डा. सिंह प्रकरण : क्षतिपूर्ति माग गर्दै अदालतमा मुद्दा दर्ता

A+ A A-

भैरहवामा रहेको युनिर्भसल कलेज अफ मेडिकल साइसेन्स अस्पतालमा कार्यरत अर्थोपेडिक सर्जन डा. ज्ञानेश्वरप्रसाद सिंहको सोही अस्पतालमै कार्यरत चिकित्सकको लापरबाहीले मृत्यु भएको भन्दै पीडित परिवारले रुपन्देही जिल्ला अदालतमा मुद्दा दायर गरेका छन् ।

१० वर्षदेखि युनिर्भसल कलेज अफ मेडिकल साइसेन्स (युसीएमएस) मा कार्यरत सिंह ०७६ भदौ १० गते खसीको मासु खाँदा राति घाटीमा हड्डी अड्किएपछि सोही अस्पतालमा भर्ना भएका थिए । तर उपचारमा संलग्न चिकित्सकहरुले लापरबाही गर्दा थप उपचारका लागि काठमाडौं लगिएकोमा उनको २ माघ ०७६ मृतक डा. सिंहकी पत्नी वीणा सिंहको वारेसमा बुटवलकी कृष्णा रोकाले जिल्ला अदालत रुपन्देहीमा मुद्दा दर्ता गरेका हुन ।

युनिर्भसल कलेज अफ मेडिकल साईसेज एण्ड टिचिंग हस्पिटल, अस्पतालमा कार्यरत डा. विश्व तुलाचन, डा लक्ष्मी पाठक र डा. सन्तोष शाहलाई विपक्षी बनाएर पीडित परिवारले मुद्दा दर्ता गरेका हुन ।

पीडित परिवारले उपचारमा लागेको खर्च सहित कल १२ करोड ५० लाख रुपैया क्षतिपूर्ति सहित अदालतमा मुद्दा दर्ता गरेको हो । मृतक डा. सिंहका छोरा प्रज्वल सिंहले मेडिकल काउन्सिलले गरेको गरेको निर्णय पनि अस्पतालले कार्यान्वयन नगरेका कारण क्षतिपूर्तिको माग गर्दै अदालतमा निवेदन दर्ता गरेको बताए ।

घटना पश्चिात उपचारमा संलग्न चिकित्सकहरुलाई कारबाहीको माग गर्दै पीडित परिवारले माघ ३० गते मेडिकल काउन्सिललाई ‘नेपाल मेडिकल काउन्सिल नियमावलीको नियम २२ बमोजिम आचारसंहिता विपरीत हेलचेक्र्याई र लापरबाही गरी इलाज गर्ने चिकित्सकहरु माथी कारबाही पाउँ’ भन्दै पत्राचार गरेका थिए ।

पीडित परिवारको तर्फबाट डा. सिंहकी श्रीमती वीणा सिंहले काउन्सिलमा कारबाहीका लागि निवेदन दिएपछि काउन्सिलले युनिर्भसल कलेज अफ मेडिकल साइसेन्जलाई ०७६÷१२÷७ गते निर्देशन सहितको पत्रचार गरी उपचारमा संलग्न चिकित्सक डा. विश्व तुलाचन, डा. लक्ष्मी पाठक, डा. सन्तोष साहलाई काउन्सिलको २२ फागुन ०७६ को पुर्ण बैठकले कारबाहीका लागि थप स्पष्टिकरण माग गरेको थियो ।

स्पष्टिकरण माग पछि काउन्सिलकले डा. सन्तोष साहको संलग्नता नदेखिएकाले उनलाई सफाई दिने र विश्व तुलाचनको हकमा एक वर्षका लागि इसोफेजिएल इण्डोस्कोपी नगर्ने गरी कारबाही गर्ने र बन्दाबन्दीका कारण स्पष्टिकरण दिन नसकेका एनेस्थेसियाका चिकित्सकलाई लिखित जवाफ दिन २ हप्ताको समय दिएको निर्णय गरेको थियो ।

