नेकपा नेता चौरसियाको हत्या अनुसन्धानमा यसरी चुक्यो प्रहरी

तस्वीर : रासस

A+ A A-

एक साता भइसक्यो । जिल्ला प्रहरी कार्यालय पर्साअगाडि हरेक दिन प्रदर्शनकारी भेला भइरहेका छन् । ब्यानरमा लेखिएको छ, ‘हत्यारालाई कारबाही गर’ ।

६ कात्तिकमा विन्दवासिनी गाउँपालिकाको प्रसौनीभाठामा सत्तारूढ नेकपाका दुई गुटबीचको झडपमा मुकेश चौरसियाको ज्यान गएपछि पर्सा अशान्त बनेको छ । नेकपा एमाले र नेकपा माओवादी केन्द्रबीच केन्द्रमा एकता भएको अढाई वर्ष पुगिसके पनि तल्ला कमिटी समायोजनमा विवाद हुँदा जघन्य अपराधको रूप देखा परेको हो ।

६ कात्तिकमा गाउँपालिका कमिटीका पदाधिकारीको सपथ कार्यक्रम थियो । प्रदेश २ का प्रहरी प्रमुख डीआईजी धीरजप्रताप सिंहका अनुसार पूर्वसांसद एवं नेकपाका केन्द्रीय सदस्य राजकुमार गुप्ता पक्षले आफ्नो गुटलाई नबोलाएको भन्दै कार्यक्रम बिथोल्न खोजेका थिए । ‘नबोलाएको पक्षले आक्रोशस्वरूप घटना गराएको देखिन्छ,’ सिंह भन्छन् ।

मृतक चौरसियाको परिवारले गुप्ताकै योजनामा घटना भएको जिकिर गर्दै उनलाई कानुनी कारबाही गर्नुपर्ने अडान लिएको छ । तर प्रहरीले गुप्ताविरुद्ध किटानी जाहेरी लिन मानेको छैन । हप्तादिनसम्म प्रहरीले अनुसन्धानलाई लिकमा ल्याउन नसक्दा हत्या कसुरको यो विषय सत्तारूढ दलभित्रको राजनीतिक दाउपेचको अस्त्र बन्न पुगेको छ ।

यसरी चुक्यो प्रहरी

दुई पक्षबीच झडप भएकै साँझ गुप्तासहित ८ जनालाई प्रहरीले नियन्त्रणमा लिएको थियो । जिल्ला प्रहरी कार्यालय पुर्‍याएर राति ९ बजे उनीसहित ५ जनालाई छोडियाे । नियन्त्रणमा लिइएका बाँकी ३ जना हिरासतमै छन् । डीआईजी सिंहका अनुसार हिरासतमा रहेका देवा सहनी, हनिफ मियाँ र शोकदीन गद्दीलाई गुप्ताकै घरबाट पक्राउ गरिएको हो ।

मृतकको परिवारले प्रहरी हिरासतमा रहेकाहरू गुप्ताको घरबाट पक्राउ परेकोले पनि उनकै योजनामा हत्या भएको अभियोग लगाएको छ । यसका साथै गुप्ताले सिंहलाई तह लगाइदिने भन्दै धम्क्याउने गरेको दाबीसमेत पीडित परिवारको छ । डीआईजी सिंह भने घटनाका बेला गुप्ता घटना स्थलभन्दा ११ किलोमिटर टाढा आफ्नै घरमा रहेको भन्दै उनको प्रत्यक्ष संलग्नता नदेखिएको दाबी गर्छन् । यही आधारमा प्रहरीले गुप्ता विरुद्धको जाहेरी लिन अस्विकार गरेकाे छ ।

