देउखुरीमा अस्थायी संरचनामै करोडौँ रकम खर्चिने लुम्बिनी सरकारको तयारी

राप्ती प्राविधिक शिक्षालयको भवन स्थल

A+ A A-

लुम्बिनी प्रदेशको राजधानी दाङ देउखुरीमा लुम्बिनी सरकारले अस्थायी संरचनामा करोडौँ रकम खर्चिने तयारी गरेको छ । देशमा कोरोना महामारीको संक्रमण फैलिरहेको र अर्थतन्त्रमा समेत प्रत्यक्ष प्रभाव परिरहेका बेला सरकारले अस्थायी संरचना निर्माणमा करोडौँ रकम खर्च गर्ने तयारी गरेको हो ।

लुम्बिनी प्रदेशसभाको हिउँदे अधिवेशन दाङ देउखुरीमा राख्ने र त्यसका लागि अस्थायी संरचना निर्माण एवं मर्मत गर्नुपर्दा करोडौँ रुपैया खर्च हुन लागेको हो । प्रदेशको मुकाम रहेको बुटवलमा यसअघि नै अस्थायी संरचना मर्मत एवं निर्माणमा ५० करोडभन्दा बढी रकम खर्च भइसकेको छ ।

प्रदेशको स्थायी राजधानी तोकेपछि संरचना तयार नहुँदासम्म बुटवलबाटै प्रदेश सरकारले काम गर्ने मुख्यमन्त्री शंकर पोखरेलले बताउँदै आएका थिए । तर, प्रदेशसभाको हिउँदे अधिवेशन देउखुरी राख्ने तयारीसहित सभामुख पूर्णबहादुर घर्ती, आर्थिक मामिला तथा कानुनमन्त्री कूलप्रसाद केसी, उपसभामुख कृष्णी थारूसहितको टोलीले भौतिक पूर्वाधारको अवस्थाबारे स्थलगत अनुमगन गर्ने काम गरिसकेका छ । स्थायी राजधानी दाङ देउखुरीमा तिहारलगत्तै प्रदेशसभाको पहिलो बैठक बसाल्ने तयारी स्वरूप स्थलगत निरीक्षण सभामुखसहितको टोलीले गरेको हो ।

मुख्यमन्त्री पोखरेलले राप्ती प्राविधिक शिक्षालयको भवन स्थलगत अनुगमनका लागि सभामुखसहितको टोलीलाई जान आग्रह गरेअनुसार उक्त टोली अनुगमनमा गएको हो । सभामुखसहितको टोली अनुगमनमा गएपछि अस्थायी संरचनामा प्रदेशसभा बैठक राख्ने तयारी प्रदेशसभा सचिवालय र मुख्यमन्त्री तथा मन्त्रिपरिषद्को कार्यालयले गरेको छ ।

स्थायी संरचना नहुँदा पुनः अस्थायी संरचनामा करोडौँ रकम खर्च हुने भएपछि यसको आलोचनासमेत सुरु भएको छ । कोरोना संकटको अवस्थामा सरकार आईसीयू बेड र भेन्टिलेटर थप गर्नुपर्नेमा अस्थायी राजधानीमा बेअर्थ करोडौँ रकम खर्च गर्न लागेको भन्दै बुद्धिजिवीले टीकाटिप्पणी गर्न थालेका हुन् ।

रामपुर नगरपालिकाका नगरप्रमुख रमणबहादुर थापाले अस्थायी संरचनामा राजधानी सार्दा आर्थिक रूपमा राज्यलाई ठूलो भार पर्ने बताए । कोरोनाका कारण आमनागरिकको दैनिकी असहज बनेको अवस्थामा पुनः करोडौँ रकम खर्च गर्नु राज्यका लागि अनावश्यक भार भएको बताए ।

स्थायी राजधानी कायम भएपछि पनि अस्थायी संरचनामा प्रदेशसभाको बैठक राख्ने तयारी गरेको भन्दै प्रदेश सांसदले समेत प्रश्न उठाएका छन् । कपिलवस्तुका सांसद विष्णु पन्थीले अस्थायी राजधानीबाट उठाएर फेरि अस्थायी संरचनामा बैठक बसाल्ने कुरा जायज नभएको बताए । प्रदेशको एक मात्र राप्ती प्राविधिक शिक्षालयलाई उठिबास लगाएर प्रदेशसभा बैठक राख्न नहुँने भन्दै बरु संरचना निर्माणमा ध्यान दिन उनले आग्रह गरे ।

स्थलगत निरीक्षण गरेको भए पनि अहिलेसम्म प्रदेशसभा बैठकका लागि स्थानको टुंगो भने लागिसकेको छैन । तर, राप्ती प्राविधिक शिक्षालयमा प्रदेशसभाको बैठक राख्न सकिने निष्कर्ष उक्त अनुगमन टोलीले निकालेको बताइएको छ । स्थलगत अनुमगनमा रहेका सांसद ईन्द्रजित थारूले राप्ती प्राविधिक शिक्षालयमा प्रयाप्त जग्गा भएको र प्रदेशसभाको बैठक बसाल्नका लागि हल र अन्य कोठासमेत भएकाले बैठक बसाल्न सक्ने उनले बताए । राप्ती प्राविधिक शिक्षालय १६ बिघा जग्गामा फैलिएको छ ।

सभामुख घर्तीले बैठक राख्न सकिने वा नसकिनेभन्दा पनि मुख्यमन्त्रीले निरीक्षण गर्न भनेकाले भवनको अनुगमनका लागि गएको बताए । निरीक्षणमा दाङका प्रमुख जिल्ला अधिकारीजय नारायण आचार्य, स्थानीय तहका प्रतिनिधि, राप्ती प्राविधिक शिक्षालयका पदाधिकारी, प्रदेश सांसदसमेत सहभागि भएका थिए ।

सभामुख घर्तीले बुटवलको प्रदेशसभाभन्दा अव्यवस्थित गरेर प्रदेशसभा ल्याउन नसकिने र प्रदेशसभाका लागि शिक्षालयको सबै भवन आवश्यक पर्ने छलफलका क्रममा बताएको बताए । ‘हामीले स्थान हेर्ने हो । तयारी सरकारले गर्ने हो । हामी गएर हेर्‍यौँ । शिक्षालयको सबै भवन प्रदेशसभालाई उपलब्ध हुन सके विषयगत समिति, दलका कार्यालय, प्रदेश सचिवालय, प्रदेशसभा सबैलाई व्यवस्थित गर्न सकिन्छ भनेर भनेका छौँ,’ उनले भने ।

प्रदेशसभाका लागि आवश्यक हलका लागि त्यहाँको सभाहलको चौडाई कम भएको र त्यसलाई सार्न सकिने भएकाले पनि बैठक बस्ने सक्ने अनुगमनमा गएकाहरूको भनाइ छ ।

छलफलका क्रममा शिक्षालयलाई अनेत्र स्थान्तरणका गर्नका लागि स्थानको पहिचान गर्नुपर्ने भनाइ आएको थियो । हाल ११ सय विद्यार्थी शिक्षालयमा अध्ययनरत रहेको र तत्काल शिक्षालयलाई अनेत्र सिफ्ट गर्नुपर्ने भएकाले त्यसलाई अनेत्र स्थान्तरण गर्न सकिने स्थानीय तहका जनप्रतिनिधीले बताएका थिए ।

प्रकाशित मिति: शनिबार, कात्तिक १५, २०७७ २०:१३