लुम्बिनी प्रदेशमा आईसीयू अभाव, उपचार नपाएर ज्यान गुमाउँदै संक्रमित

फाइल तस्वीर

A+ A A-

शनिबार साँझ बुटवल उपमहानगरपालिकाका एक कर्मचारीको आईसीयू बेड अभावमा मृत्यु भयो । लुम्बिनी प्रादेशिक अस्पताल पुगेका उनलाई लामो समय कोरोना विशेष अस्पतालमा बेड खाली नभएका कारण प्रादेशिक अस्पतालको फिबर क्लिनिकमा राखिएको थियो । उनको स्वास्थ्य अवस्था गम्भीर भएपछि फिबर क्लिनिकबाट विशेष अस्पतालको बेडमा रिफर गरेको थियो । अस्पताल पुर्याएको केही बेरमै उनको मृत्यु भएको थियो ।

उपमहानगरपालिका नायव सुब्बा तहका ती कर्मचारीलाई २७ असोजमा कोरोना देखिएपछि उनी होम आइसोलेसनमै बसेका थिए । होम आइसोलेसनमा बस्दै गर्दा स्वास्थ्यमा थप जटिलता आएपछि कोरोना विशेष अस्पतालमा उपचारका लागि गएका ४९ वर्षका ती पुरुषको ६ बजे मृत्यु भएको थियो ।
गत साता बुटवल उपमहानगरपालिका- ११ ८४ वर्षीय वृद्ध रूपन्देही अस्पतालमा आईसीयू बेड नपाएपछि दाङ लैजाँदै गर्दा बाटोमा मृत्यु भएको थियो ।

त्यस्तै, गत शनिबार तिलोत्तमा नगरपालिका- ३ कि ६६ वर्षीया कोराना संक्रमित महिला बुटवलमा आईसीयू बेड नहुँदा थप उपचारका लागि दाङको बेलुझण्डीस्थित कोरोना विशेष अस्पतालमा लगिए पनि लैजान साथ उनको मृत्यु भएको थियो ।

रूपन्देहीकै देवदह नगरपालिकाका ८७ वर्षीय पुरुषकाे पनि आईसीयू बेड नपाएपछि लुम्बिनी प्रादेशिक अस्पतालको ज्वरो क्लिनिकमा राखेर उपचार गर्दै गर्दा केही हप्ताअघि मृत्यु भएको थियो ।

त्यस्तै, ११ असोजमा बुटवलकै एक जना ६१ वर्षीय पुरुषको कोरोना संक्रमणका कारण मृत्यु भयो । उच्च ज्वरो, खोकी र स्वासप्रश्वासमा समस्या देखिएपछि लुम्बिनी प्रादेशिक अस्पतालमा ल्याएका उनलाई जिन एक्सप्ट विधिबाट पीसीआर परीक्षण गर्दा पोजिटिभ देखिएको थियो ।

स्वास्थ्य बिग्रेका कारण तत्काल आईसीयूमा राख्नुपर्ने भए पनि अस्पतालको कोरोना विशेष अस्पतालमा आईसीयूमा बेड खाली थिएनन् । रूपन्देहीमै अन्यत्र लैजान पनि सम्भव थिएन । जसकारण बिरामीको स्वास्थ्य जटिल बन्दै गएपछि उनको आईसीयू बेड नपाएकै कारणले मृत्यु भयो ।

यी त प्रतिनिधि उदाहरण मात्र हुन । पछिल्लो समय प्रदेशमा लक्षणसहितका जटिल संक्रमित थपिने क्रम बढेसँगै प्रदेशमा आईसीयू बेड अभाव हुन थालेको छ । जसकारण विरामीले उपचार नपाएरै मृत्युवरण गर्न बाध्य भएका छन् ।

छैन सरकारको तयारी

हालसम्म प्रदेशका चार कोभिड विशेष अस्पतालमा जम्मा ३४ बेड रहेको छ । पछिल्लो समय कोरोना संक्रमितका लागि २० करोड रुपैयाँ विनियोजन गरेकोमा प्रदेश सरकारले त्यसबाट जम्मा ७ वटा भेन्टिलेटर मात्र थप गरको छ । रूपन्देहीका दुई तथा बाँके र दाङका एक/एक गरी ४ वटा अस्पतालमा ३४ बेडको आईसीयू सञ्चालनमा रहेका छन् । त्यसमध्ये बुटवलको कोरोना विशेष अस्पतालमा गौतमबुद्ध सामुदायिक मुटु अस्पतालले दिएका भेन्टिलेटर र आईसीयू बेड हुन् ।

मुटु अस्पतालले कोरोना विशेष अस्पतालका लागि ४ वटा भेन्टिलेटर र ८ वटा आईसीयू बेड उपलब्ध गराएको छ । प्रदेश सरकारले आईसीयू र भेन्टिलेटर थप नगर्ने हो अरू धेरैकाे ज्यान जाेखिममा रहेकाे चिकित्सकले बताएका छन् ।

लक्षणसहितका संक्रमित थपिँदै गएमा आईसीयू बेड अभाव हुने भएकाले बेड थप गर्न लुम्बिनी चिकित्सक संघले सामाजिक विकासमन्त्री सुर्दशन बराललाई भेटेरै ज्ञापन पत्र समेत दिएको थियो । संघका महासचिव डा. सन्तोष पोखरेलले प्रदेशमा संक्रमण दर तीव्र भएसँगै आईसीयू बेड थप गर्नमा प्रदेश सरकार लाग्नुपर्ने बताउँछन् ।

प्रकाशित मिति: आइतबार, कात्तिक २, २०७७ १४:२७