मन्त्री नै पालना गर्दैनन् कोभिड–१९ सुरक्षा मापदण्ड

A+ A A-

संस्कृति, पर्यटन तथा नागरिक उड्डयनमन्त्री योगेश भट्टराईले २४ असोजको अपरान्हमा फेसबुक पेजबाट आफूलाई कोरोना भाइरस संक्रमण भएको सार्वजनिक गरे । साथै, आफूसँग सम्पर्कमा आएकालाई सतर्क रहन र कुनै समस्या देखिएमा परीक्षण गरी ढुक्क हुन अनुरोध पनि गरेका छन् ।

तर पर्यटनमन्त्रीका दुई सातायताका गतिविधि नियाल्ने हो भने उनीसँग सम्पर्कमा आएकाहरू ढुक्क हुन त परको कुरा, त्रसित नै हुनुपर्ने अवस्था छ । उनी जहाँ पुगे स्वास्थ्य मन्त्रालयबाट जारी सुरक्षाका मापदण्ड विरलै अपनाए । उनले फेसबुक र ट्विटरमा सार्वजनिक गरेका आफ्नै तस्वीर यसका साक्षी हुन् । १५ असोजदेखि २३ असोजसम्म सहभागी जनाएर सार्वजनिक गरेका कुनै पनि तस्वीरमा भट्टराईले मास्क लगाएका छैनन् ।

पछिल्लो पटक २३ असोज अर्थात् भट्टराईलाई कोरोना भाइरस संक्रमण पुष्टि हुनु अघिल्लो दिनको भेटघाटसम्मै उनले मास्क नलगाई निर्धक्क छलफलमा सहभागिता जनाए । नेपालका लागि भारतीय राजदूत विनयमोहन क्वात्रासँग मन्त्रालयमै भेटेका भट्टराईले मास्क नलगाई मायाको चिनो आदानप्रदान गरेको तस्वीर उनको ट्विटर र फेसबुक एकाउन्टबाट सार्वजनिक गरे ।

मन्त्री र राजदूत आमनेसामने बस्दासमेत भट्टराईको मुहार मास्कविहीन देखिन्छ । ज्ञातव्य रहोस्, सोही साँझ आफूलाई हल्का ज्वरो आएपछि कोरोना भाइरस परीक्षण गर्न दिएको र भोलिपल्ट रिपोर्ट पोजिटिभ देखिएको उनले सार्वजनिक गरेका छन् ।

बिनामास्क सार्वजनिक कार्यक्रममा हिँड्डुल गर्ने भट्टराईको सिलसिला यतिमै रोकिँदैन । १५, १७ र १९ असोजमा मन्त्री भट्टराई क्रमशः कर्णाली, सुदूरपश्चिम र प्रदेश १ को दौडाहामा निस्किए । १५ असोजमा कर्णाली प्रदेशको राजधानी सुर्खेत ओर्लिएका उनले त्यहाँ सुर्खेत विमानस्थल विस्तार तथा स्तरोन्नतिका लागि केन्द्र सरकारसँग समझदारी गरे । तर, कर्णालीका मुख्यमन्त्री महेन्द्रबहादुर शाही, प्रदेशका आर्थिक मामिला सचिव घनश्याम उपाध्याय, नागरिक उड्डयन प्राधिकरणका महानिर्देशक राजन पोखरेललगायत सहभागी हस्ताक्षर कार्यक्रममा पनि भट्टराई मास्क नलगाई सहभागी भए ।

१७ असोजमा डोटी, बझाङ र बैतडी जिल्लामा परीक्षण उडानका लागि पुगे । त्यहाँ पनि उनले मास्क नलगाई कार्यक्रममा सहभागी भए । १९ असोजमा प्रदेशका १ को विराटगर पुगेका भट्टराईले मुख्यमन्त्री शेरधन राईसमेत सम्मिलित कार्यक्रममा मास्क नलगाई मञ्चमा विराजमान रहे । त्यहाँ पनि उनी विराटनगर विमानस्थल विस्तार एवं स्तरोन्नतिका लागि प्रदेश र केन्द्र सरकारबीच समझदारीका लागि पुगेका हुन् । होटलमा आयोजित कार्यक्रममा मुख्यमन्त्री राईसहित थुप्रैले मास्क लगाएका छैनन् ।

२१ असोजमा पर्यटन सचिव केदारबहादुर अधिकारीले अवकाश पाएपछि आयोजित बिदाइ कार्यक्रममा पनि मन्त्री भट्टराईले मास्कबिनै सचिवलाई माला र टोपी लगाइदिए ।

