कहाँ छन् उप–प्राध्यापक कुटपिट प्रकरणका मुख्य योजनाकार ?

तस्वीर : त्रिवि नेविसंघ सभापति हरि आचार्य र सचिव योगन्द्र रावल

A+ A A-

त्रिभुवन विश्वविद्यालय (त्रिवि) केन्द्रीय क्याम्पस कीर्तिपुरका उप–प्राध्यापक प्रेमबहादुर चलाउनेमाथि कुटपिट गर्ने दुई जना पक्राउ परे पनि मुख्य योजनाकार भने अझै फरार छन् । चलाउनेमाथि आक्रमण गर्ने रुपेश साह र रविन लामालाई आइतबार साँझ महानगरीय प्रहरी परिसरको विशेष टोलीले पक्राउ गरिसकेकाे छ ।

रविन सिरहाबाट र साह भक्तपुरबाट पक्राउ परेका हुन् । उनीहरू दुवै जना सिरहाका स्थायी बासिन्दा हुन् । चलाउनेमाथि भौतिक आक्रण साह र लामाले आफूले गरेको स्वीकार गरेको काठमाडौं प्रहरी प्रमुख एसएसपी श्यामलाल ज्ञवालीले बताए । ‘उप–प्राध्यापक चलाउनेमाथि मोटरसाइकलमा गएर भौतिक आक्रमण गर्ने साह र लामा नै हुन् । तर, उनीहरू प्रयोग भएको देखिन्छ,’ एसएसपी ज्ञवालीले भने ।

मानस कोइरालाको नाममा रहेको बा८१प २७८५ नम्बरको बुलेट मोटरसाइकल लामाका आफन्तले किनेका थिए । सोही मोटरसाइल रविन लामाले उक्त घटनामा प्रयोग गरेका थिए । मानसले रविनका आफन्तलाई मोटरसाइकल बेचे पनि लकडाउनका कारण नामसारी हुन भने बाँकी थियो । मानस हाल लण्डनमा छन् ।

लामा र साहलाई घटनाको पाँच दिनपछि पक्राउ गर्न प्रहरी सफल भए पनि चलाउनेमाथि आक्रमणको योजना बनाउने नेपाली कांग्रेसको भ्रातृ संगठन नेपाल विद्यार्थी संघका त्रिविका सभापति हरि आचार्य र सचिव योगेन्द्र रावल भने अझै फरार छन् । उनीहरूले नै चलाउनेमाथि भौतिक आक्रमण गर्न लामा र साहलाई लगाएका थिए । चलाउनेलाई आक्रमण गर्दा हरि र रावलसमेत घटनास्थलमै गएको खुलेको एसएसपी ज्ञवालीको भनाइ छ ।

‘चलाउनेमाथि भौतिक आक्रमण हुँदा हरि र रावल पनि त्यहीँ थिए । आक्रमण चाहिँ लामा र साह दुई जनाले गरेको देखिन्छ । उनीहरू दुवै जना त्रिविमा विद्यार्थी पनि होइनन् । लामा केही दिनअघि मात्र मलेसियाबाट आएको देखिन्छ,’ ज्ञवालीले भने । हरि र रावलकै योजनामा उनीहरूले चलाउनेमाथि आक्रमण गरेको उनको भनाइ छ ।

चलाउनेमाथि २० असोजमा त्रिवि परिसरभित्रकै नेपाल बैंकअगाडि पैसा साट्न निस्केका बेला आक्रमण भएको थियो । कुटपिटमा परी गम्भीर घाइते भएका चलाउनेको हाल ललितपुरकाे नख्खुस्थित मेडिसिटी अस्पतालमा उपचार भइरहेको छ । उनको दाहिने खुट्टा भाँचिएको छ भने शरीरभरि निलडाम छ ।

कहाँ छन् मुख्य योजनाकार योगेन्द्र र हरि ?

आक्रमण भएको पाँच दिनपछि प्रहरीले बल्लबल्ल दुई जनालाई पक्राउ गरेको छ । मुख्य योजनाकार अझै फरार छन् । पक्राउ परेका साह र लामालाई पक्राउ गर्नसमेत प्रहरीलाई हम्मेहम्मे परेको थियो । उनीहरू दुवै जनाले नियमित बोक्ने मोबाइल फोन र छिनछिनमा परिवर्तन गर्ने मोबाइल नम्बरका कारण प्रहरीलाई पक्राउ गर्न गाह्रो परेको एसएसपी ज्ञवालीको भनाइ छ ।

उनीहरूले यसअघिदेखि चलाउँदै आएको मोबाइल हराएको भन्दै दूरसञ्चार प्रदायक कम्पनीलाई बन्द गराउन लगाएका थिए । त्यसरी नै नयाँ नम्बर पनि त्यसै गरी १–२ घण्टा चलाउने र फेरि हरायो भन्दै बन्द गराउँदै आएका थिए । जसका कारण प्रहरीले उनीहरूलाई पक्राउ गर्न पाँच दिन लगाएको हो ।

अन्ततः उनीहरूको मोबाइल सम्पर्कबाट नै पक्राउ गर्न सफल भएको प्रहरीको दाबी छ । लामा सिरहाबाट रुपन्देही हुँदै भारत भाग्ने योजनामा थिए । हरि र योगेन्द्रले पनि मोबाइल बन्द गराएका छन् । उनीहरू नेपाली कांग्रेसकै कुनै उच्च तहका नेताको घरमा सेल्टर लिएर बसेको अनुमान प्रहरीको छ । हरि र योगेन्द्र नेपाली कांग्रेसका नेता कृष्णप्रसाद सिटौलानिकट विद्यार्थी नेता हुन् ।

काठमाडौं प्रहरी स्रोतका अनुसार आक्रमणलगत्तै योगेन्द्र र हरि नेपाली कांग्रेसका नेता अर्जुननरसिंह केसीको घरमा लुकेको सूचना आएको थियो । सोही सूचनाका आधारमा प्रहरी केसीको घरमा पुगेका थिए । तर केसीको घरमा उनीहरू नभेटिएको प्रहरी अधिकारीको भनाइ छ । अझै पनि उनीहरू काठमाडौंमा रहेका केही नेताकै घरमा बसेको आशंका गर्दै प्रहरीले निगरानी बढाएको छ ।

घटनामा संलग्न दुई जना पक्राउ परिसकेकाले उनीहरू पनि ढिलोचाँडो कानुनी दायरामा ल्याइछाड्ने प्रहरीको भनाइ छ । १ भदौदेखि नेविसंघका हरि र रावल समूहले त्रिविको समाजशास्त्र विभागमा लगाएको ताला क्याम्पस प्रशासनले अदालतको स्टे अर्डर आएपछि १४ असोजमा खोलेको थियो ।

सोही ताला खोलेको विषयमा नेविसंघ र प्राध्यापकबीच १४ गतेपछि विवाद हुँदै आएको थियो । त्यही कारण आफूमाथि आक्रमण गरिएको चलाउनेको भनाइ छ ।

प्रकाशित मिति: सोमबार, असोज २६, २०७७ १६:५९