दसैँलगत्तै तरकारीको मूल्य दोब्बर बढ्यो, कृषि मन्त्रालय बेखबर

A+ A A-

हिन्दुहरूको महान् चाड दसैँ सुरु भएयता देशभर तरकारीको मूल्य ह्वात्तै बढेको छ । सर्वसाधारणको भान्सामा दैनिक प्रयोग गरिने प्याज, आलु, लसुन, टमाटर, काउलीलगायत तरकारीको मूल्य दसैँअघिको तुलनामा दोब्बर वृद्धि भएको छ ।

राजधानीलगायत देशभर तरकारीको मूल्य आकासिएपछि उपभोक्ता मारमा परेका छन् । बजारमा माग भएजति आपूर्ति नभएपछि तरकारीको मूल्य दोब्बर वृद्धि भएको कालीमाटी फलफूल तथा तरकारी विकास समिति जानकारी दिएको छ ।

बाहिरबाट उपत्यकामा कम तरकारी भित्रिएका कारण त्यसको प्रत्यक्ष प्रभाव उपभोग्य मूल्यमा परेको समितिले जनाएको छ । उपत्यकामा सामान्य अवस्थामा दैनिक ८ सयदेखि ९ सय टन तरकारी बाहिरबाट भित्रिने गरेको समितिले जनाएको छ । तरकारी कम भित्रिदा मूल्य वृद्धि भएको समितिको अनुमान छ ।

दसैँमा ३ सयदेखि ४ सय टन तरकारी कालीमाटीमा मात्र भित्रिने गरेको छ । यसभन्दा बाहिरका तरकारी बजारमा करिब ३ टन तरकारी आइरहेको अनुमान समितिका सूचना अधिकारी विनय श्रेष्ठले जानकारी दिए । दसैँमा तरकारी भित्रिने क्रम घटेपछि बजार धान्न समस्या हुँदा तरकारीको भाउ बढेको समितिका सूचना अधिकारी श्रेष्ठ बताउँछन् ।

उपत्यकाको जनसंख्यालाई दैनिक ५ सय टनसम्म तरकारी आवश्यक पर्ने उनले जाकारी दिए ।उपत्यकामा चितवन, सर्लाही, धादिङ, नुवाकोट, मकवानपुर, सिन्धुपाल्चोक, काभ्रेको पाँचखाल, सिन्धुपाल्चोक, भक्तपुर, ललितपुरलगायत स्थानबाट तरकारी भित्रिने गरेको छ ।

बजारमा तरकारीको भाउ कसरी वृद्धि भइरहेको छ भन्ने विषयमा उपभाेक्तालाई जानकारी छैन । खुद्रा व्यापारीले होलसेलमै तरकारी र फलफूलको मूल्य वृद्धि भएको भन्दै महँगो मूल्यमा बिक्री गर्दै आएका छन् ।

माघसम्म तरकारीको मूल्य घट्दैन : व्यापारी

कालीमाटीस्थित तरकारी बजारका व्यापारी बजारमा तरकारी आपूर्तिमा कमी भएपछि मूल्यवृद्धि भएको स्वीकार गर्छन् । गत साता ९० रुपैयाँमा बजारमा पाइने काँक्राको मूल्य एक सातायता १ सय ८० रुपैयाँ पुगेको छ । गत सातामा ३० रुपैयाँमा पाइने टमाटर हाल १ सय ७० रुपैयाँमा बिक्री भइरहेको छ । गत साता ९० रुपैयाँमा पाइने फलफूल अहिले २ सय ५० रुपैयाँ प्रतिकिलोसम्ममा किनेर उपभोक्ता खान बाध्य छन् ।

दसैँअघि ९० रुपैयाँमा पाइने प्याजको मूल्य हाल १ सय ९० रुपैयाँमा खुद्रा बिक्री भइरहेको छ । यस्तै, ३ सय ५० सय रुपैयाँमा बिक्री भइरहेको काउलीको अहिले थोक मूल्य ८ सय रुपैयाँ पुगेको छ । त्यसैगरी २ सय रुपैयाँ प्रति ढकको हाल ३ सय ७० रुपैयाँ पुगेको छ ।

दसैँमा बढेको तरकारीको मूल्य घट्न समय लाग्ने तरकारी व्यापारी बताउँछन् । यो दसैँमा बढेको तरकारीको मूल्य आगामी माघसम्म पर्ने उनीहरूको दाबी छ । कात्तिकदेखि माघ महिनासम्म तुलनात्मक रूपमा कम तरकारी आउने गरेको बल्खु कृषि तथा तरकारी बजारका अध्यक्ष मोहन बस्नेतले जानकारी दिए ।

तरकारी भारतबाट ल्याउनुपर्ने भएकाले स्वदेशी उत्पादन नबढेसम्म तरकारीको मूल्य खासै नघट्ने बजारका अध्यक्ष बस्नेतको दाबी छ । चाडवाड मनाउन सबै व्यस्त भएका कारण तरकारी उत्पादन र कामदारको अभाव भएपछि कृषकको बारीबाट बजारसम्म तरकारी ल्याउनसक्ने अवस्था नभएका कारण पनि मूल्य दोब्बर वृद्धि भएको उनको तर्क छ ।

मन्त्रालय बेखर

उपत्यकामा मात्र होइन, देशभर तरकारीको भाउ महँगिएको छ । किसानको बारीमा उत्पादन भएको तरकारी पुरानै मूल्यमा बिक्री गरिरहेका किसानले बताइरहेका छन् नि ? भन्ने प्रश्नमा यस विषयमा आफूलाई जानकारी नभएको कृषि तथा पशुपन्छी विकास मन्त्रालयका प्रवक्ता डा.हरिबहादुर केसी बताउँछन् ।

कालीमाटीमा आएको तरकारीको मूल्य मात्र मन्त्रालयलाई थाहा हुने, किसानसँग व्यापारीले कति मूल्यमा किनेर ल्याए भन्ने विषयमा जानकारी नहुने उनको बताए ।

‘कृषि मन्त्रालयले दसैँमा अप्रत्यक्ष रूपमा बजार तरकारी मूल्य वृद्धि भएको विषयमा अनुगमन भइरहेको छ । किन र कहाँ कसरी तरकारीको मूल्य वृद्धि भइरहेको छ भनेर जानकारी लिइरहेका छौँ,' उनले भने, ‘अनुसन्धानसँगै तरकारी व्यवसायीसँग छलफल र अनुगमनका लागि सम्बन्धित निकायलाई जानकारी गराएका छौँ ।’

तरकारी र फलफूलको मूल्यवृद्धि भएको विषयमा सम्बन्धित कृषि मन्त्रालय पक्कै जानकार हुनुपर्छ । तर, बजारमा तरकारीको भाउ दिनहुँ बढेपछि उपभाेक्ता मारमा परेको विषयमा कृषि मन्त्रालय जहिले पनि मौन बस्दै आएको छ ।

प्रकाशित मिति: शुक्रबार, कात्तिक १४, २०७७ ०८:०५