पप्पुको बदमासीले १० वर्षमा पनि बनेन कमला पुल

A+ A A-

धनुषा-सिरहाको सीमा छुट्याउने कमला नदी तर्न स्थानीय लाइन लागेका छन् । जोखिम मोलेर डुङ्गाबाट नदी तर्दै कोही खेतबारीमा काम गर्न हिँडेका छन् कोही मोटरसाइल नै डुङ्गामा नदी तरिरहेका छन् ।

काठको डुङ्गामा सवार भएका उनीहरूले पुलको कुरा उठ्नासाथ कसैले सरकारलाई त कसैले ठेकेदारलाई गाली गर्ने गर्न सुरु गर्छन् । कमला नदीमा पुलको शिलान्यास भएको करिब ९ वर्ष बित्यो । केही काम पनि भयो । तर, वर्षौँदेखि ‘कमला पुल यही वर्ष बन्ने’ भनेर सुन्दै आएका ४५ वर्षीय स्थानीय छेदी मुखियालाई यो जुनीमा पुल देखिएलाजस्तो लाग्दैन ।

वर्षौँदेखि उनले ३० किलोमिटर पर्ने प्रदेश २ को अस्थायी राजधानी जनकपुर आउन १ सय ५० किलोमिटर घुमौरो बाटो भएर आउनु परेको छ । नदीमा पुल नहुँदा उनी काठको डुङ्गामा मानिसलाई नदी तार्ने काम गर्दै आएका छन् ।

‘दिनमा सयौँ मान्छेलाई नदी पार गराउनुपर्छ,’ उनले भने, ‘यहाँका मान्छेले वर्षैपिच्छे धान दिन्छन् । बाहिरबाट आएकाहरूले पैसा दिन्छन् । महिनामा २०/२५ हजार कमाइ हुन्छ ।’ तर, पुल बन्दा उनले पाएको रोजगारी खोसिनेमा उनलाई कतै चिन्ता छैन । ‘पुल बनेपछि रोजगारी झन् बढ्छ । धेरैले रोजगारी पाउँछन् । भाडा कम तिनुपर्छ,’ उनले थपे ।

जेठदेखि पुस महिनासम्म नदीमा डुङ्गाबाट वारिपारी गर्नुपर्ने बाध्यता रहेको उनले सुनाए । पुल निर्माण सुरु हुँदा स्थानीय हर्षित हुन्छन्, तर यो हर्ष कहिल्यै लामो समयसम्म अनुभूति गर्न पाएका छैनन् । ‘पुल जबजब निर्माण सुरु हुन्छ तब मनमा खुसी हुन्छ । जब काम रोकिन्छ, तब निराश बनाउँछ,’ सिरहा नगरपालिका- ६ का इन्द्रजीत यादवले भने, ‘पुल निर्माण सम्पन्न भए यस भेगका जनताको धेरै दुःख दूर हुन्छ ।’

करिब ९ वर्षदेखि अलपत्र परेको कमला पुल निर्माणले पछिल्लो पटक तीव्रता पाएको छ । तर, कामको गति सधैँ यस्तै रहला भन्नेमा स्थानीय आशंकित छन् ।

पुल निर्माणमा लापरबाही गर्दा पप्पु कन्स्ट्रक्सनलाई हटाइएपछि अवरुद्ध पुलको निर्माण कार्य अहिले तीव्र गतिमा भइरहेको छ । अहिले लुम्बिनी बिल्डर्सले जेठभित्र काम सक्ने प्रतिबद्धतासहित तीव्र गतिमा काम गरिरहेको छ । १ असोज २०७६ असोजदेखि पप्पु कन्स्ट्रक्सनलाई हटाएर लुम्बिनी बिल्डर्स एक्लैले काम सुरु गरेको हो ।

कुल २४ करोड ९१ लाख रुपैयाँमा लागतमा पुल निर्माण गर्न सरकारले पप्पु लुम्बिनी जेभी कन्स्ट्रक्सनलाई ३१ जेठ २०६८ मा निर्माण सम्झौता गरेको थियो । दुई पटक म्याद थप गर्दा पनि पुल निर्माण हुन सकेन । पप्पुले यतिका दिनमा दुईवटा पुलको १२ पिलर र दुई वटा ‘एसप्यान’ मात्रै ढलान गरेको थियो । अरू काम गर्न ढिलासुस्ती गर्दै आएको थियो ।

‘त्यसपछि हामीले ठेक्का किन न तोड्ने भनेर पत्र लेखेपछि ‘लिड पार्टनर’ले एक्लै काम गर्ने प्रतिबद्धता जनाएको छ,’ हुलाकी राजमार्ग निर्देशनालय योजना कार्यालय जनकपुरधामका प्रमुख राजेन्द्र दासले भने, ‘पप्पु कन्स्ट्रक्सनलाई निर्माण कामबाट हटाइएको छ । १ असोज २०७६ बाट लुम्बिनी बिल्डर्सले निर्माण कार्य थालेको हो ।’

पुलको डिजाइन पनि ‘रिभ्यु’ भइरहेको आयोजना प्रमुख दासले बताए । ‘गत असार साउनको बाढी देखेर पुलको डिजाइनमा फेरबदल गरिने जस्तो देखिन्छ,’ उनले भने, ‘त्यसका लागि प्राविधिकहरूको टोलीले बनाएको प्रतिवेदन सडक विभागमा पठाइएको छ ।’

कमला पुल निर्माण गर्न पछिल्लो पटक एक वर्षको म्याद थप भएको तर कोरोना महामारीका कारण काम हुन नसकेको निर्माण कम्पनीका प्रोजेक्ट म्यानेजर विश्वनाथ खनालले बताए ।
‘निर्माण सामग्री ल्याउने सुलभ बाटो नहुँदा धेरै कठिनाइ भोग्नुपरेको थियो । बाटो बनायौँ,’ उनले भने, ‘हालसम्म ५६ प्रतिशत काम सम्पन्न भइसकेको छ । एसप्यान ढलानको काम सुरु भएको छ ।’ दिनहुँ मिस्त्री र मजदुर थपिँदै काम गरिरहेको उनले बताए । ४ सय ७० मिटर लम्बाई र ११ मिटर चौडाई यो पुल १२ एसप्यानको छ ।

प्रकाशित मिति: मंगलबार, कात्तिक १८, २०७७ १०:१९