बालुवाटारमा दुईपाने पत्र बुझाएर फर्केका प्रचण्ड–माधव अब कता ?

A+ A A-

तिक्त भयो शनिबारको बालुवाटारको बैठक । प्रधानमन्त्री केपी ओलीसँग प्रचण्डले सोधे, ‘कार्यकारी अध्यक्ष भनेर पार्टीले जिम्मा दियो । तर कार्यकारीको फिलिङ खोई ?’

प्रचण्डसँग ओलीले प्रतिप्रश्न गरे, ‘सरकारको नेतृत्वमा म छु । तर किन निरन्तर अप्ठेरोमा पार्ने काम पार्टीभित्रैबाट हुन्छ ?’ उनले अन्यत्रै बैठक गर्दै हिँड्नेहरूले बालुवाटार आएर कार्यकारी भूमिका खेल्न सकिएन भन्न अनुचित हुने तर्क गरेका थिए ।

बैठक स्रोतका अनुसार प्रचण्ड पक्षले पार्टी बैठक, संसद छल्दै एकलौटी अघि बढेको भनेर ओलीको आलोचना गरेको छ ।

प्रधानमन्त्रीका प्रेस सल्लाहकार सूर्य थापाको शब्दमा प्रचण्ड, माधव नेपाल, झलनाथ खनाल, वामदेव गौतम र नारायणकाजी श्रेष्ठले ‘दुईपानाको अनुरोधपत्र’ बुझाएका छन् । त्यसमा नेकपा सचिवालय र स्थायी समिति दुवैको बैठक डाक्न माग गरिएको छ ।

प्रधानमन्त्रीको जवाफ उद्धृत गर्दै सल्लाहकार थापा शिलापत्रसँग बोले, ‘बैठक त बसिहाल्छ नि, आवश्यकताअनुसार ।’ ओलीको शब्दले भन्छ, बैठक बस्छ । भावले भन्छ, बैठक बस्दैन ।

प्रचण्ड, माधवहरूले यति नबुझ्ने कुरै भएन ।

माधव नेपालनिकट एक नेताका अनुसार आजको बालुवाटार गमन त्यसै शृंखलाको एउटा कडी मात्रै हो, जहाँबाट अब नेकपाको आन्तरिक कचिंगलले एउटा कोर्स समात्ने छ ।

‘राष्ट्रपतिलाई भेटेर ओलीजीले मध्यावधि चुनावतर्फ जाने संकेत गरिसक्नुभएको रहेछ,’ ती नेताले भने, ‘उहाँ पार्टीभित्रको विवादलाई प्रधानमन्त्रीको अख्तियारका आधारमा मिच्न खोजिरहनुभएको छ । हामी त्यसको जवाफ दिन्छौँ ।’

प्रचण्ड–माधव पक्षको त्यो सम्भावित जवाफ हो, ‘संसदीय दलमा आफ्नो बहुमत साबित गर्ने ।' उनीहरूले १७४ सदस्यीय संसदीय दलभित्र आफ्नो पक्षमा ९६ सांसद रहेको जोडघटाउ गरेका छन् । तर त्यसलाई आत्मविश्वासका साथ बाहिर ल्याउन सकेका छैनन् ।

उता ओलीले पनि पछिल्लो दिनमा संसदीय दलभित्र आफू मजबुत रहेको विश्लेषण गरेका छन् । प्रदेश १ का आफूनिकट कार्यकर्तासँग छलफल क्रममा उनले पार्टी एकता र विभाजनको निर्णायक मञ्च संसदीय दल नै भएको, त्यसमा आफू बलियो अवस्थामा रहेको बताएका थिए ।

जुममार्फत् गरिएको उक्त भेलाबारे शिलापत्रले पहिले नै रिपोर्टिङ गरिसकेको छ । त्यस बैठकका एक सहभागीका अनुसार ओलीले माधव नेपाल पक्षका केही सांसद, अनि प्रचण्ड निकटसमेत केही गरी आफू सुविधाजनक स्थितिमा रहेको विश्लेषण सुनाएका थिए । उनले आफूलाई खुला ढंगले सत्ता चलाउने अवसर नमिलेको गुनासोसमेत गरेका थिए ।

त्यस्तै गुनासो प्रचण्डको पनि छ । ‘कार्यकारी फिलिङ’विना अध्यक्षको कुर्सीमा सजावटी भूमिकामा खुम्चिएको भन्दै उनले दुखेसो गर्दै आएका छन् ।

ओलीले जसको जति शक्ति छ, त्यति नै मात्र अभ्यास गर्न पाउनुपर्ने नयाँ तर्कमा छन् । त्यसलाई परीक्षण गर्न आवश्यक भए अर्को चुनावमा जानसमेत तयार हुनुपर्ने उनको जिकिर छ ।

के यस्तोमा ओली मध्यावधि निर्वाचनतर्फ जालान् ?

यस्तो अवस्था सिर्जना भएमा देश २०५० सालको अवस्थामा पुग्ने छ, जहाँ प्रधानमन्त्री गिरिजाप्रसाद कोइरालाले आफूलाई कांग्रेसबाटै असहयोग भएको भन्दै मध्यावधि चुनावमा गएर कृष्णप्रसाद भट्टराई र गणेशमानसिंहलाई ‘देखाइदिने’ चुनौती दिएका थिए । कांग्रेसले त त्यसपछिको चुनाव हार्‍यो नै, देश त्रिशंकु संसदको अस्थिर अभ्यासमा पुग्यो । मुलुकले त्यसको महँगो मूल्य चुकाउनु पर्‍यो ।

राष्ट्रपतिले वामदेव गौतमलाई भेटेर फेरि एकपल्ट निर्णायक सहयोग मागिसकेकी छन् । असमयमा ‘जनताको बहुदलीय जनवाद’ ब्युताउने प्रयास होस्, या ‘स्थिर सरकार’ का पक्षमा जतिसुकै अप्रिय कदम– वामदेव यो बेला खोजिएका छन् । सबैलाई थाहै छ, वामदेवको कुनै भर छैन ।

त्यस अर्थमा माधव नेपाल प्रधानमन्त्रीसँग जति बिच्किएका छन्, त्यति नै आगामी राजनीतिक कोर्स कता जान्छ भनेर संशयी पनि । एउटा कुरा भने प्रष्ट छ, आज ओलीलाई दुईपाने चिठी बुझाएर फर्किसकेपछि अब इतर पक्ष धुम्बाराहीमा दुवै कमिटीको बैठक डाक्ने तयारीमा छ ।

त्यो बैठकभन्दा ओलीले चाल्न सक्ने सम्भावित कदमको लेखाजोखा प्रचण्ड–माधव पक्षले गरिसकेको छ ।

प्रकाशित मिति: शनिबार, कात्तिक २२, २०७७ १४:१८