म्युजिक भिडियोमा फिल्मकर्मी

A+ A A-

लकडाउनका कारण चलचित्र क्षेत्र ठप्प हुँदा अभिनेता विपिन कार्कीले काम गर्न पाएनन् । उनी लामै समय फुर्सदिला बने । अनि उनलाई डर भयो, कतै म पनि खुकुरी जस्तै भुत्ते हुने त हैन ?

‘खुकुरीलाई लामो समय प्रयोगमा ल्याइएन भने त्यो आफैँ भुत्ते हुन्छ नि । हामी कलाकारले पनि लामो समय काम नगर्दा भुत्ते हुने डर भयो,' उनी भन्छन् ।

चलचित्र क्षेत्र ‘पज’ भएको समयमा पनि म्युजिक भिडियो क्षेत्र भने चकाचक चलिरहेको थियो । विपिनलाई म्युजिक भिडियोबाट पनि अफर उत्तिकै थिए । बिना काम बस्नु पर्दाको छटपटी भिडियोमा काम गरेर मेट्ने उद्येश्यले विपिन भिडियोमा काम गर्न तयार भए । ‘मलाई त केही समय काम नगर्दा छटपटी नै भयो । म जस्तै अरुलाई पनि छटपटी भएकै थियो होला । त्यसैले काम गर्ने तलतल मेट्नलाई भिडियो रोजेँ,' विपिन भिडियोतर्फ मोहित हुनुको कारण सुनाउँछन् ।

विपिनलाई धेरै गीतको अफर थिए । त्यसैले विपिनले अब उत्कृष्ट छनोट गर्न लागे । सुरुमा शब्द सुने । शब्द मन परेका गीतको लागि निर्देशकसँग बसेर भिडियोको कन्सेप्ट बुझे । समय परिवेश सुहाउँदो गीत र भिडियो बन्ने देखेपछि विपिनले गरे- ‘डर छैन ।'

यस भिडियोबाट पनि विपिनको तारिफ नै भयो । त्यसपछि विपिनले केही फरक भूमिका देखाउन सक्ने गीत तथा भिडियो रोजे र काम गरे । विपिन भन्छन्, ‘मैले म्युजिक भिडियोलाई म्युजिक भिडियो भनेर काम गरिन् । मैले छोटो चलचित्र सोचेर कथा बोकेका गीतहरुमा नै काम गरेको छु ।’

म्युजिक भिडियो गरेर विपिन उत्ति सन्तुष्ट भने हुन सकेका छैनन् । तर, अभिनयको तलतलले उनलाई भिडियोमा काम गर्न बाध्य बनाएको छ । अभिनयको भोकले नै भिडियोमा काम गरेको विपिन बताउँछन् । ‘मेरो रोजाई यो होइन के’, विपिन भन्छन्, ‘भन्न त अभिनय हो, चलचित्र, नाटक वा भिडियो जहाँ गरे पनि हुन्छ भन्ने होला । तर, चलचित्र र भिडियोमा काम गर्दा पक्कै फरक हुन्छ नै ।’

म्युजिक भिडियोबाट नै चलचित्रमा क्षेत्रमा प्रवेश गरेर आफ्नो परिचय बनाएकी अभिनेत्री स्वस्तिमा खड्का पनि अहिले भिडियोमा निकै व्यस्त बनेकी छिन् । आफ्नो धरातल नै म्युजिक भिडियो भएकाले पनि उनी यो फुर्सदको समयमा भिडियोमा काम गर्न तयार भइन् ।

म्युजिक भिडियो पनि कला देखाउने ठाउँ भएकाले चलचित्रमा काम गरेका कलाकारले गर्नै नहुने भन्ने नभएको स्वस्तिमा बताउँछिन् । उनी भन्छिन्, ‘कला त जुनसुकै माध्यमबाट पनि देखाउन सकियो नि । तर, चलचित्र भएको समयमा म चाहिँ म्युजिक भिडियोमा काम गर्दिनँ ।’

स्वस्तिमा चलचित्रमा भन्दा म्युजिक भिडियोमा काम गर्न सहज हुने बताउँछिन् । जिम्मेवारी पनि चलचित्रमा भन्दा म्युजिक भिडियोमा कम हुने स्वस्तिमाले बुझेकी छिन् । ‘चलचित्रमा जस्तो लामो समय भिडियोलाई दिनु पर्दैन । भिडियो भनेको त १/२ दिनको काम हो’, स्वस्तिमा थप्छिन्, ‘भिडियोमा त टिम पनि सानो हुने भएकाले काम गर्न पनि सजिलो नै हुन्छ ।’

स्वस्तिमालाई व्यक्तिगत रुपमा म्युजिक भिडियोमा काम गर्न मज्जा लाग्छ । छोटो समयमा नै काम सकिने, कुनै तनाब बिना सहज काम गर्न सकिने भएकाले म्युजिक भिडियोमा काम गर्न स्वस्तिमालाई रमाइलो नै लाग्छ ।

