३ सय स्मार्ट लाइसेन्स धान खेतमा कसरी पुग्यो ?

A+ A A-

डेढ वर्षअघि सवारीचालक अनुमतिपत्रको ट्रायल परीक्षा पास गरेका सर्लाही ईश्वरपुरका शीतलकुमार महतो आफ्नो स्मार्ट लाइसेन्स लिन बिहीबार तेस्रो पटक यातायात व्यवस्था कार्यालय जनकपुर आइपुगेका थिए । महतोभन्दा अगाडि र पछाडि ट्रायल पास गरी लाइसेन्स नम्बर पाइसकेका धेरै जनाले स्मार्ट लाइसेन्स पाइसकेका थिए । तर कार्यालयका कर्मचारीले उनलाई निकै दौडधुप गराए । कर्मचारीलाई भन्न जाँदा उनको लाइसेन्स पहिले नै आइसकेको भन्दै लाइसेन्स शाखामा पठाउँथे तर त्यहाँ जाँदा फेरि एक हप्तापछि आउनु भनेर फर्काइन्थ्यो । उनको स्मार्टकार्ड कार्यालयमा थिएन ।

‘दुई दिनको दौडधुप र परेसानीपछि पनि मेरो स्मार्टकार्ड भेटिएन । अन्त्यमा एक जना कर्मचारीले कार्यालयबाट फेरि यातायात व्यवस्था विभागमा निवेदन पठाइदिने र आएपछि लिन आउनुहोला भनी फर्काए’ महतोले भने, ‘रसिदले ट्राफिक प्रहरी मानिरहेका छैनन् । ओहोर–दोहोर गर्दागर्दै दिमाग खराब भइसकेको छ । अब अझै कतिदिन यस्तै दौडधुप गरिरहनुपर्ने ।’

महोत्तरीको सोनमा गाउँपालिकाका राजेशकुमार यादवसमेत स्मार्ट लाइसेन्सका लागि एक वर्षदेखि दौडधुप गर्दै छन् । तर कर्मचारीले एक शाखाबाट अर्को शाखामा पठाउँदै कार्ड नै नआएको भनेर फर्काउँदै गरेपछि उनी दिक्क भइसकेका छन् । ‘दलालले अब ५ सय रुपैयाँ खर्च गर्नुस् अनि दुई महिनापछि लाइसेन्स आइहाल्छ भन्दै छ,’ उनले भने ।

स्मार्ट लाइसेन्सका लागि भोग्नुपर्ने पीडाका महतो र यादव उदाहरणका प्रतिनिधि पात्र मात्र हुन् । उनीजस्ता प्रदेश २ का आठवटै जिल्लाबाट आउने सयौँ सेवाग्राही आफ्नो स्मार्टलाइसेन्स लिन आउँछन् । तर लाख कोसिस गर्दा र हैरानी हुँदा पनि नभेटेपछि निराश भएर फर्केर जाने गर्दछन् । तर कार्यालयमा भेटिनुपर्ने लाइसेन्स धानखेतमा फालिएपछि कसरी भेट्नु ?

बिहीबार जनकपुर उपमहानगरपालिका–१४ स्थित यातायात व्यवस्था कार्यालय जनकपुरको करिब दुई सय मिटर पूर्व धानखेतमा करिब ३ सयवटा स्मार्ट लाइसेन्स भेटियाे । धान काट्दै गरेकी स्थानीय जिवछी देवीका अनुसार उनका छोराले ती लाइसेन्स लिएर खेल्दै थिए । ‘गढीबाट तासजस्तो देखिने कार्ड निकालेर मेरा बालबच्चाले खेल्दै थिए । पछि शौच गर्न आएका एक जनाले यो लाइसेन्स रहेको भनेपछि कार्यालयमा हाकिमलाई सोध्न पुगेँ,’ उनले भनिन् ।

कार्यालयका कर्मचारीको निर्देशनमा यातायात कार्यालयका सुरक्षा गार्ड गर्भु कापडले ती महिलालाई ५ सय रुपैयाँ दिएर छरिएका कार्ड बटुल्न लगाएका थिए । ‘बच्चाहरूले खेल्दाखेल्दै कार्यालयको कम्पाउण्डभित्र पनि लाइसेन्स फालिदिएका थिए । कर्मचारीले यो कुरा थाहा पाएपछि मलाई छरिएका जम्मै लाइसेन्स लिन पठाए,’ कापडले भने ।

धानखेतमा कसरी पुग्यो लाइसेन्स ?

