजवाद’ को यात्रा सजिलो छैन ।

ओलीले प्रचण्डलाई भनिसकेका छन्, ‘तपाईं दुई मन्त्री हटाउन चाहनुहुन्छ । ठीकै छ, म तीनै जना हटाइदिन्छु ।’ ओलीले त्यो संकेत बिना मगरतर्फ गरेका हुन् ।

प्रचण्ड जतिसुकै क्यारेटका कार्यकारी होउन्, ओली त प्रचण्ड भेट्न किमार्थ खुमलटार जानेवाला छैनन् । यो उनको स्वभावमा पर्दैन ।

यस्तोमा प्रचण्ड नै बालुवाटार जानुपर्ने हुन्छ । के उनीहरूको आगामी बालुवाटारे बैठकले नेकपाको तिक्तता मेटाउन सक्ला ?

चिनियाँ नाकाबाट बहेर आएको उत्तरी हावा र प्रचण्डको अतिरिक्त आत्मविश्वास टक्कराउँदा नेकपाभित्रको समीकरण कुन अवस्थामा रहला ?

टुंगो त छैन । तैपनि नतिजा थाहा पाउन हामी नेकपाको सचिवालय बैठकसम्म कुरौँ । याद गरौँ, बहुमत जोसुकैसँग होओस्, दुई ‘कार्यकारी अध्यक्ष’ मिलेर महासचिवलाई निर्देशन नदिँदासम्म यो बस्नेवाला छैन । बसे पनि त्यसको वैधानिकतामाथि प्रश्नहरू उठ्ने छन् ।

बिहीबारको बैठकमा पनि उही कथा नदोहोरिएला भन्ने के छ र ! उही क्या, मंगलबार धुम्बाराहीमा भेला भएर पनि बैठक बस्न नसकेको कथा ।

प्रकाशित मिति: बुधबार, कात्तिक २६, २०७७ २०:५८