राष्ट्रपति सीले भने–‘विकासमा साथ छौं’

A+ A A-

चीनका राष्ट्रपति सी चिनफिङले नेपाल सरकारले अघि सारेको ‘समृद्ध नेपाल, सुखी नेपाली अभियान’ प्रति चासो देखाएका छन् । ‘नेपालले संकल्प गरेको समृद्ध नेपाल, खुसी नेपालीको अभियानमा चीनको सदैव साथ छ,’ राष्ट्रपति सीले भने, ‘चीनलाई सम्झिनुहोला, यो विकासको सहयात्रामा साथ दिन चीन तयार छ ।’

बेइजिङस्थित नेपाली राजदूतावासले राष्ट्रपति विद्यादेवी भण्डारीकोसम्मानमा आयोजना गरेको रात्रिभोजमा उनका तर्फबाट यहाँ रहेका नेपालीलाई शनिबार साँझ सम्बोधनगर्दै परराष्ट्रमन्त्री प्रदीप ज्ञवालीले चिनियाँ राष्ट्रपतिको यो अभिव्यक्तिबारे जानकारी दिएका हुन् ।

बेल्ट एन्ड रोड इनिसियटिभ (बीआरआई) दोस्रो अन्तर्राष्ट्रिय सहकार्य शिखर सम्मेलनको अन्तिम दिन शनिबार आयोजित राउन्ड टेबल बैठकमा राष्ट्रपति भण्डारीले संयुक्त राष्ट्रसंघको २०३० एजेन्डा कार्यान्वयन गर्न हरित तथा दिगो विकास प्रवर्द्धन विषयमा सम्बोधन गरेपछि त्यसको प्रतिक्रियामा चिनियाँ राष्ट्रपतिले ऊक्त धारणा व्यत्त गरेको मन्त्री ज्ञवालीले जानकारी दिए ।

‘चिनियाँ राष्ट्रपतिले नेपालबारे गरेको खुसीको कुरा सुनाउँछु,’ मन्त्री ज्ञवालीले भने, ‘राष्ट्रपति सी चिनफिङको नेपालप्रतिको सद्भाव र दृढ एवं प्रस्ट विचारबाट नेपाल उत्साहित भएको छ ।’

राउन्ड टेबलका तीन सत्रमध्ये राष्ट्रपति भण्डारीको सम्बोधनलाई लक्षित गर्दै राष्ट्रपति सीले हिमालय क्षेत्रको महत्त्व धेरै ठूलो रहेको तर जलवायु परिवर्तनका प्रतिकूल असरले पार्ने प्रभावप्रति चिन्ता व्यक्त गरेका थिए ।