प्रकृतिले दिएको खुसी

A+ A A-

शरद ऋतु हिन्दु ऋतुहरूको ६ वटा ऋतु मध्येको एक हो । वर्षा ऋतुको समापनसँगै आगमन हुने यस ऋतु असोज र कात्तिक महिनामा पर्दछ । हामी अहिले यस ऋतुको आभास खुब रमाइलोसँग गरिरहेका छौँ ।

आजभोलि हाम्रो आँखा जब उत्तरी भेगतिर पुग्छ, त्यतातिर देखिने रमाइला हिमालका दृश्यले हाम्रो मन निकै प्रफुल्लित बनाउँछ । साँच्चै हाम्रो देश स्वर्गको एक टुक्रा नै हो कि जस्तो भान हुन्छ । देशको हिमाली र पहाडी भेगबाट राम्रोसँग अवलोकन गर्न सकिने ती सुन्दर हिमश्रृंखलाले अहिले सबैको मनमा एक किसिमको अद्भुद आनन्द र सुखको प्रदान गरेको छ ।

कोरोनाको त्रासले मनोबल घटिरहेको यस पीडादायिक समयका बीच बिहान देखिने नीलो आकाश, त्यस नीलो आकासमा रमाइरहेका पन्छी र उ परको हिमालले हाम्रो मन र मष्तिष्कमा जोश र जाँगर बोकेर ल्याएको भान हुन्छ । क्यामेरामा कैद भएर फेसबुकको भित्तामा खुब स्थान पाइरहेको गाउँवस्तीको मनै लोभ्याउने सुन्दर दृश्यहरूले कताकता सारा दुःख, कष्ट र पीर भुलाएको महसुस भएको छ ।

हामी सबै आजभोलि ती सुन्दर दृश्यलाई आफ्नो पृष्ठभूमिमा पारेर फोटो कैद गर्न लोभिइरहेका हुन्छौँ । क्यामेरामा कैद गरेका फोटो नियाल्दा पाउने चरम आनन्दको कुनै लेखाजोखा नै हुँदैन । साँच्चै नै प्रकृतिले हामीलाई ठूलो उपाहार दिएको छ जसको कुनै मूल्य नै छैन ।

हामीले प्रकृतिबाट जुन किसिमको खुसी पाइरहेका छौँ, सायद त्यो खुसी हाम्रो जीवन जिउनको लागि चाहिने अमूल्य औषधि हो । सदा खुसी र सुखी रहनु जीवनको सबैभन्दा ठूलो धन र सम्पति हो । आज हामीलाई प्रकृतिले पक्षपात नगरी त्यो खुसी र आनन्द दिइरहेको छ । न जात, न धर्म, न लिङ्ग, न धनी, न गरिब, न साना, न ठूला, प्रकृतिले कसैलाई पनि छुट्याएको छैन । सबैलाई समान व्यवहार गरिरहेको छ । साँच्चै भन्नुपर्दा हामी नेपाली राजनीतिको कारण अन्य धेरै कुरामा ठगिन परे पनि प्रकृतिले दिएको यस कुरामा भने ठगिन परेको छैन ।

रमाइलो डाँडा, पाखा, पखेरा र हिमालको दृश्य अवलोकन गर्दैगर्दा देखिने केही विनाशका दृश्यले मन कता-कता अमिलो हुन्छ । यदाकदा विकासको नाममा भएका केही विनासले भने पक्कै पनि हाम्रो खुसीलाई लुटिरहेको भान हुन्छ । डाँडा नै धुलाम्मे हुनेगरी उडेको धूलो र सवारी साधनको कालो धूँवाको मुस्लोले गर्दा मन खिन्न हुन्छ र घरिघरि मनमा रिसको आगो दन्किन्छ । देश बनाउन भनेर लागेका जनताका प्रतिनिधिको अदूरदर्शिताको कारणले गर्दा प्रकृति पनि पटक–पटक बलात्कृत भइरहेको हो कि जस्तो लाग्छ ।

लाग्छ हामी नेपालीलाई खुसी दिन त्यही प्रकृतिले मात्र जानेको छ । राजनीतिको दुर्गन्धले कायल भएको हाम्रो समाज, मन र मस्तिष्कमा प्रकृतिले सुगन्ध थपिदिएको छ । मरिसकेको हाम्रो जोस र जाँगरलाई पुनर्जन्म दिएको छ ।

अहिले हामी सबै कोरनाको कारण निकै तनावमा छौँ । हाम्रो दैनिकी फेरिएको छ । व्यापार र व्यवसाय चलायमान हुनसकेको छैन । धेरैले रोजगार गुमाइसकेका छौँ । धेरैले सहरमा बस्ने सपनालाई यस पटक थाती राखेका छौँ । मनमा अशान्ति र बेचैनी बढेको छ । जति बुझ्छु भने पनि आफ्नो मन बुझाउन निकै गाह्रो भइरहेको छ । विदेशी भूमिमा रगत र पसिना बगाएका धेरै नेपाली दाजुभाइ यतिखेर आफ्नै जन्म स्थानमा ती सुन्दर दृश्यहरू हेरेर आफ्नो मन बहलाइरहेका छन् । विद्यालय बन्द हुँदा लाखौँ भविष्यका ताराहरू गाउँबस्तीमै रमाइरहेका छन् ।

कसैले पनि हाम्रो पीडा, मर्म र दुःख नदेखे पनि कम्तीमा प्रकृतिले परबाट हामीलाई हास्न बाध्य बनाइरहेको त छ, हामीलाई मुस्कुराइरहने मौका त दिएको छ, हामीलाई खुसी साट्ने मेसो त मिलाइदिएको छ । राजनीतिको कारणले गर्दा भएको दुर्गन्धलाई कम्तिमा प्रकृतिले त सफा गरिदिएको छ । धन्य प्रकृति !

प्रकाशित मिति: सोमबार, कात्तिक १७, २०७७ १८:५०