समुदायबाट संकलन गरिएको स्याम्पल प्रयोगशालामा थन्कियो

A+ A A-

कोरोना भाइरस (कोभिड–१९) समुदायमा फैलिएको हो होइन भनेर हेर्न संकलन गरिएको स्याम्पल राष्ट्रिय जनस्वास्थ्य प्रयोगशालामा थन्किएको छ । डब्लूएचओले परीक्षण गर्ने रिएजेन्ट पठाउन ढिला गरेका कारण दसैँ अगाडि नै सातै प्रदेशबाट संकलन गरिएको स्याम्पल राष्ट्रिय जनस्वास्थ्य प्रयोगशाला टेकुमा थन्किएको हो ।

सेरोप्रिभलेन्स सर्भेक्षणका लागि समुदायका मानिसबाट रगत लिइएको हो । रगतबाट कोरोना भाइरस समुदायमा फैलिएको छ छैन हेरिनेछ ।

इपिडिमियोलोजी तथा सरुवा रोग नियन्त्रण महाशाखाले सातै प्रदेशबाट ३ हजार १ सय ५० जनाको स्याम्पल संकलन गरेको हो । एउटा प्रदेबाट ४ सय ५० जनाको दरले परीक्षण गर्न स्याम्पल संकलन गरिएको छ ।

राष्ट्रिय जनस्वास्थ्य प्रयोगशालाकी निर्देशक डा.रुणा झाले १०/१२ दिनपछि परीक्षण सुरु गरिने बताइन् । ‘स्याम्पल प्रयोगशालामा छ । परीक्षणका लागि रिएजेन्ट चाहिन्छ । त्यो डब्लूएचओले दिने हो । डब्लूएचओमार्फत रिएजेन्ट हिजो आएको छ । अब १०/१२ दिनमा परीक्षण सुरु हुन्छ,’ उनले भनिन् ।

समुदायका मानिसको ब्लड स्याम्पल लिएर भाइरसको एन्टिजेन अथवा एन्डिबडी छ छैन भनेर हेरिन्छ । यसलाई सेरोलोजिकल टेस्ट भनिन्छ । ‘यो सर्भेमा इमिनोग्लोबोलिम– एम (आईजीएम) र इमिनोग्लोबोलिम –जी (आईजीजी) छ छैन भनेर हेरिन्छ,’ त्रिभुवन विश्वविद्यालय माइक्रोबायोलोजी विभागका प्रमुख डा.मेघराज बन्जाराले भने, ‘कोही मान्छे कोरोना भाइरसबाट संक्रमित छ भने शरीरमा सुरूमा आईजीएम उत्पादन भएको हुन्छ । त्यसको केही समयपछि आईजीजी उत्पादन भएको हुन्छ ।’

उनका अनुसार नेपालमा कोरोना संक्रमणको दर कति छ ? कतिलाई लक्षण देखियो, कतिलाई देखिएन भनेर हेर्नका लागि पनि प्रयोग गरिन्छ । ‘लक्षण नभएको केस छ भने पनि यो आईजीएम र आईजीजी टेस्टबाट थाहा हुन्छ,’ डा. बन्जाराले भने, ‘कोरोना संक्रमणको वास्तविक दर पत्ता लाग्छ ।’ इपिडिमियोलोजी तथा सरुवा रोग नियन्त्रण महाशाखा, राष्ट्रिय जनस्वास्थ्य प्रयोगशाला र डब्लूएचओको सहयोगमा समुदायमा सर्भे गर्न लागिएको हो ।

विज्ञहरूले समुदायमा कोरोना भाइरस फैलिएको दाबी गर्दै आएका छन् भने सरकारले क्लस्टरमा कोरोना फैलिएको बताउँदै आएको छ । ‘समुदायमा मात्र होइन घरघरमा पुगेको छ । १० वटा घरमध्ये कतिमा पुग्यो भन्ने हो,’ इपिडिमियोलोजी तथा सरुवा रोग नियन्त्रण महाशाखाका पूर्व निर्देशक डा.बाबुराम मरासिनीले भने, ‘कुनै पहाडी गाउँमा नपुगेको होला । अरु ठाउँमा पुगेको छ ।’

अब समुदायमा गए नगएको हेर्न आवश्यक नरहेको उनी बताउँछन् । ‘संक्रमित भएर निको भएको ३ महिनापछि एन्टीबडी हराउँछ भनेर व्रिटिश अध्ययनले देखाएको छ । बिरामी भएको ३ महिनापछि प्रमाण नै भेटिएन यसले ठूलो प्रश्न उठाएको छ,’ उनले भने ।

संकलन गरिएको स्याम्पल धेरै सयम राख्दा बिग्रिएर सहि नतिजा आउनेमो आशंका गर्दै उनले धेरै स्याम्पल संकलन गर्नुपर्ने बताए । उनले भने, ‘धेरै समय राख्दा स्याम्पल बिग्रन्छ । संकलन पनि थोरै गरिएको छ । ३ हजार स्याम्पलले १० प्रतिशत मात्र देखाउन सक्छ । ५ हजार बढी स्याम्पल संकलन गर्नुपर्ने थियो । काठमाडौंमा घरघरमा देखिन थाल्यो । अब हेरेर अर्थ छैन । खराब पोजिसन देखिएको छ । भारतको बराबार पुग्न थालिसक्यो ।’एउटा साइकल अन्त्य भएर अब अर्को साइकल सुरु हुने उनी बताउँछन् । ‘एउटा साइकल अन्त्य भएर दोस्रो साइकल सुरु हुन्छ । माघ फागुनमा सेकेन्ड वेब आउँछ,’ उनले भने ।

प्रकाशित मिति: आइतबार, कात्तिक २३, २०७७ १३:२४