बालपत्र : बाबा आए पो दसैँ आउँछ

A+ A A-

यसपालिको दसैँ पनि नरमाइलो हुने भयो । हाम्रो घरमा त दसैँ आएको खुसी कसैलाई पनि छैन । मम्मी, हजुरबुबा, हजुरआमा, दिदी सबैले एउटै कुरा भन्नुहुन्छ, बाबा आए पो दसैँ आउँछ । बाबाबिनाको दसैँ त दसैँ नै हुन्न रे ।

परिवारका सबै सदस्य जम्मा भई, ठूलाबडाको हातबाट टीका जमरा लगाई आशिष लिने, मीठामीठा खानाका परिकार बनाई खाने, मामाघर जाने, पिङ खेल्ने, रमाइलो गर्ने दसैँमा घरको एउटै मात्र छोरा, मेरो बाबा नहुँदा कोही पनि खुसी हुनु हुन्न ।

पैसा कमाउन विदेश ‘कोरिया’ जानुभएको बाबा ३ वर्षपछि यो दसैँमा घर आउँछु भन्नुभएको थियो । तर, यसपटक पनि बाबा घर नआउने खबर मात्रै आयो । मम्मीले भन्नुभएको, अहिले कोरोनाको महामारी छ रे, यस्तो बेला बाबा घर आउनुभयो भने कोरोना लाग्छ रे । अनि यो समयमा घर आउँदा धेरै समस्या हुन्छ रे, त्यसैले बाबा यो पटक नआउँदा नै वेश हुन्छ रे, हामी सबैका लागि ।

बाबा नआउने खबर थाहा पाएपछि कोरोनासँग निकै रिस उठेको छ मलाई, किनकि कोरोनाले गर्दा न त स्कुल जान पाएको छु, न कतै घुम्न जान नै ।

हुँदाहुँदा यस पटक पनि बाबाले हामीलाई टीका पनि लाउन नपाउने हुनु भयो ।

यति मात्रै कहाँ हो र ? घर आउँदा बाबाले मलाई ट्याब फोन ल्याइदिन्छु भन्नुभएको थियो । अनि मीठामीठा धेरै चकलेट पनि । तर, त्यो पनि खान नपाइने भयो । उफ ! यो कोरोना कहिले सकिन्छ होला है ?

हाम्रो गाउँको घर, तनहुँको लाकुँरी भन्ञ्याङमा हो । मेरो हजुरबुबा, हजुरआमा उतै हुनुहुन्छ । यहाँ काठमाडौंको टोखाको नयाँ घरमा म, मम्मी अनि मेरो दिदी मात्रै बस्छौँ ।

तर, यसपालि जताततै कोरोनाका बिरामीहरू बढिरहेका छन् । त्यसैले हामी गाउँ पनि नजाने भनेर मम्मीले भन्नुभएको छ ।

गाउँमा हजुरबुबाआमा दुवैले नियमित औषधि खानुपर्छ । अनि हामी टाढाबाट जाँदा कोरोनाको डर धेरै हुन्छ रे !

गाउँ जान नपाए पनि भञ्याङको लिङ्गे पिङ, हजुरआमाले पकाएको मीठो मासु, अनि टीका र जमरा लगाउँदै गाउँघरमा हिँड्दा दक्षिणामा पाइने पैसाको नयाँ नोट, नयाँ कपडा, मामाघर जाँदा हुने रमाइलो निकै मिस गरेको छु ।

जे होस्, यसपालिको दसैँको टीका र आशीर्वाद विदेशबाट बाबा, गाउँबाट हजुरबुबा हजुरआमासँग फोनबाटै लिने भनेर मम्मीले भन्नुभएको छ, ठीकै छ- त्यसैमा खुसी छु ।

हामीले त दसैँ यसरी मनाउँदै छौँ, तपाइँहरू पनि कोरोनालाई छल्दै खुसी भएर दसैँ मनाउनुस् है !
ह्याप्पी दसैँ !

प्रकाशित मिति: शनिबार, कात्तिक ८, २०७७ ०७:४५