काउन्सिलको कारबाही प्रति पनि चित्त नबुजेर अदालत सम्म पुग्नु परेको छोरा प्रज्वलले बताए । उनले आगामी दिनमा कसैलाई पनि यस्तो घटना नहोस भन्नका लागि कारबाहीको माग गरे पनि काउन्सिलले चिकित्सकहरुलाई जोगाएर कारबाहीको बाहना मात्र गरेकाले अदालत जानु परेको बताए ।

पीडित परिवारले यस अघि नै नेपाल चिकित्सक संघ, स्वास्थ्य तथा जनसंख्या मन्त्रालय, गृह मन्त्रालय र युनिर्भसल कलेज अफ मेडिकल साइसेन्जलाई निबेदन दिएको भए पनि क्षतिपूर्ति पाएका थिएनन । त्यस बाहेक युनिर्भसल कलेज आफ मेडिकल साइसेन्जलाई ७ साउन ०७७ र २० भदौ ०७७ मा दुई पटक क्षतिपूर्ति र सुविधा बापतको रकम माग गर्दै निबेदन दिएका थिए ।

घटना के थियो ?
युनिर्भसल कलेज अफ मेडिकल साइसेन्जका अर्थोपेडिक सर्जन डा. ज्ञानेश्वरप्रसाद सिंह १० भदौ ०७६ मा श्रीमती विना सिंह सहित एक पार्टीमा सामेल भए । साँझ ९ बजे खाना खाने क्रममा खसीको हड्डी घाँटीमा अड्कियो । त्यसपछि तत्कालै उनलाई मेडिकल कलेज भैरहवामा लगियो । त्यो रात डा. सिहको उपचार भएन । भदौ ११ गते चिकित्सकको टोलीले घाटीमा अड्किएको हड्डी निकाल्न अप्रेश गर्‍यो । ५ घण्टा लगाएर अप्रेसन गरेपनि आधा हड्डी निस्किएको र आधा हड्डी पेतमा पु¥याएको चिकित्सकले परिवारलाई बताए ।

अप्रेसन सफल भएको भन्दै जुस खान हुने बताए । तर १४ गते डा. ज्ञानेश्वरले बान्ता गरे । असहज महसुस गरे । त्यसपछि परिवारले सिटीस्क्यान गर्न आग्रह गरे । अस्पतालले पर्दैन भनेपनि सिटीस्क्यान गर्दा हड्डी घाँटीमै देखियो ।

त्यसपछि पुनः डा. सिहलाई आईसीयूमा सारियो । आईसीयूमा लैजान साथ अस्पताले थप सानो अप्रेशन गर्न काठमाडौं लैजानुपर्ने परिवारलाई बतायो । परिवारले हेलिकप्टर मार्फत काठमाडौं लगे । मनमोहन अस्पतालमा लगेर विरामी भर्ना भएपछि उपचार सुरु भयो । त्यहाँ सुरुमै बिरामीको इन्डोस्कोपी गरियो । इन्डोस्कोपी गरेर हेर्दा खाना खाने नली च्यातिएको र त्यसको इन्फेक्सनले गर्दा छातीमा समेत इन्फेक्सन भएको देखियो । अस्पतालले अप्रेशन गरेर हड्डी निकाले पनि खाना नलीमा भएको संक्रमण छाती सम्म पुग्यो । ३ महिना आईसीयूमा राखेर उपचार गरेपनि सुधार भएन । २ माघ ०७६ मा डा. सिंहको मृत्यु भयो ।

‘बुवाको उपचारमा सवै रकम खर्च हुँदा हामीलाई अध्ययान गर्न समेत अप्ठयारो भएको छ । हामीलाई पढाउन लिएको बैंक क्रृणका कारण घर समेत बैंकले लिलामी गर्दै छ,’ प्रज्वलले भने, ‘पूर्णकालिन चिकित्सक भएका कारण र उपचारमा लापरबाही भएका कारण क्षतिपूर्ति हामीलाई अस्पतालले दिनुपर्छ ।’ प्रज्वल र उनकी बहिनी प्रज्ञा सिंह बंगलादेशमा एमबीबीएस अध्ययनरत छन् । कोरोना महामारीले गर्दा पढाइ बन्द भएपछि उनीहरू अहिले नेपाल आएका छन् ।

प्रकाशित मिति: सोमबार, कात्तिक १७, २०७७ ०९:०९