लुम्बिनी : लकडाउन खुलेको २ महिनामा संक्रमण दर दोब्बरले वृद्धि

A+ A A-

सरकारले १ भदौबाट स्वास्थ्य मापदण्ड अपनाएर अन्तर्राष्ट्रिय उडान, यातायात, होटल, बजार, रेष्टुराँ, ट्रेकिङ र पर्वतारोहण व्यवसाय खोल्ने अनुमति दियो । शैक्षिक संस्था, प्रदर्शनी, भेला, पार्टी प्यालेस, जिम खाना, धार्मिक र सामाजिक स्थल भने अहिलेसम्म बन्द अवस्था छन् ।

सरकारले स्वास्थ्य मापदण्ड अपनाउँदै जीवनयापनलाई सहज बनाउन बजार पूर्ण रूपमा खुल्ला गरिसकेको छ । तर, बजारमा सामान्य स्वास्थ्य मापदण्ड नअपनाउँदा कोरोना संक्रमणको दर भने दिनानुदिन बढ्दै गइरहेको छ ।

सरकारले १० चैत ०७६ मा लकडाउन गरेको समयदेखि भदौसम्म आइपुग्दा लुम्बिनी प्रदेशमा कुल संक्रमित ५ हजार १ सय ४६ थियो । तर, लकडाउन खुलेको २ महिनामै संक्रमण दर भने दोब्बरले वृद्धि भएको छ । हाल प्रदेशमा १३ हजार ३ सय २१ जना कोरोना संक्रमित रहेका छन् ।

चैतदेखि १ भदौसम्म लुम्बिनी प्रदेशमा १७ जनाको कोरोना संक्रमणबाट मृत्यु भएकोमा पछिल्लो दुई महिनायता मृत्यु हुनेको संख्या १ सय ३ पुगेको छ । स्वाथ्य निर्देशनालय लुम्बिनी प्रदेशका अनुसार १ सय ३ जनामध्ये तीन जना संक्रमितले आत्महत्या गरेको विवरण समेटिएको छ ।

संक्रमित र मृत्यु मात्र होइन लकडाउन खुलेपछि सक्रिय संक्रमितको संख्या पनि दैनिक बढिरहेको स्वास्थ्य निर्देशनालयले बताएको छ । १ भदौसम्म प्रदेशमा ५ हजार १ सय ४६ जना सक्रिय संक्रमित रहेकोमा अहिले ३ हजार १ सय ४६ सक्रिय संक्रमित पुगेको छ ।

लुम्बिनी प्रदेशका १२ जिल्लामध्ये सबैभन्दा धेरै सक्रिय संक्रमित अहिले रूपन्देहीमा छन् । स्वास्थ्य निर्देशनालय लुम्बिनी प्रदेशका वरिष्ठ जनस्वास्थ्य प्रशासक रोशनलाल चौधरीका अनुसार रूपन्देहीमा आइतबार राति ८ बजेको अध्यावधिक विवरणअनुसार जिल्लामा सक्रिय संक्रमित १ हजार २ सय ८८ रहेका छन् ।

लकडाउन खुलेयताका दुई महिनामा लुम्बिनी प्रदेशमा निको हुने दर भने घटेको छ । १ भदौसम्म ८३.०९ प्रतिशत रहेकोमा हाल प्रदेशमा संक्रमणमुक्त हुने दर ७५.५९ रहेको छ ।

त्यस्तै, लुम्बिनी प्रदेशका विभिन्न अस्पतालमा हालसम्म ४७ जना आईसीयूमा उपचारत छन् । अझ १ असोजदेखि बजार पूर्ण रूपमा खुलेका छन् । सरकारले जीवनयापन सहज बनाउने खुलेर जनजीवन सहज बनेपछि सर्वसाधारणले कोभिड- १९ लाई भने हल्लाका रूपमा लिन थालेका छन् । जसका कारण संक्रमण समुदायस्तरमा पुगिसकेको छ ।

मानिसको बढी भीडभाड हुने क्षेत्र सपिङ मल, व्यापारी केन्द्र र बजारमा अहिले भीड बढेको छ । अझ चाडपर्व नजिकिएसँगै बजारमा कोभिड- १९ को कहर भुलेर मानिसको भीड बढ्ने गरेको छ ।

मास्कको अनिवार्य प्रयोग गर्ने, भौतिक दूरी कायम गर्ने, नियमित हात धुने र स्यानिटाइजरको प्रयोग गर्ने जस्ता स्वास्थ्य सावधानी बजारमा कतै अपनाएको देखिँदैन । असुरक्षित चहलपहलले स्थिति नियन्त्रणबाहिर जाने चिकित्सकहरूको चिन्ता छ । बुटवलस्थित कोभिड अस्पतालका फोकल पर्सन तथा वरिष्ठ कन्सलटेन्ट डा सुदर्शन थापाले अबको अवस्थामा व्यक्ति आफैँ सचेत र सावधान हुनुपर्ने बताए ।

प्रकाशित मिति: सोमबार, असोज २६, २०७७ १५:०८