लुम्बिनी प्रदेशका ४ वटै कोरोना विशेष अस्पतालमा नि:शुल्क उपचार

A+ A A-

बुटवल- सरकारले कोरोनाको परीक्षण र उपचारको खर्च स्वय् नागरिकले व्यहोर्नुपर्ने निर्णय गरे पनि लुम्बिनी प्रदेशका ४ कोरोना विशेष अस्पतालले भने उपचार खर्च नागरिकसँग नलिई उपचार गरेका छन् ।

कात्तिक २ देखि नै लागू हुने गरी सरकारले गरिब, विपन्न र अपाङ्गता भएका नागरिक बाहेक आमसर्वसाधारण नागरिकले कोरोनाको परीक्षण र उपचारको सम्पूर्ण खर्च आफैँ व्यहोर्नुपर्ने निर्णय गरेको थियो । तर, लुम्बिनी प्रदेशका बुटवलस्थित कोरोना विशेष अस्पताल, भैरहवास्थित भिम अस्पताल, दाङ बेलझुण्डी र भेरी अस्पताल बाँकेमा उपचार गराइरहेका विरामीहरुले नि:शुल्क उपचार पाइरहेका छन् । लुम्बिनी प्रदेशका मुख्यमन्त्री शंकर पोखरेलले प्रदेशका ४ वटै कोरोना विशेष अस्पतालमा लक्षणसहितका विरामीको उपचार नि:शुल्क भइरहेको जानकारी दिए ।

हिजो अध्यावधिक तथ्याङ्क अनुसार प्रदेशका ४ कोरोना विशेष अस्पतालमा मात्र १ सय २७ जना लक्षण सहितका विरामीको उपचार भइरहेको छ । त्यस्तै ४ अस्पतालमा २९ जना आईसीयूमा रहेका छन् ।

लुम्बिनी प्रदेशका सामाजिक विकास मन्त्री सुर्दशन बरालले प्रदेश सरकारले स्थापना गरेको कोभिड कोषमा रकम रहेकाले अहिले ४ वटै कोरोना विशेष अस्पतालमा रहेका संक्रमितको उपचार एवं परीक्षण नि:शुल्क भएको बताए । उनले अहिले सम्म कोभिड कोषकै रकमबाट उपचार र परीक्षण गरिएको भन्दै कोषमा पैसा सकिएमा मात्र अर्को निर्णय गरेर संक्रमितको उपचारको व्यवस्था गर्ने उनले बताए ।

कोरोना विशेष अस्पतालका फोकल पर्सन डा. सुर्दशन थापाले अहिले सम्म संक्रमितको उपचार वापत रकम नलिएको बताए । ‘आज यस बारे के गर्ने थप निर्णय होला । बैठक पनि हामी बस्दै छौं,’ उनले भने ।