मृतक मुकेश चौरसिया

प्रहरीले एकातिर अनुसन्धान नै नगरी गुप्ताको संलग्नता इन्कार गरिदिएको छ । अर्कोतिर गुप्ताकै घरबाट तीन जनालाई पक्राउ गरेको चाहिँ स्विकारेको छ । संलग्न नभएको हो भने गुप्ताको घरमा अभियुक्त कसरी पुगे ? झडपको भिडियोसमेत सार्वजनिक भएको छ ।

सिंहका अनुसार पक्राउ परेकाहरू भिडियोमा देखिएका हुन् । घटनामा सात जनाको संलग्नता रहेको समेत उनले बताए । प्रहरीले सुरुमै गुप्ताको नाममा जाहेरी लिन नमान्नुले समेत यो घटनामा सत्तारूढ दलभित्रको गुटबन्दीले काम गरेको प्रष्ट बुझ्न सकिन्छ । ‘प्रहरीले अनुसन्धानलाई आफ्नो काबुमा ल्याउन जति बढी समय लगाउँछ उति यो विषय जटिल बन्नेछ,’ पूर्व डीआईजी हेमन्त मल्ल भन्छन् ।

जाहेरी लिँदैमा उसलाई मुद्दा चलाउनै पर्छ भन्ने अनिवार्य हुँदैन । अनुसन्धानबाट प्रमाण नजुटे प्रहरीले अद्दालतमा मुद्दा दर्ता नगर्न पनि सक्छ । ‘प्रहरीले यो घटनाको घनत्वलाई मूल्यांकन गर्न चुकेजस्तो देखिन्छ,’ मल्ल भन्छन्, ‘जाहेरी लिएपछि पक्राउ नगर्दा अझ बढी दबाब आउला भनेर पनि प्रहरीले यस्तो निर्णय गरेको हुनसक्छ । तर जाहेरी लिँदैमा बिग्रने केही थिएन ।’

मधेस झर्‍याे सत्तारुढ दलभित्रको राजनीति

जाहेरी नलिएसम्म पीडित परिवारले शव नबुझ्ने र पोस्टमार्टमसमेत नगराउने अड्डी कसेको छ । यो मुद्दामा नेकपाका शीर्षस्थ नेताले छुट्टाछुट्टै विज्ञप्ति निकालेर दोषीलाई कारबाही गर्न माग गरेका छन् । ७ कात्तिकमा नेकपाका वरिष्ठ नेता माधवकुमार नेपालले र ९ कात्तिकमा नेकपा कार्यकारी अध्यक्ष पुष्पकमल दाहाल प्रचण्डले विज्ञप्ति निकालेर प्रहरीले मुद्दा दर्ता नमान्नु आश्चर्य भएको बताए ।

प्रचण्डले जारी गरेको विज्ञप्ति

माधव नेपालले जारी गरेको शोक वक्तव्य

चौरसिया हत्या प्रकरणले नेकपाको आन्तरिक कलहसमेत चर्कने संकेत गरेको छ । घटनालगत्तै प्रचण्ड खेमाका मातृकाप्रसाद यादव र नेपाल समूहका सुरेन्द्र पाण्डे पर्सा झरेर धर्नालाई टेवा दिइरहेका छन् । पीडित परिवारले योजनाकार ठानेका गुप्ता प्रधानमन्त्री केपी ओली पक्षीय हुन् । ओली पक्षको प्रभावकै कारण प्रहरीले समेत गुप्ताविरुद्ध जाहेरी लिन नमानेको प्रचण्ड र नेपाल पक्षको दाबी छ ।

धर्नामासमेत ओली पक्षको सहभागीता छैन भने नेपाल र प्रचण्ड पक्षले भने यसलाई चर्काउने दाउ हेरिरहेका छन् । १५ पुस २०७६ मा नेकपा बारा जिल्ला समितिले स्थानीय तहहरूमा अध्यक्ष र सचिव मनोनयनको सिफारिस गरेर अनुमोदनका लागि प्रदेश कार्यालयमा पठाएको थियो । प्रदेश कार्यालयले २८ भदौ २०७७ मा गरेको परिपत्रमा जिल्लाले पठाएको भन्दा भिन्दै नाम आएपछि विवाद चुलियो ।