यातायात कार्यालयको न ताल्चा टुटेको छ, न झ्यालै फुटेको छ । कार्यालय बाहिरबाट एकदमै सुरक्षित अवस्थामा रहेको कर्मचारीको दाबी छ । तर कार्यालयमा हुनुपर्ने स्मार्ट लाइसेन्स धानखेतमा कसरी पुग्यो भन्ने प्रश्नमा यातायात कार्यालयका सबै कर्मचारी अनभिज्ञता मात्र प्रकट गरिरहेका छैनन्, चकितै भएको सुनाउँछन् ।

दसैँको बिदापछि बिहीबार कार्यालय खुलेको थियो । दिउँसो करिब ३ बजे आफूहरूले लाइसेन्स धानखेतमा भेटिएको थाहा पाएकाे कार्यालय निमित्त प्रमुख वीरेन्द्र साहले बताए । ‘हामीले आफ्नो काम गर्दै थियौँ । एक जना महिलाले लाइसेन्स लिएर आउनुभयो । यो तपाईँहरूको हो भनेर सोध्नुभयो । त्यसपछि हामी खोजबिनमा लाग्यौँ र कार्यालय प्रमुखलाई पनि जानकारी गरायौँ,’ उनले भने ।

खेतमा लाइसेन्स कसरी पुग्यो भन्नेमा आफू पनि आश्चर्यमा परेकाे उनले बताए । ‘मलाई आश्चर्य लागेको छ । कसैले रिसिइबी साँध्न पनि यस्तो गर्न सक्छ तर कसरी पुग्यो अनुसन्धान हुँदै छ,’ उनले जवाफ फर्काए । लाइसेन्स शाखाका कर्मचारी अमित झाले आफ्नो शाखाबाट लाइसेन्स नहराएको बताए । ‘यहाँबाट लाइसेन्स गएको छैन । मैले माथिबाट ल्याएको जति इन्ट्री गरेर राखेको छु । माथिबाटै गएको होला । कसरी गयो मलाई थाहा छैन’ उनले भने । तर स्टोर शाखाका प्रमुख धर्मराज पौडेलले समेत खेतमा लाइसेन्स कसरी पुग्यो भन्ने प्रश्नमा आश्चर्य प्रकट गर्दै जवाफ दिन चाहेनन् ।

कार्यालयका कर्मचारीका अनुसार स्टोर लाइसेन्स शाखाका कर्मचारी दुवैले एकअर्काप्रति आरोप प्रत्यारोप लगाउँदै छन् । कार्यालयमा कर्मचारीकै सेटिङमा विचौलियाहरूको प्रभाव बढ्दै छ । सेवाग्राहीका अनुसार कर्मचारी हुँदाहुँदै कार्यालयअगाडि सटर खोलेर बसेका विचौलियाहरूले आफूखुसी फाइलहरू खोज्नेदेखि लाइसेन्स दिने कामसमेत गर्ने र गराउने गर्दछन् । त्यसै क्रममा पछिल्लो समय मनमुटाव बढेका कर्मचारी र विचौलियाबीचको रिसइबीले कसैले लाइसेन्सको पोको नै लिएर गएको हुनसक्ने कर्मचारीहरू बताउँछन् । पैसाको भागवण्डा नमिल्दा पछिल्लो समय केही कर्मचारी र विचौलीयाबीच मनमुटाव बढेको कार्यालयका कर्मचारहरूको भनाइ छ ।

प्रकाशित मिति: शुक्रबार, कात्तिक १४, २०७७ ११:०४