तर, चलचित्रमा काम गर्दाको जस्तो सन्तुष्टि भिडियोबाट नमिल्ने स्वस्तिमा बताउँछिन् । उनी भन्छिन्, ‘चलचित्र र भिडियोमा काम गर्ने तरिका नै फरक हुन्छ । चलचित्रमा त वर्कसप हुन्छ, लामो समय काम हुन्छ, ठूलो टिम हुन्छ । त्यसैले धेरै कुराहरु पनि सिकिन्छ । त्यो मौका भिडियोमा मिल्दैन ।’

कुनै समय म्युजिक भिडियोमा नै व्यस्त रहेकी स्वस्तिमा बीचमा केही समय चलचित्रमा व्यस्त रहिन् । त्यसैले म्युजिक भिडियोमा उनको केही समय ‘ब्रेक’ भयो । अहिले चलचित्रको काम नहुँदा उनी भिडियोमा आकर्षित भएकी हुन् । अहिले भिडियोका काम गर्दा चलचित्रलाई असर नगर्ने भएकाले पनि निरन्तर काम गरिरहेको स्वस्तिमा बताउँछिन् ।

स्वस्तिमा पनि कामको भोक मेट्न र फुर्सदको समय भएकाले भिडियोमा निरन्तर काम गरेको आशय बोल्छिन् ।

यता अभिनेता नाजिर हुसेन आफूलाई हरेक क्षेत्रमा काम गर्न उत्तिकै मज्जा लाग्ने बताउँछन् । म्युजिक भिडियो पनि उनको रुचिको क्षेत्र नै हो । त्यसैले आफूले निरन्तर काम गरिरहेको नाजिरको भनाई छ ।

नाजिरले लकडाउन अगाडिदेखि नै म्युजिक भिडियोको काम सुरु गरिसकेका थिए । म्युजिक भिडियोमा आकर्षित हुनुको मुख्य कारण थियो- डान्स ।

नाजिरलाई डान्स खुबै मन पर्थ्यो । चलचित्रमा पाएको भूमिका अनुसार उनले नाच्न पाउँदैनथे । भिडियोमा नाच्न पाउने भएपछि उनी भिडियोतर्फ आकर्षित भएको बताउँछन् । भन्छन्, ‘डान्स नै हो, जसले मलाई म्युजिक भिडियोसम्म पुर्‍यायो ।’

नाजिर भिडियो र चलचित्रमा काम गर्दा फरक अनुभव गरे पनि उत्तिकै मिहिनेत गर्नुपर्ने बताउँछन् । ‘म्युजिक भिडियोमा सानो टिम हुन्छ, चलचित्रमा ठूलो टिम हुन्छ,' नाजिर भन्छन्, ‘तर, लामो समय काम हुने चलचित्रको लागि जति मिहिनेत गरिन्छ भिडियोमा पनि सोही अनुसारको मिहिनेत गरिएको हुन्छ । निर्देशकहरुले एक सातासम्म त्यसको लागि तयारी गर्नुहुन्छ ।’

आफू कलाकार भएकाले नाटक होस् वा रेडियो नाटक, चलचित्र होस् वा भिडियो । जुनसुकै काम गर्दा आफूलाई मज्जा लाग्ने नजिरको भनाइ छ । उनी भन्छन्, ‘हामी कलाकारको काम भनेको कला देखाउने नै हो । हामीले जुनसुकै माध्यमबाट काम गरे पनि गरेको कामबाट त सन्तुष्टि नै भइन्छ नि ।’ यस्तो संकटको समय निरन्तर काम पाइराखेकोमा नाजिर निकै खुसी छन् ।

चलचित्रमा जस्तै भिडियोमा पनि नाजिर भिन्न-भिन्न भूमिका गर्न रुचाउँछन् । त्यही अनुसार मिहिनेत पनि गर्छन् । ‘मैले केही न केही फरक देखिने प्रयास गरेकै हुन्छु । तर, प्राय: गीतहरु डान्सिङ भइदिने भएकाले नाच्दा उस्तै देखिन सक्छ । आगामी दिनमा पनि पक्कै फरक गर्ने प्रयासरत हुनेछु,' नाजिरले भने ।

नाजिर चलचित्र क्षेत्रका मान्छेले नै म्युजिक भिडियोलाई नराम्रो मान्ने गरेको गुनासो पनि सुनाउँछन् । म्युजिक भिडियो भन्ने वित्तिकै नाक खुम्चाउने चलन भएको उनको गुनासो छ । भन्छन्, ‘हाम्रो कला क्षेत्रलाई नै बाहिरबाट हेर्ने नजर राम्रो छैन । त्यो माथि हामीले हाम्रै क्षेत्रको मान्छेले गरेको काममा नाक खुम्च्याउनु त राम्रो भएन नि ।’

प्रकाशित मिति: सोमबार, कात्तिक २४, २०७७ १०:१३