सर्लाहीमा झडप, २२ प्रहरी र १६ कांग्रेस कार्यकर्ता घाइते

A+ A A-

सर्लाहीमा ६५ वर्षीय दलित वृद्धको हत्याको घटना विषयमा जिल्ला प्रहरी कार्यालय घेराउ गर्न पुगेका नेपाली कांग्रेसका कार्यकर्ता र प्रहरीबीच झडप भएको छ । रामनगर गाउँपालिका- ७, सिसौटका महेन्द्र रामको हत्याको घटनामा प्रहरीको भूमिका निष्पक्ष नदेखिएको भन्दै नाराबाजी गर्दै जिल्ला प्रहरी कार्यालय सर्लाही पुगेका प्रदर्शनकारी र प्रहरीबीच झडप भएको हो ।

कांग्रेस सांसद अमरेश सिंहको नेतृत्वमा प्रदर्शकारीको ढुंगामुढाबाट डीएसपी मदन कुँवर, उद्धवसिंह भाट र दुई जना इन्सपेक्टरसहित २२ जना प्रहरी घाइते भएका छन् । प्रदर्शनकारीका तर्फबाट समेत १५/१६ जना घाइते भएको प्रहरीले जनाएको छ । अश्रुग्यास र प्रहरीको लाठीचार्जबाट उनीहरू घाइते भएका हुन् ।

प्रदर्शकारीले आक्रोश पोख्दै ढुंगामुढा गरेपछि झडप भएको सर्लाहीका प्रहरी प्रवक्ता डीएसपी मदन कुँवरले जानकारी दिए । उनका अनुसार घाइते भएका प्रहरीसँग प्रदर्शनकारीको अवस्था समान्य छ । उनीहरूको सर्लाहीको जिल्ला अस्पताल तथा स्थानीय क्लिनीकमा उपचार भइरहेको डीएसपी कुँवरले बताए ।

ढुंगामुढा गरेको भन्दै प्रहरीले तीन प्रदर्शनकारीलाई समेत नियन्त्रणमा लिएको छ । गत २१ असोजमा बारीमा घिरौँला टिपेको विषयमा स्थानीय चन्दुनन्न महरा र विनोद महरा पक्षबीच ढुंगा हानाहान हुँदा ६५ वर्षीय महेन्द्र राम घाइते भएका थिए । उनको उपचारको क्रममा वीरगन्जस्थित नेपाल इन्डो अस्पतालमा भोलिपल्ट २२ गते मृत्यु भएको थियो ।

सो घटनामा प्रहरीले दुई जनालाई पक्राउ गरी अनुसन्धान गरिरहेको डीएसपी कुँवरको भनाइ छ । तर, स्थानीय तथा मृतक रामका आफन्तले भने अन्य ९ जनासमेत घटनामा संलग्न रहेको भन्दै उनीहरूलाई पक्राउ गरी कारबाही प्रक्रियाअघि बढाउन माग गरिरहेको छ । पीडित परिवारले मृतकलाई शहिद घोषणा, क्षतिपुर्ती र दोषीलाई कडा कारबाहीको माग गर्दै आएको छ ।