८ असोजमा शपथको कार्यक्रम समेत निर्धारण गरिएको थियो । नवगठित समितिमा ओली पक्षका मात्रै समेटिएको भन्दै त्यसविरुद्ध नेपाल र प्रचण्ड समूहले संगठन विभागमा उजुरी दियो । त्यसपछि शपथ कार्यक्रम रोकियो ।

यो पनि पढ्नुहोस्

हत्या गरिएका नेकपा नेताकी पत्नी भन्छिन्, ‘पैसा चाहिँदैन, इन्साफ दिलाइदिनुस्’

बारामा सम्भावित दुर्घटना थामिए पनि छिमेकी जिल्ला पर्सामा भने जघन्य अपराधमा परिणत भयो । पार्टी एकीकरणपछि २ नम्बर प्रदेशमा स्थानीय तहको कमिटी गठनमा सबैभन्दा बढी समस्या रहेको छ । संगठन विभाग प्रमुख वामदेव गौतमले समस्याग्रस्त यही प्रदेशबाट विवाद मिलाउन थाल्ने बताएका थिए ।

एकीकरणपछि मधेसमा ओलीलाई यसअघि नेकपा माओवादीको राजनीतिबाट आएका प्रभु साहले साथ दिएका छन् भने प्रचण्ड र नेपाल समूहको मत मिलेको छ । ओली पक्षलाई काउन्टर दिन प्रचण्डले मातृका यादवलाई खटाएका छन् भने नेपालले सुरेन्द्र पाण्डेलाई अघि सारेका छन् ।

प्रहरीको इगो !

४ पुसमा प्रहरी प्रधान कार्यालयले चितवनमा प्रहरी उपरीक्षक (एसपी) दानबहादुर मल्लको ठाउँमा एसपी गंगा पन्तलाई पठाउने निर्णय गर्‍याे । तर, प्रचण्डका अंगरक्षक समेत भइसकेका मल्लले एक हप्तासम्म जिल्ला नछोडेपछि प्रदेश प्रहरी कार्यालयले १२ घण्टाभित्र जिल्ला छोड्न निर्देशन दियो । तर पनि एसपी पन्त चितवन जान पाइनन् । त्यसको सट्टा पर्साको रवानामा पन्तलाई मनाइएको थियो ।

पन्तलाई चितवन जान रोक्ने बलशाली पात्र अरू कोही नभएर सत्तासीन दलकै कार्यकारी अध्यक्ष प्रचण्ड थिए । यसको कारण थियो- स्थानीय तह निर्वाचनताका एसपी पन्तले फेसबुकमा गरेको एउटा कमेन्ट । प्रचण्डबारे अमितसिंह कार्कीको फेसबुक स्ट्याटसको कमेन्टमा एसपी पन्तले ‘आरआइपी’ (रेस्ट इन पिस, श्रद्धान्जलि) भनेर कमेन्ट गरेकी थिइन् । त्यही कारण प्रचण्डले पन्तलाई उनको चुनावी क्षेत्र रहेको जिल्लामा नल्याउन चाहेका थिए ।

चितवन प्रहरी प्रमुख बन्न नपाएको इगो पन्तले पर्सामा साँधेको हुन सक्ने प्रचण्ड पक्षीय गुटको आरोप छ । तर पन्तले शिलापत्रसँग भनिन्, ‘भिडियो फुटेजमा गुप्ताको संलग्नता नदेखिएकोले जाहेरीमा उनको नाम नहाल्न भनेका हौँ । झुटो आरोप भनेर जान्दाजान्दै प्रहरीले कसरी जाहेरी लिने ? हामीलाई अदालतबाट भोलि कारबाही पनि त हुनसक्छ ।’

प्रकाशित मिति: बुधबार, कात्तिक १२, २०७७ १९:००