अनावश्यक काममा मास्क नलगाई सहभागी

आफूले सम्हालेको मन्त्रालयसँग साइनो नभएको सुरक्षा निकायको कार्यक्रममा सहभागी हुँदासमेत मन्त्री भट्टराईले मास्क लगाएनन् । २१ असोजमा संखुवासभाको किमाथांका र ताप्लेजुङको ओलाङचुङगोलामा सशस्त्र प्रहरी बलको बोर्डर आउटपोस्ट (बीओपी) स्थापनाका लागि पर्यटनमन्त्री भट्टराई पुगेका थिए । स्थानीयवासी र सशस्त्र प्रहरीको बाक्लै उपस्थिति रहेको कार्यक्रममा भट्टराईले मास्क लगाउने जरुरी ठानेनन् । आफ्नो गृहजिल्ला भएकाले चुनावी रणनीतिका हिसाबले भट्टराई विभागीय मन्त्रालयको जिम्मेवारीमा नपरे पनि बीओपी स्थापनाको कार्यक्रममा पुगेका हुन् ।

१५ असोजपछिका कुनै पनि कार्यक्रममा बिनामास्क सहभागी भएको विषयमा कुराकानी गर्न मन्त्री भट्टराईसँग सम्पर्क गर्दा उनको फोन स्विच अफ थियो । भट्टराईका स्वकीय सचिव प्रेम गुरागाईंले भने संयोगवश केही कार्यक्रममा मास्क नलगाएको हुन सक्ने बताए । 'आफूलाई कोरोना लागोस् भनेर कसैले पनि मास्क नलगाउने भन्ने कुरा हुँदैन', उनले भने । त्यसो भए राज्यको नियम मन्त्रीज्यूलाई लागू हुँदैन ? भन्ने प्रश्नमा उनको जवाफ थियो, 'त्यो त उहाँलाई नै सोध्नोस् ।'

कानुनमा के छ ?

कोरोना संक्रमण रोकथामका लागि गृह मन्त्रालयले सुरक्षा मापदण्ड सार्वजनिक गरेको छ, जसमा आवतजावत गर्दादेखि सेवा प्रवाह गर्दासम्म अनिवार्य मास्क लगाउनुपर्छ । संक्रामक रोग नियन्त्रण ऐनअनुसार केन्द्र र प्रदेश सरकारले आवश्यक आदेश जारी गर्न सक्नेछन् । यसरी दिएको आदेश उल्लंघन गर्नेलाई १ सय रुपैयाँ जरिवानादेखि १ महिना कैद वा दुवै सजायको व्यवस्था छ । साथै, नियम पालना गराउनेलाई बाधा पुर्‍याउनेलाई ६ सय रुपैयाँ जरिवाना र ६ महिना कैद वा दुवै दण्ड हुने उल्लेख छ ।

यही ऐनअन्तर्गत प्रहरीले २२ साउनदेखि अहिलेसम्म देशभर सार्वजनिक स्थलमा मास्क नलगाई हिँड्ने ५ लाख ५३ हजार २ सय १३ जनलाई कारबाही गरेको प्रहरी आँकडा छ । तर यो सूचीमा लगातार मास्क नलगाई सार्वजनिक कार्यक्रममा देखिने मन्त्री भट्टराईको नाम भने छैन ।

उच्च ओहोदामै बसेकाबाट सरकारी मापदण्ड मिचिनुले जनस्वास्थ्यमाथि उनीहरूको लापरबाही प्रस्ट हुन्छ । उनले आफूलाई कोभिड–१९ संक्रमण भएको जानकारी गराउने फेसबुक स्टाटसमा लेखेका छन्, होसियार रहनु र परिआएमा सामना गर्नुबाहेक के नै पो विकल्प छ र ?

मापदण्ड मिचुवा मन्त्री

२३ असोज : विनय मोहन क्वात्रासँग भेट । मास्क नलगाईकन क्वात्रालाई मायाको चिनो टक्र्याए । आमनेसामने बसेर कुराकानी गर्दा पनि मन्त्री भट्टराईले मास्क धारण गरेनन् ।
२१ असोज : संखुवासभाको किमाथांका र ताप्लेजुङको ओलाङचुङगोलामा बीओपी स्थापनाका लागि पुग्दा भीडभाडमा मास्कविहीन
सचिव केदारबहादुर अधिकारीको बिदाइमा पनि मास्क नलगाई सहभागी
१९ असोज : विराटनगर विमानस्थल विस्तारका लागि केन्द्र र प्रदेश सरकारबीच भएको समझदारी कार्यक्रममा मास्क नलगाई सहभागी ।
१७ असोज : डोटी, बझाङ र बैतडीमा परीक्षण उडानका लागि पुग्दा मास्क नलगाई सहभागी ।
१५ असोज : सुर्खेत विमानस्थल विस्तारका लागि केन्द्र र प्रदेश सरकारबीच भएको समझदारी कार्यक्रममा मास्क नलगाई सहभागी ।

प्रकाशित मिति: आइतबार, असोज २५, २०७७ १४:०७