अस्पतालको लापरबाहीले आमा-बच्चाको ज्यान गएको आरोप

A+ A A-

बुटवलको लुम्बिनी प्रादेशिक अस्पतालमा सुत्केरी ब्यथा लागेर भर्ना भएकी एक महिलाको ज्यान गएको छ ।

गुल्मीकाे मदाने गाउँपालिका- ३, भुजुङेकी ३० वर्षीया गीता पुरीको अस्पतालको लापरबाहीले ज्यान गएको मृतकका आफन्तले बताएका छन् । सुत्केरी ब्यथा लागेर बिहीबार दिउँसो लुम्बिनी प्रादेशिक अस्पताल बुटवलमा पुगेकी महिलाको बिहीबार साँझ मृत्यु भएको हो ।

मृतक गीताका देवर युद्ध पुरीले अस्पतालको लापरबाहीले बच्चा र आमा दुवैको ज्यान दाबी गरे । साँझ ७ बजे बच्चाको मृत्यु भएको चिकित्सकले बताएपछि त्यसको २ घण्टापछि आमाको पनि मृत्यु भएको चिकित्सकले आफन्तलाई जानकारी गराएका थिए ।

‘नर्मल डेलिभरी हुन्छ भनेर राखियो । ४ बजेसम्म प्यासेन्ट ठीक थियो । तर पछि एकाएक आमा र बच्चाको ज्यान गयो । यस्तो कसरी हुन सक्छ,’ उनले भने ।

मृतक गीताको डा. अनुपा थापाले नियमित जाँच गर्दै आएकी थिइन् । चिकित्सकले ८ कात्तिकमा सुत्केरी हुने मिति तोके पनि यो बीचमा डा. थापासँग निरन्तर फलोअप गरेको र डा. थापाले बोलाएकै दिन १३ गते अस्पतालमा गीतालाई डेलिभरीका लागि ल्याइएको मृतकका आफन्त कमलराज गिरीले बताए ।

उनले बच्चा र आमाको मृत्यु अस्पताल र चिकित्सकको लापरबाहीले भएको भन्दै निष्पक्ष छानबिन हुनुपर्ने मागसमेत गरेका छन् । बिरामीका आफन्तले निष्पक्ष छानबिन र दोषी चिकित्सकमाथि कारबाही नहुँदासम्म शव नबुझ्ने अडान राख्दै अस्पतालमा केही बेर प्रदर्शनसमेत गरेका थिए ।

यता अस्पतालका प्रवक्ता डा. विष्णु गौतमले मध्यान्ह भर्ना भएकी महिलाको सुत्केरी व्यथा लगाउने औषधि दिएपछि ५ बजे बच्चा निस्कने पाँचवटा घर खुलेकाले नर्मल डेलिभरी हुने देखेर केही बेर छाडिएको बताए । पछि महिलालाई श्वासप्रश्वासमा समस्या देखिएको र अप्रेसन गरेर बच्चा निकाल्नुपर्ने भएकाले अप्रेसन कक्षमा लैजाने क्रममा मृत्यु भएको उनले बताए ।

प्रकाशित मिति: शुक्रबार, कात्तिक १४, २०७७ १०:२३