कोरोना रिपोर्टमा सिटी भ्यालु धेरै र कम हुँदा के हुन्छ ?

A+ A A-

कोरोना भाइरस (कोभिड–१९) को रिपोर्टमा सिटी भ्यालु समावेश गरिएको हुन्छ । सिटी भ्यालु ३० भन्दा बढी र ३० भन्दा कम भयो भने त्यो महत्त्वपूर्ण मानिन्छ । शुक्रराज ट्रपिकल तथा सरुवा रोग अस्पताल टेकुमा परीक्षण गराउने मध्ये पछिल्लो समय सिटी भ्यालु बढी भएका संक्रमित पाइएको छ ।

टेकु अस्पतालका प्रवक्ता डा.अनुप बाँस्तोलाले अस्पतालमा सिटी भ्यालु बढी भएका संक्रमित रहेको बताए । टेकु अस्पतालमा कात्तिक १ गतेदेखि १० गतेसम्म परीक्षण गराउनेको सिटी भ्यालु ३६ प्रतिशतको सिटी भ्यालु ३० भन्दा बढी थियो । तर ११ गते देखि १६ गतेको तथ्यांकमा परीक्षण गराउने मध्ये ५१ प्रतिशतको सिटी भ्यालु ३० भन्दा बढी थियो । यो टेकु अस्पातलको मात्र डाटा हो । समुदाय र अन्य अस्पतालको भने होइन ।

के हो सिटी भ्यालु ?

सिटी भ्यालु भनेको पीसीआरको साइकल थ्रेसहोल्डको भार हो । जस्तै : चिनी धेरै छ भने एक थोपा खाए पनि थाहा हुन्छ । फिक्का छ भने चिनीको स्वाद आउँदैन तर चिनी हुन्छ । पीसीआर गर्दा साइकल लोड बढी रहेछ भने छिटै देखिन्छ । भाइरल लोड धेरै रहेछ भने धेरै पटक गर्नुपर्ने हुन्छ । जस्तै : १२ पटक साइकल गर्दा ज्वरो देखियो भने १२ सिटी भ्यालु हुन्छ । कम हुँदै गएको छ भने १६ पटक साइकल गर्दा देखियो भने सिटी भ्यालु १६ हुन्छ । जति धेरै भाइरुस लोड भयो त्यति छिटो डिटेक्ट हुन्छ । ४० भन्दा माथि सिटी भ्यालु देखियो भने नेगेटिभ देखिन्छ ।

सिटी भ्यालु जति माथि बढ्दै गयो त्यो व्यक्तिमा भाइरस लोड कम हुँदै गएको बुझिन्छ । २५ भन्दा कम सिटी भ्यालु भएकोमा जति भाइरस हुन्छ । ३३ भन्दा बढी सिटी भ्यालु भयो भने भाइरस धेरै कम हुन्छ । सुरुमा परीक्षण गर्दा सिटी भ्यालु बढी हुन्छ तर १४ दिनपछि परीक्षण गर्दा सिटी भ्यालु पनि बढ्छ ।

यदि समुदायमा व्यक्तिको जाँच गर्दा सिटी भ्यालु धेरै देखियो भने सन्चो हुनेको संख्या बढेको रहेछ भन्ने बुझिन्छ । सिटी भ्यालु कम भएका व्यक्ति समुदायमा भेटिएन भने सिटी भ्यालु समुदायबाट हट्दै गएको छ भन्ने बुझ्न सकिन्छ । तर स्याम्पल कहिले लिएको छ, प्रोसेसिङ कसरी भएको छ र परीक्षणको टेक्निक्समा पनि सिटी भ्यालु देखिन्छ ।

नाकबाट लिएको हो कि घाँटीबाट त्यसको आधारमा पनि सिटी भ्यालु देखिन्छ । एउटै मान्छेको नाक र घाँटीबाट स्याम्पल लिँदा सिटी भ्यालु फरक आउन सक्छ । घाँटीबाट लिएकोमा सिटी भ्यालु बढी र नाकबाट लिएकोमा कम सिटी भ्यालु देखिन सक्छ । पहिलो पटक संक्रमित भएको व्यक्तिले दोस्रो वा तेस्रो पटक परीक्षण गराएकाले पनि सिटी भ्यालु बढेको देखिन्छ ।

परीक्षणको २ हजार शुल्क तोकिएपछि नयाँ भन्दा पहिले संक्रमित भएका पुनः परीक्षणका लागि आएकाले सिटी भ्यालु बढी हुनेको संख्या बढेको हो । तर समुदायमा सिटी भ्यालु बढी भएका व्यक्ति धेरै भेटियो भने समुदायबाट बिस्तारै संक्रमण हट्दै गएको छ भन्ने संकेत गर्छ ।