सरुवा भएका मुख्य न्यायाधीशलाई राजस्व र बैंकिङ कसुरका मुद्दा छिन्ने हतारो

A+ A A-

उच्च अदालत पाटनका मुख्य न्यायाधीश नहकुल सुवेदीले केही मुद्दामा विशेष चासो राखेको सूचना प्रधानन्यायाधीशकाे सचिवलय र न्याय परिषदमा पुगेपछि उनलाई सर्वोच्चले तत्काल काज सरुवाको पत्र काट्यो । हिजो १८ कात्तिकमै सुवेदीलाई उच्च अदालत सुर्खेतको मुख्य न्यायाधीशमा काज सरुवाको निर्णय भएको थियो । सुर्खेतका मुख्य न्यायाधीशलाई पाटनमा ल्याएर उक्त स्थानमा सुवेदीलाई पठाउने निर्णय भएको हो ।

जुन मुद्दामा कैफियत देखिएको भनेर सर्वोच्चले उनको सरुवा गरेको थियो, भोलिपल्ट तिनै मुद्दा सकार्ने हतारोमा देखिए, मुख्य न्यायाधीश सुवेदी । सर्वोच्च अदालत स्रोतका अनुसार ठूलाे बिगाे भएका बैंकिङ कसुर र राजस्व चुहावटसम्बन्धी मुद्दामा सुवेदीले चलखेलको गरेकाे भन्दै सर्वाेच्च र न्याय परिषदमा सूचना पुगेकाे थियाे । त्यसपछि प्रधानन्यायाधीश चोलेन्द्र शमशेर राणाले उनलाई सुर्खेत सरुवा गरिदिएका हुन् ।

तर आज सुवेदीले राजस्व चुहावट र बैंकिङ कसुरसम्बन्धी मुद्दाको धमाधम पेशी तोकिदिए । १९ कात्तिकमा मात्रै राजस्व छली र बैंकिङ कसुरसम्बन्धी ८ वटा मुद्दाको पेशी चढेको अदालतको दैनिक पेशी सूचिबाट खुल्छ । यो समाचार तयार गर्दासम्म त्यसमध्ये केहीमा आदेशसमेत भएको छ ।

सरुवा भइसकेपछि न्यायाधीशले मुद्दा छिन्न नहुने कानुनी बन्धन छैन । सामान्यतः सरुवा भइसकेपछि न्यायाधीशले फैसला लेख्न बाँकी भएका काम मात्र फत्ते गरेर रमाना लिने गर्छन् । तर सुवेदीले मुद्दा छिन्न यति हतारो देखाए कि इजलासमा हुनुपर्ने बयानसमेत फाँटमा गराएको उच्च अदालत पाटन स्रोत बताउँछ ।

दिउँसो अबेरसम्म समेत सुवेदी पेशी तोक्न लागिपरेका थिए । बिदामा बसेका केही न्यायाधीशलाई बाेलाइरसमेत मुद्दा छिन्ने जिम्मेवारी सुम्पिएकाे अदालत स्राेत बताउँछ । ‘न्यायाधीशलाई इमानदारीसाथ मुद्दा हेर्न सरुवापछि पनि कानुनले रोक्दैन,’ सर्वोच्चका पूर्वन्यायाधीश बलराम केसी भन्छन्, ‘यो नैतिकता र इमानदारीताको प्रश्न हो । कानुनी होइन ।’

सर्वोच्चले जुन कारणले सुवेदीको आकस्मिक सरुवा गर्‍यो तिनै मुद्दा सरुवा भएर जाँदाजाँदै छानीछानी छिन्न खोज्नाले उनीमाथिको आराेपलाई बल मिल्छ । उच्च अदालत पाटनमा कर छली, बैंकिङ कसुरजस्ता आर्थिक विवादका मुद्दा बढी हुने गर्छ । त्यसैले न्यायवृत्तमा यो अदालतलाई वाणिज्य अदालतसमेत भनेर चिनिन्छ ।

सुवेदी प्रधानन्यायाधीश बन्ने दौडमा लागेका व्यक्ति हुन् । गोपाल पराजुली प्रधानन्यायधीश छँदा सुवेदीले आफ्नो करियरलाई ह्वात्तै उकास्ने अवसर पाएका थिए । पराजुली सुवेदीका नातेदार हुन् । ०७३/७४ मा सुवेदीले नातेदार पराजुली न्यायलयको सर्वोच्च पदमा छँदा ११ महिनामा तीनवटा बढुवा हात लगाएका थिए, क्रमशः सचिव, मुख्य रजिस्ट्रार र मुख्य न्यायाधीश ।